دهۆكێ سه‌ركه‌فتنا پێنجێ د خولا ئیراقێ دا ئینا
تیما ته‌پا پێی یا یانا دهۆك به‌رده‌وامی دا هیڤیێن خوه د خولا پلا ئێكا ئیراقێ دا پشتی سه‌ركه‌فتی ل سه‌ر مێڤانا خوه یانا مرور یا به‌غدایی ب دو گۆلان بێی به‌رامبه‌ر د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا نه‌هێ یا كۆما دویێ ل یاریگه‌ها سه‌ره‌كی یا یانا دهۆكێ هاتیه كرن.
د ماوێ هه‌ردو نیڤا دا یاریزانێن دهۆكێ بشێوه‌كێ رێكخستی هاتنه دناڤ یاریگه‌هێ دا و چه‌ندین ده‌لیڤێن گۆلكرنێ ژ ده‌ستدان، هه‌مبه‌ری وێ تیما مێڤان ئه‌و مه‌ترسیا به‌رچاڤ د هێرشێن هه‌ڤدژ دا نه‌بوو، هه‌ردو گۆلێن دهۆكێ ژلایێ یاریزانان ئاسۆ رۆستم و محه‌مه‌د سه‌عید د خوله‌كێن 12 و 48ێ دا تۆماركرن.
ژ ئه‌نجامێن یاریێن دی، سیناعه و ئه‌كه‌د ب دو گۆلان وه‌كهه‌ڤبوو، سامرا ب گۆله‌كێ سه‌ركه‌فتن ل سه‌ر به‌حری تۆماركر ب گۆله‌كێ بێی به‌رامبه‌ر، روومادی ل گه‌ل ناسریه ب گۆله‌كێ تووشی خوساره‌تیێ بوو، دیالا ب چار گۆلان سه‌ركه‌فتن ل سه‌ر ئتیفاق، بابل و میسان ب گۆله‌كێ وه‌كهه‌ڤبوون، ب هه‌مان ئه‌نجام سلیخ و پێشمه‌رگه‌یا وه‌كهه‌ڤبوون.
بڤان ئه‌نجامان دهۆك 15 خالان پێشڤه هاته رێزا چارێ، مرور ب10 خالان جهێ خوه ل رێزا حه‌فتێ پاراست، ئه‌وا یانا سیناعه ب 22 خالان سه‌رێ لیستێ دهێت، سامرا 21 خالان رێزا دویێ، ناسریه ب16 خالان پێشڤه هاته رێزا سێیێ، روومادی ب 15 خالان رێزا پێنجێ دهێت.
عادل ناسر راهێنه‌رێ تیما ته‌پا پێی یا یانا دهۆكێ بۆ رۆژناما ئه‌ڤرۆ گوت: سه‌ركه‌فتن د هه‌ر یاریه‌كێ دا پالده‌ره بۆ ئه‌نجامێن باشتر، دڤێ یاریێ دا هه‌كه نیڤا ده‌لیڤێن خوه مفا ژێ وه‌رگرتبان دا زێده‌تری دو گۆلان تۆماركه‌ین و ئه‌م پێدڤی بووین ژلایه‌كێ دیڤه هه‌موو یاریزان د ئاستێ خوه دابوون، ئه‌م رژدین به‌رده‌وامیێ بده‌ینه هه‌ڤڕكیان هه‌تا دووماهی یاری، هه‌رچه‌نده ده‌لیڤا ده‌ربازبوونێ ب زه‌حمه‌ت كه‌ڤتیه لێ بێی ئۆمێد نه بووین، چار یاریێن مایی دڤێت چو خالان ژ ده‌ست نه‌ده‌ین.
