دلۆڤان تاكه گۆلپارێزێ پارێزگه‌هێ یه دناڤ رێزێن هه‌لبژارتیێ ئیراقێ دا
ئه‌ڤرۆ،
د دیداره‌كێ دا گۆلپارێزێ كوڕِێ باژێرێ هه‌لبژارتیێ ئیراقێ یێ ته‌پا پێی و یانا ته‌له‌به یا به‌غدایی دلۆڤان مه‌هدی دیاركر كه‌یفخووشه بۆ جارا دویێ چوویه د ناڤ رێزێن هه‌لبژارتیێ ئیراقێ دا سه‌رباری داخوازكرنا وی گیرۆبوو .
زێده‌تر ناڤهاتی بۆ رۆژناما ئه‌ڤرۆ گۆت: ده‌رئه‌نجامێ ئاست و شیانێن ل گه‌ل یانا خوه ته‌له‌به د خولا پلا نایابا ئیراقێ دا نیشان دایی ژلایێ لژنا هه‌له‌سه‌نگاندنێ ژ ئێكه‌تیا ته‌پاپێی یا ئیراقێ ڤه هاتبوومه ده‌ستنیشانكرن لێ داخوازكرنا بۆ ناڤ رێزێن هه‌لبژارتیێ نیشتیمانی گیرۆبوو و دڤیابا زووتر ئه‌ڤ پێنگاڤه هاتبا هاڤێتن و به‌لگه ژی راهێنه‌رێن گۆلپارێز و جادا وه‌رزشی یا ئیراقێ ئه‌ڤچه‌نده ژی دۆپات دكرن ل ده‌زگه‌هێن راگه‌هاندنێ، لێ هه‌رچه‌وابیت نوكه ل گه‌ل هه‌لبژارتیێ ئیراقێ مه و به‌رهه‌ڤیا بۆ یاریا دووماهیا ڤاڤارتنێن مۆندیالا قه‌ته‌ر 2022 ئه‌وا دهێته چاڤه‌ڕێ كرن ئه‌ڤرۆ هه‌مبه‌ری هه‌لبژارتیێ سوریا بین بۆ پلێتا پاشكۆیێ ده‌ربازبوونێ سه‌ره‌رایی گۆلپارێزێ یه‌ده‌كم لێ به‌رهه‌ڤم هه‌رده‌مێ داخواز ژ من هاته كرن یاریێ بكه‌م.
ژلایه‌كێ دووڤه دلۆڤان مه‌هدی ئه‌وچه‌نده ژی دیاركر كو كه‌یفخووشه وه‌كو یاریزانه‌كێ كورد و خه‌لكێ پارێزگه‌ها دهۆكێ بۆ جارا دویێ دناڤ رێزێن هه‌لبژارتیێ ئیراقێ دایه و دێ هه‌موو بزاڤا كه‌ن جهێ خوه پارێزیت و شیانێن خوه زێده‌تر پێشڤه به‌ت كو ببیته یاریزانێ سه‌ره‌كی .
