دهۆكێ پێنگاڤه‌كا باش به‌ر ب برنا ناسناڤى هاڤێت
ئه‌ڤرۆ نيوز:
ئه‌ڤرۆ ياريێن گه‌را 22 ژ خولا نايابا كوردستانێ هاتنه كرن و چاڤێن هه‌موويان به‌ر ب ياريا دهۆك و نه‌ورۆز بوون، ئه‌وا سه‌ركه‌فتيێ وێ هه‌تا راده‌كێ مه‌زان دا ناسناڤێ خولا نايابا كوردستانێ ئێكلا كه‌ت.
د ڤێ ياريێ دا، ياريكه‌رێن يانا دهۆك هه‌ر زوو بزاڤ كر گۆلا سه‌ركه‌فتنێ تۆمار كه‌ن بێى كو هزر د وێ چه‌ندێ دا بكه‌ن يێ ژ ده‌ڤه‌رىى ياريگه‌ها خوه ل سلێمانيێ ياريێ دكه‌ن، ئه‌و بوو ژ ئه‌نجامێ لێدانه‌كا په‌نه‌لتيێ كاپتنێ يانا دهۆك خالد مشير شيا ل نيڤا ئێكێ و ل ده‌قيقا 36 گۆلا ئێكێ بۆ يانا دهۆك تۆمار بكه‌ت و ئه‌ڤ نيڤه ب ڤى ئه‌نجامى ب دووماهى هات.
د نيڤا دويێ دا، هه‌ر ژ ده‌سپێكا ياريێ ياريكه‌رێن نه‌ورۆز د رژد بوون كو دێ ئه‌نجامێ ياريێ گوهۆڕن و ئه‌ڤه ژى گه‌له‌ك نه‌ما پشتى ب تنێ ب بورينا حه‌فت ده‌قيقان ياريكه‌رێ وێ وه‌لات سالح ب ره‌نگه‌كێ جوان گۆلا وه‌كهه‌ڤيێ تۆماركر.
د ده‌مێ مايى يێ ياريێ دا، يانا دهۆك زێده‌تر به‌ره‌ڤانى كر و وه‌سان دياربوو يا ب وه‌كهه‌ڤيێ رازى بوو و سه‌ره‌رايى بزاڤێن مه‌زن يێن تيما مێڤاندار ژى، به‌لێ نه‌شيا چ تشتێ نووتر بكه‌ت و ب وى ره‌نگى يارى ب دووماهى هات.
ب ئه‌ڤێ چه‌ندێ ژى يانا زێره‌ڤانى ما ل سه‌ر ليستا خولا ناياب ب 42 خالان و يانا دهۆك ل رێزا دويێ ب 41 خالان و نه‌ورۆز ژى ل رێزا سيێ ب 38 خالان و ب ڤێ چه‌ندێ ژى هه‌ردو ياريێن مايێن يێن وان يانا دێ بڕيارێ ل سه‌ر ناسناڤێ خولێ ده‌ن.