دلێر به‌ده‌ل: هونه‌رێ شێوه‌كاری چو مفا نه‌گه‌هاندیه من
ئه‌ڤرۆ، شاهۆ فه‌رید:
دلێر به‌ده‌ل، شێوه‌كاره‌كێ پارێزگه‌ها دهۆكێ یه د دیداره‌كێ دا بۆ رۆژناما ئه‌ڤرۆ خویا كر كو ده‌مێ قوتابی ل قوناغا بنه‌ره‌ت حه‌زا كارێ هونه‌رێ شێوه‌كاری ل ده‌ف وی په‌یداببوو و مامۆستا و مالباتا وی پشته‌ڤان و هاریكاربوون ل گه‌ل وی هه‌تا چوویه په‌یمانگه‌ها هونه‌رێن جوان و ل په‌یمانگه‌هێ حه‌زا وی بۆ ئه‌نجامدانا كارێن هونه‌رێ شێوه‌كاری پتر لێ هات و گۆت: “پشته‌ڤانیا هونه‌رمه‌ندێن شێوه‌كار وه‌كو پێدڤی ناهێته‌كرن ژ به‌ر ڤێ چه‌ندێ د به‌رزه‌نه و نه‌شێن كارێن باش ئه‌نجام بده‌ن، ژ به‌ر ڤێ چه‌ندێ ژی پشتی من په‌یمانگه‌ه ب دووماهی ئینای كارێ هونه‌ری چو مفا نه‌گه‌هانده‌من و نه‌چاربووم ده‌ستان ژ كارێ هونه‌رێ شێوه‌كاری به‌رده‌م”.
ناڤهاتی ئاماژه دا وێ چه‌ندێ كو هونه‌رێ شێوه‌كاری مه‌زاختی و ماندووبوونه‌كا مه‌زن دڤێت و بێ پشته‌ڤانی ئه‌ڤ كاره ناهێته ئه‌نجامدان و ئه‌ڤه بوویه ئه‌گه‌ر كو گه‌له‌ك ژ ده‌رچوویێن پشكا شێوه‌كاری ل په‌یمانگه‌ها هونه‌رێن جوان به‌رده‌وامیێ نه‌ده‌نه كارێ خوه یێ هونه‌ری و گۆت: “چوجاران داخواز ژ من نه‌هاتیه‌كرن پشكداریێ د پێشانگه‌هان دا بكه‌م ژ به‌ر ڤێ چه‌ندێ نه‌شیایمه ئه‌و كارێ من ڤیای ئه‌نجام بده‌م نیشا خه‌لكی بده‌م، ژ به‌ر ڤێ چه‌ندێ دخوازم سازیێن په‌یوه‌ندیدار پتر پشته‌ڤانیا هونه‌رمه‌ندێن شێوه‌كار بكه‌ن، چونكو هونه‌ر ئێك ژ ناسنامێن گرنگ یێن ناساندن و پێكڤه‌ژیان و خورتكرنا په‌یوه‌ندیانه”.
