دهۆكێ سەلماندییە كو باژێرەكێ زیندی و هونەری یە
زنار تۆڤی:
یاسین قادر بەرەزنجی، هونەرمەند و نڤیسەرەكێ خەلكێ باژێرێ سلێمانییێ یە، د دیدارەكێ دا بۆ رۆژناما ئەڤرۆ دیاركر كو ئەڤە 51 سالن ئەو دبۆارێ هونەری دا كاردكەت و هەتا نوكە سێ جاران پشكداری د فلمە فەستیڤالا دهۆكێ دا كریە، ل دووڤ گۆتنا وی ئەڤ سالە ژلایێ رێكخستنێ ڤە وێ قەستیڤالێ پێشكەفتن ب خۆڤە دیتییە و دهۆكێ سەلماندییە كو باژێرەكێ زیندییە و باژێرەكێ هونەری یە، هەروەسا هەبوونا فلمە فەستیڤالێ هاندانە بۆ دروستكرنا پیشەسازییا سینەما كوردی، نوكە ئەو قووناغە چەند پێنگاڤان چوویە پێش و فلمە فەستیڤالا دهۆكێ فاكتەرەكێ گرنگە بۆ پێشخستا سینەمایێ ل كوردستانێ.
هەروەسا گۆت: ب رێیا وێ فەستیڤالێ سینەماكارێن كورد دشێن ئەزموونا كارێ خۆ دەولەمەندتر لێ بكەن و پشكدارییا فلمێن بیانی هاندانەكە بۆ بەرفرەهبوونا ئاسوویێن سینەماكارێن كورد و دەمێ مرۆڤ دهێتە دهۆكێ هیڤیێن مرۆڤی بۆ ژیانێ گەش دبن، بۆ زانین ل سالێن هەشتێیان من چەندین كارێن هونەری ل دەڤەرێن جۆدا یێن پارێزگەها دهۆكێ ئەنجامداینە.
