دهۆكێ كونترۆل ل سه‌ر قاره‌مانیا ئیراقێ و كوردستانێ كر
تیما كیك بۆكسینگا یانا دهۆك بۆ هه‌ردو ئاستێن كچان و كوڕان كونترۆل ل سه‌ر قاره‌مانیا ئیراقێ و كوردستانێ كرن پشتی شیاین رێزێن ئێكێ بۆ كێشێن جودا ب ده‌ستخوه ڤه‌بینن، د هه‌ڤڕكیێن واندا ئه‌وا دوهی ب پشكداریا 105 یاریزانێن چارده یانێن كوردستانێ و باكورێ ئیراقێ ژوانا پێنچ یانێن دهۆك، زاخۆ، ئامێدیێ، شێخان و ته‌ناهی ل هولا گرتیا یانا دهۆكێ هاتیه كرن ئه‌وا دناڤبه‌را هه‌ردو ئێكه‌تیێن كیكبۆكسینگا ئیراقێ و كوردستانێ دهاته رێكخستن.
ئه‌نجامێ یانێن پارێزگه‌هێ بڤی ره‌نگی بوون، لسه‌ر ئاستێ گشتی بۆ پێشكه‌فتیان، دهۆك رێزا ئێكێ 36 خال كومكرن، نه‌وروز 26 خالان و سامرا 22 خالان رێزێن دویێ و سیێ هاتن، زاخۆ ب 16 خالان رێزا چارێ ده‌ستڤه‌ئینا، بۆ ئاستێ كچان یێن تازه‌پێگه‌هشتیان، دهۆك ب 22 خالان رێزا ئێكێ وه‌كو قاره‌مان و شێخان ب14 خالان رێزا دویێ هات، هه‌روه‌سا هه‌ردو یاریزانێن یانا دهۆكێ زانا سالح و خویشكا وی ئاشنا وه‌كو باشترین یاریزان هاتنه دیاركرن.
ژلایه‌كێ دیڤه ئێكه‌تیا كیكبۆكسینگا ئیراقێ چار یارێزانێن كچ یێن یانا دهۆكێ بۆ هه‌لبژارتیێ خوه یێ نیشتمانی سه‌ر ئاستێ تازه‌پێگه‌هشتیان داخوازكرینه ئه‌وژی، ئاشنا سالح، شایه‌ن هاشم، په‌ریسا بریندار و نیدار سالح پشتی شیاین رێزێن ئێكێ بۆ كێشێن خوه ده‌ستخوه‌ڤه‌بینن.
د داخویانیه‌كێدا قاسم ئه‌لواستی سه‌رۆكێ ئێكه‌تیا كیكبۆكسینگا ئیراقێ بۆ رۆژناما ئه‌ڤرۆ گوت: سۆپاسیا به‌رپه‌رسێن وه‌رزشی و حكومی ل پارێزگه‌ها دهۆكێ دكه‌ین كو مێڤانداریه‌كا سه‌ركه‌فتی بوو و هه‌ر تشته‌كێ پێدڤی هاتبوو ته‌رخانكرن، قاره‌مانیه‌كا رێكوپێك و بهێز دهاته كرن یا جهێ كه‌یفخووشیێ دیاربوونا تیمێن كچان بۆ جارا ئێكێ د ناڤ چالاكیێن ئیراقێ دا كو بهێز هاتینه دیتن تایبه‌ت یێن دهۆكێ ئه‌وێن دێ بوو هه‌لبژارتیێ ئیراقێ پشكداری قاره‌مانیا عه‌ره‌بی بن ئه‌وا پارێزگه‌ها دهۆكێ ل دووماهیا هه‌یڤا ته‌باخا بهێت مێڤانداریا وێ كه‌ت و مه باوه‌ری هه‌یه دێ ئه‌نجامێن باش بده‌ستخوه‌ڤه‌ئینن.
مه‌حفوز ئیبراهیم سه‌رۆكێ ئێكه‌تیا پارێزگه‌هێ گوت: پێخووشحالین پشتی ڤه‌قه‌تیا زێده‌تری دو سالان یانێن مه ب هێز ڤه‌گه‌ڕیانه هه‌ڤڕكیان و رێزێن پێشیێ بده‌ستڤه‌ئینان، سۆپاسیا یانا دهۆك، نوونه‌راتیا لژنا ئولۆمپی و پارێزگه‌ها دهۆكێ دكه‌ین كو هه‌ڤكار بوون ژبۆ سه‌ركه‌فتنا ڤێ قاره‌مانیێ، پیروزباهیا یانێن دهۆك، زاخۆ، شێخان و ئامێدیێ دكه‌ین ئه‌وێن رێزێن ئێكێ هه‌تا سێیێ بده‌ستڤه‌ئینایی، گه‌شبینن ل هه‌یڤا ته‌باخا بهێت ب هه‌مان رێكخستن و سه‌ركه‌فتن ب باشترین شێوه پارێزگه‌ها دهۆكێ دێ ئێكه‌م بیت بێی ركابه‌ر.
