دنیا جیهاد: من دڤیا ببمه كلیله‌ك دا گه‌له‌ك كچێن دی ژی چاڤ ل من بكه‌ن
دهۆك، شاكر ئه‌تروشی:
دنیا جیهاد، كچه‌كا خه‌لكا دهۆكێ یه، د ژیێ شازده سالیێ دا ده‌ست ب كارێ بازرگانیێ كریه و ل ده‌ستپێكێ هنده‌ك كه‌لوپه‌ل ژ ده‌رڤه‌ی وه‌لاتی بۆ دهاتن و ئه‌وێ ب رێیا ئۆنلاین د فرۆتن و پشتی بۆ وێ باوه‌ریه‌كا باش چێبووی كو ئه‌و دێ شێت كارێن مه‌زنتر ئه‌نجام ده‌ت، به‌ری كێمتر ژ دو هه‌یڤان رابوو ب ڤه‌كرنا نڤیسینگه‌هه‌كا كڕین و فرۆتنا عه‌رد و خانیان و ب گۆتنا وێ دو تشت ئه‌گه‌رێن سه‌ره‌كی بوون كو ئه‌و ڤێ نڤیسینگه‌هێ ڤه‌كه‌ت، ئه‌و ژی یا ئێكێ باوه‌ری ب خۆبوون، یا دویێ ژی پشته‌ڤانیا بابێ وێ.
دنیا بۆ ئه‌ڤرۆ دبێژیت: من پولا دوازدێ ب دووماهی ئینایه و حه‌زدكه‌م بچمه كولیژا یاسایێ، لێ حه‌زا من كارێ بازرگانیێ یا به‌ری چه‌ندین سالایه و وه‌كو من ئاماژه پێ كری من ژ پرۆژه‌كێ یچووك ده‌ستپێكر هه‌تا گه‌هشتیه وی راده‌ی كو نڤیسینگه‌هه‌كا عه‌رد و خانیان ڤه‌كه‌م، هه‌لبه‌ت ئه‌ز دزانم ئه‌ڤ كاره بۆ من وه‌كو كچه‌ك یێ ب زه‌حمه‌ته، چنكو هه‌تا نوكه به‌س زه‌لامان ئه‌ڤ كاره دكر، لێ من دڤیا ببمه كلیله‌ك دا گه‌له‌ك كچێن دی ژی چاڤ ل من بكه‌ن، له‌ورا ئه‌ز رابووم من ئه‌ڤ پێنگاڤه هاڤێت و من باوه‌ریه‌كا باش هه‌یه كو ب نوكه ب ده‌هان كچ ل دهۆكێ، به‌لكو پتر ژی شیانێن باش هه‌نه دێ شێن دوارێ بازرگانیێ دا، هه‌روه‌سا گه‌له‌ك وارێن دی دا ب سه‌ركه‌فتیانه كاركه‌ن، لێ هنده‌ك ژوان مالا وان رێكێ ناده‌نێ، هه‌روه‌سا ره‌وشت و تیتال ژی درێگرن كو كچێن كوردان ب هه‌موو خه‌ون و هیڤیێن خوه شادببن، بۆ زانین د به‌رنامێ من دایه پشتی ڤێ نڤیسنگه‌هێ هنده‌ك تایێن دی ژی ڤه‌كه‌م، هه‌روه‌سا دوارێ ئاڤاكرنا پرۆژان و قونته‌راتان ژی دا كاربكه‌م.
