دهۆكێ بەردەوامی دا سەركەڤتنان و زاخۆ دگەل قارەمانا خولێ خوسارەت بوو
قەیس وەیس:
هەردو یانەیێن پارێزگەهێ دهۆك و زاخۆ یاریێن خوە ژ هەڤڕكیێن گەڕا 10ێ یا خولا ستێرێن ئیراقێ یا فوتبۆلێ ئەنجامدان ئەوا ب سەركەڤتنا ئەلهۆیێن چیا و خوسارەتییا كوڕێن خابۆری بەرانبەر یانەیێن بەغدایی ب دووماهی هاتین.
دهۆكێ سەركەڤتنا چارێ ئینا
تیما فوتبۆلا یانەیا دهۆكێ ب سەرپەرشتییا ڕاهێنەرێ خوە عەبدولغەنی شەهەد شیا سەركەڤتنا چارێ د خولێ دا بینت پشتی دگەل مێڤانا خوە یانەیا ئەمانەت بەغدا ب گۆلەكێ پێشكەڤیت، د یارییا واندا ئەوا ل یاریگەها یانەیا دهۆكێ هاتیە كرن، گۆلا ئەلهۆیێن چیا ژلایێ ستێرێ وێ پیتەر گۆرگیس د خولەكا 61ێ دا تۆماركر، د ڤێ یاریێ دا ستێرێ دهۆكێ مونتەز محەمەد(عنكوش) پشتی وەرگرتنا دو كارتێن زەر ب كارتا سۆر هاتە دوورئێخستن، بڤێ ئەنجامێ تیما دهۆكێ پێشڤە هاتە ڕێزا 11ێ پێشوەخت ب كۆمكرنا 14 خالان ژ چار سەركەڤتن، دو وەكهەڤی و چار خوسارەتیان، یارییا بهێت یا تیما دهۆكێ ل ئەینییا بهێت دەمژمێر سێیێ ئێڤاری مێڤاندارییا یانەیا مینا یا بەسرایی كەت.
ڕاهێنەرێ دهۆكێ كەیفخوەشە
د كۆنگرەیێ رۆژنامەڤانی دا عەبدولغەنی شەهەد ڕاهێنەرێ یانەیا دهۆكێ گۆت: دەستپێكێ پیرۆزباهیێ ل پشتەڤانێن یانەیێ دەم ئەوێن بەردەوام د سارمایێ و گەرمێ دا پشتەڤانییا تیمێ دكەن، سەركەڤتنەكا ژ هەژی بوو و دڤیابا گۆلێن زێدەتر هاتبانەكر، هەتا نوكە تیما مە ل سەر ڕێیەكا راست دچیت، هەموو یاریزان د پلانێن مە د گەهن كو پێكڤە كار دكەین بۆ سەركەڤتنان، ژبەر شێوازێ خولێ و گڤاشتنێن یارییان و گەشتێن بەردەوام یێن تیمێ بۆ باژێرێن جودا یێن ئیراقێ كارتیكرنا خوە ل سەر تیمێ كرییە لەوما ژی دێ چەند یاریزانان ل سەر تیمێ زێدەكەین بۆ ئاسانكاری و سەنگا تیمێ بمینیت.
زاخۆ بێ خال ژ بەغدا ڤەگەڕیا
تیما یانەیا زاخۆ دەست ڤالا ژ پایتەختێ ئیراقێ بەغدا ڤەگەریا پشتی دگەل یانەیا شورتە قارەمانا وەرزێ بۆری ب گۆلەكێ بێ بەرانبەر تووشی خوسارەتیێ بووی، گۆلا ئێكانە یا شورتە د خولەكا هەشتێ دا بوو ژلایێ یاریزانێ وێ محەمەد داود هاتە تۆماركرن، ئەڤ ئەنجامە زاخۆ هێلا ل ڕێزا 10ێ ب 15 خالان ژ چار سەركەڤتن، سێ وەكهەڤی و سێ خوسارەتیان، یارییا بهێت یا زاخۆیان دێ ل یاریگەها وێ بەرانبەر یانەیا ئەمانەت بەغدا بیت ل دەمژمێر سێ ئێڤاری د ناڤا یاریگەها خوە دا.
ویسام ئەگەرێن خوسارەتیێ دیاركر
د كۆنگرەیێ رۆژنامەڤانی دا یێ قەتەری ویسان ڕزق ڕاهێنەرێ یانەیا زاخۆ گۆت: مە سێ خالێن گرنگ ژ دەستدان سەرباری یاریزانێن مە ئاستەكێ باش نیشان دا و كونترۆلا یاریێ ژی كربوو، لێ نە پشكدارییا چار باشترین یاریزانێن مە ژبەر هنگاڤتنێ و كارتێن سۆر بوو ئەگەر كارتیكرنێ ل سەر تیما مە بكەت، دگەل دا گڤاشتنێن یاریان تایبەت بۆ یانەیێن هەرێمێ و باكۆرێ ئیراقێ كو ژبەر دووراتییا ڕێكێ و هەر سێ رۆژان یارییەك و هەروەسان پشكدارییا تیما مە د كۆپا كەنداڤی دا هەموو گڤاشتنن ل سەر یاریزانان و تیمێ، دێ هەموو بزاڤان كەین د ڤەگوهاستنێن زڤستانێ دا هندەك یاریزانان بینن پێخەمەت پركرنا كێماتییان و چارەسەكرنا هندەك ئاریشەیان.
یانەیێن دهۆك و زاخۆ دێ پیشەكارێن ئاست بلند ئینن
دوهی ب شێوەیەكێ فەرمی دەرگەهێ ڤەگوهاستنێن زڤستانێ بۆ یانەیێن پشكدار د خولێ دا هاتییە ڤەكرن ژبۆ ئیمزاكرنا گرێبەستێن یاریزانێن نوو، فدراسیۆنا فوتبۆلا ئیراقێ ماف دایە هەر یانەیەكێ هەتا پێنچ یاریزانان ل سەر پێكهاتیێ تیما خوە زێدەكەت ژ 25 یاریزانان بكەنە 30 یاریزان ژ وانا دو یێن پیشەكار بن و مافێ هەی گۆلپارێز ژی پیشەكار بیت.
ل دووڤ ژێدەرێن رۆژنامەڤانی هەردو یانەیێن پارێزگەهێ دۆڤچوونا چەند یاریزانان كرینە و دبیت ئەڤرۆ هەتا سوبەهی گرێبەستا یاریزانەكی یان دو ژ وان بهێتە ڕاگەهاندن، ژ یانەیا دهۆك دهێتە پێشبینیكرن یاریزانێ هێلا بەرەڤانیێ لایێ چەپێ یێ یانەیا نەجەف عەلا عەباس و هێرشبەرێ سۆری خالد كردەغلی بهێنە دناڤ ڕیزێن تیما دهۆكێ دا، هەروەسان دانۆستاندنێ دگەل سێ یاریزانێن دی هەنە.
لدووڤ ژێدەرێن رۆژنامەڤانی ژلایێ خوەڤە یانەیا زاخۆ یا بزاڤێ دكەت دو یاریزانێن پیشەكار بینتە دناڤ ڕێزێن تیمێ دا دگەل دو یاریزانێن ناڤ خولا ئیراقێ دا، لێ كارگێریێ ناڤێن ئەوا یاریزانان ڤەشارتییە و دبیت هەتا سوبەهی ناڤ بهێنە ڕاگەهاندن.
