دهوك وه‌ك من دیتی ل شه‌ڤا 6/7 -8 -2014
گه‌فێن تیرورستێن داعش ل سه‌ر كوردستانێ د به‌رده‌وامن ب تایبه‌ت ل به‌روكێن شه‌ری یێن ب سه‌ر پارێزگه‌ها دهوكێ ڤه. ل روژئاڤای دیجله‌ی شه‌ره، ل به‌نداڤا میسل، ل تلكێفێ، ل نه‌وه‌ران، ل باشیكێ تاكو د گه‌هیته خازری. خه‌لك یێ شه‌پرزه‌یه نوزانن چ تێته رویدان. شه‌ڤه و ئه‌ز یێ روینشتی مه ل به‌ر ته‌له‌ڤزیونێ، كونترول یێ ده‌ستێ من دا ژ كه‌ناله‌كی د به‌مه یێ دی به‌لكو ب په‌یامه‌كا سه‌ركه‌فتنێ ئاشنا ببم. هنده‌ك كه‌نالا به ” په‌له ” و ب” له‌ز ” نه‌خوشترین ده‌نگ و باس ل سه‌ر شاشێن خو د ئینانه خوارێ، هنده‌كێن دی وێنێن قه‌هره‌مانییا پێشمه‌رگه‌هی و خوراگرییا خه‌لكێ كوردستانێ نیشان دان بو بلندكرنا وره‌یا ملله‌تی، ل ده‌ستپێكا شه‌ری راگه‌هاندنا كوردی نه ل ئاستی رویدانێ بوو. به‌ریكانه‌كا ڤه‌گوهاستن و رومالكرنا شه‌ری د ئارا دابو بێی بزانن كارتێكرنا وێ یا ده‌روونی ل سه‌ر ملله‌تی چی یه. د په‌یوه‌ندیه‌كێ دا ژێده‌ره‌ره‌كێ باوه‌ر پێ كری ئه‌ز ئاگه‌هداركرم كو :”پێشمه‌رگه‌ه ژ تلكێفێ و به‌نداڤا میسل هاته ڤه‌كێشان. دودلیه‌ك و ئالوزیه‌ك و ترسه‌ك یا د ناڤ باژێرێ دهوكێ دا په‌یدا بووی و هنده‌ك یێ كارێ ره‌ڤینێ دكه‌ن. سه‌ره‌رای وێ چه‌ندێ، بارودوخ یێ ل بن كونترولا ده‌زگه‌هێن ئاسایشێ و رێكخستنێن پارتی. پرانییا خه‌لكی یێ هاریكار و خوراگره. ” په‌یوه‌ندی ب دوماهی هات. د ڤان كاودانێن ئالوز دا، كو ئه‌و سێ روژه هه‌موو خه‌لكێ پارێزگه‌ها دهوكێ و دام و ده‌زگه‌هێن میری یێ پێشوازییا ب سه‌دان هزاران ژ برایێن خو یێن ژ شنگال و زومار ڤه هاتین دكه‌ت. پێشمه‌رگه‌ه یێ ل به‌روكێن شه‌ری، خانه‌نشینێن ئه‌یلول و گولانێ چه‌كێ راكری و یێن سه‌نگه‌را دا. لقێ ئێك ب به‌رپرس و كارگێر و كادرێن ناوچێن خوڤه یێن ل به‌ره‌یێ” سحێلا “. ب سه‌دان گه‌نجێن نه‌وه‌یێ سه‌رهلدانێ چه‌كی هه‌لگرتی و وه‌ك خوبه‌خش به‌ره‌ف به‌روكێن شه‌ری ڤه چوین بێی شه‌هره‌زایه‌كا باش ب كارئینانا چه‌كی دا هه‌یت. تورێن جڤاكی ل كارن و هه‌ر ئێك وه‌كی خو یێ رویدانا به‌لاڤ دكه‌ت. تابورێ پێنجێ، هه‌ر چه‌نده یێ لاواز بوو، ده‌ست ب پروپاگندێ و شه‌رێ ده‌رونی كر. نه ئارامیه‌ك كه‌فته هه‌ر مال و كولان و گه‌ره‌كه‌كا باژێرێ. د ڤان بارودوخێن هه‌ستیار و چاره‌نڤیسدا یا پیتڤیه مروڤ بچیته د ناڤ جه‌ماوه‌ری دا. ژ به‌ر هندێ من ئه‌و بریار دا. ده‌ما ئه‌ز ژ مال ده‌ركه‌فتم، من دیت گه‌نجێن كولانا مه یێن خرڤه‌بوین. من دلنیا كرن و ب راستی د خوراگر بوون. هه‌كه مروڤ ژ تاخێ سێ گركا به‌ره‌ڤ بازاری ڤه بچیت دێ ل جادا “بارزان” ده‌رباس بیت، كو جادا سه‌ره‌كییه به‌ره‌ڤ گه‌لیێ “بێسرێ” ڤه دچیت. پولیسێن هاتن و چونێ ل سه‌ر كارێ خو بوون. ل وێرێ هنده‌ك ژ گه‌نجێن تاخێن نزاری و سه‌رهلدان رژیابونه سه‌ر جادێ و ب توندی دروشمێن دژی ره‌ڤینێ ڤه‌دگێران. هه‌میان ئالایێن كوردستانێ و پارتی و وێنێن بارزانی بلند راكربوون و شالێن پارتی، ئه‌وێن ل هه‌وا هه‌لبژارتنا هاتینه دابه‌شكرن، د سه‌رێ خو ئالاندبون و ب ده‌نگه‌كێ بلند ناڤ ب كوردستانێ و پارتی و بارزانی و پێشمه‌رگه‌هی دا. رێكخشتنێن پارتی ل هه‌موو گه‌ره‌كا خه‌لك دلنیا دكر كو هیچ مه‌ترسی ل سه‌ر دهوكێ نینه. ئاسایش و ده‌زگه‌هێن تایبه‌ت د زال بوون ل باژێرێ دهوكێ بو دلنیاكرنا خه‌لكی و پاراستنا ئارامیێ و دانانا سنورا بو هه‌ر كاره‌كێ نه‌ره‌وا بهێته كرن. ئه‌ز گه‌هشتمه ناڤ بازاری جهێ سه‌ره‌كیێ خرڤه‌بوونا جه‌ماوه‌ری. ب راستی شه‌ڤه‌كا تایبه‌ت و دیروكی بوو. ب سه‌دان ئوتومبێل یێن ژ گه‌ره‌كێن دهوكێ به‌ره‌ڤ بازاری ڤه تێن و ب هزاران گنجێن خوین گه‌رمێن دهوكێ ژ كور وكچان یێن خو خه‌ملاندین، وه‌كی ئه‌وێن ل سه‌ر جادا بارزان، ب ئالایێ كوردستانێ و ره‌نگێن زه‌ر و وێنێن سه‌روك بارزانی. هنده‌ك به‌رپرس و كه‌سایه‌تی و په‌رله‌مانتار د ناڤ دا بوون. ژماره‌كا گه‌نجان د چه‌كدار بوون. تلیلیێن خه‌مێ د هاتنه هه‌لدێران. كوردستان، بارزانی، پێشمه‌رگه‌ه و سرودا نیشتیمانییا “ئه‌ی ره‌قیب” ل سه‌ر زارێ هه‌ر كه‌سه‌كی دهاتنه قێركرن. گه‌نجێن ده‌ڤه‌را سێمێلێ روله‌كێ كاریگه‌ر هه‌بو د خوراگریێ دا ل سنورێ خو و جادا سه‌ره‌كییا د ناڤبه‌را دهوكێ و سێمێلێدا و هنده‌ك گروپێن وان ب كوسته‌را خو گه‌هاندبو ده‌ڤه‌را فه‌یدیێ و ئاهنگا به‌رخودانێ ل وێرێ شاراند. ئه‌و شه‌ڤ شه‌ڤا خوراگریێ بوو، شه‌ڤا پاراستنا باژێرێ دهوكێ بو، شه‌ڤا نه‌هێلانا گوتگوتكێن ره‌ڤینێ و به‌ردانا باژێری بوو. شه‌ڤه‌كا خه‌مگین و داخ ل دل بوو. كومه‌لا هونه‌رمه‌ندێن كوردستانێ ل دهوكێ ل گه‌ل هونه‌مه‌ندان شیان د ده‌مه‌كێ كێم دا خو ئاماده بكه‌ن و ئاهنگه‌كا جه‌ماوه‌ری ب گێرن ل گوره‌پانا به‌رامبه‌ر رێڤه‌به‌رییا پولیسێن دهوكێ. هنده‌ك گوتار ژ لایێ به‌رپرسان ڤه هاتنه پێشكێش كرن. ئه‌و ئاهه‌نگ راسته‌وخو ل سه‌ر شاشا كه‌ناێ ئاسمانیێ ” وار ” د هاته په‌خش كرن كو ب راستی ڤی كه‌نالی روله‌كێ به‌رجاڤ گێرا د ڤه‌گوهاستنا وێنێن جه‌ماوه‌رێ دلسوزێَ خاكا كوردستانێ و باژێرێ خو. ئاهه‌نگێ ڤه‌كێشا تاكو بویه سپێده پاشی خه‌لك زڤری مالێن خو. ئه‌گه‌ر بێژین كه‌س نه د ره‌ڤی یا دویره ژ راستیێ. هنده‌كا كارێ هندێ كربو لێ پرانییا هه‌ره زورا خه‌لكێ دهوكێ یێ خوراگر و كوردپه‌روه‌ر بوو و شیان هزرا ره‌ڤینێ بكه‌نه شه‌رمزاری. وێ شه‌ڤێ خه‌لكێ ئاماده بوو، وه‌ك هه‌ر ده‌م یێ ئاماده، گیانێ خو گوری كوردستانێ بكه‌ت وه‌كی ئه‌ڤه ساله‌كه پێش مه‌رگه‌هێ كوردستانێ مه‌زنترین داستانا تومار دكه‌ت د شه‌رێ به‌ره‌ڤانی كرنێ دا ژ خاك و ملله‌تێ خو و پاراستنا ده‌ستكه‌فتیان دژی درنده‌ترین ده‌وله‌تا تیرورستیا داعش. هزار سلاڤ ل گیانێ شه‌هیدێن كوردستانی بن، ئه‌وێن سنورێن كوردستانێ ب خوینا خو نه‌خشاندین و ل پێشمه‌رگه‌هێ كوردستانێ و خه‌لكێ خوراگرێ دهوكێ و سێمێلێ بن ب هه‌لكه‌فتا بورینا ساله‌كێ ل سه‌ر وێ شه‌ڤا ره‌ش دا، ئه‌وا وی خه‌لكێ پر باوه‌ر ب دوزا خو و رێبازا بارزانی شییاین ب كه‌نه شه‌ڤه‌كا گه‌ش د دیروكا باژێرێ دهوكێ دا.
