دهۆك بۆ پێشەنگیێ دێ یاریێ کەت و زاخۆ دێ بزاڤێن سەركەفتنا ئێكێ کەت
دهێتە چاڤەڕێ كرن ئەڤرۆ دەست ب یاریێن گەڕا چارێ ژ هەڤڕكیێن قۆناغا ئێكێ یا خولا ستێرێن ئیراقێ یا تەپا پێی ل یاریگەهێن جودا بهێنە كرن، یانەیێن كوردستانی دێ بەرانبەر یانەیێن بەغدایی و باشۆرێ ئیراقێ بن و چاڤ ل سەركەفتنێ یە.
یاریێن سوبەهی
بڕیارە سوبەهی پێنج شەمبی ل دەمژمێر حەفتی شەڤ تیما تەپا پێی یا یانەیا دهۆك ل یاریگەها نەجەف دێ بیتە مێڤانا یانەیا نەفت ئەلوەسەت د تاقیكرنەكا دی با بهێز دا بۆ ئەلهۆیێن چیا ئەوا نوكە ب حەفت خالان رێزا سێیێ دهێت پشتی دو سەركەفتن و وەكهەڤیەكێ، ژلایێ خوەڤە خودانێن ئەردی بتنێ ئێك خال كۆمكری ل رێزا 18ێ دهێت و بزاڤێن وێ بۆ دەستڤەئینانا ئێكەم سێ خالن، تیما دهۆكێ ب سەرپەرشتییا راهێنەرێ پارێزگەهێ سلێمان رەمەزان ئاست و ئەنجامێن وێ باشن و ڤەگەڕیانا ستێرا وێ هێران ئازاد دێ هێزەكا دی دەتە تیمێ، بۆ یارییا ئەڤرۆ چاڤ ل سەركەفتنێ یە ژبۆ بەردەوامییا پێشڤەچوونێ بەر ب رێزا ئێكێ.
ژ یاریێن سوبەهی نەورۆز د ناڤ ئەرد و جەماوەرێ خوە دا بەرانبەر یانەیا مینا ئەوا د نەخۆشترین كاودان دا د بۆرینیت ژ سێ یارییان سێ خۆسارەتی هەنە و د بڕیارەكا نە چاڤەڕێكری دا كارگێرییا یانەیێ گرێبەستا هەمی یاریزان ب كادرێ راهێنەر ڤە هەلوەشاند ژبەر سەرپێچییا یاسایا فیفایێ، ئەڤ یارییە دبیت بۆ نەورۆز ب سانەهی بیت ئەوا ب سێ خالان رێزا 14ێ دهێت، ژلایێ خوە یانەیا هەولێر د بهێزترین یاریێن ڤێ گەڕێ دا دێ بیتە مێڤانا یانەیا شورتە ل باژێرێ بەغدا، تیما كوردستانی ب چار خالان رێزا هەشتێ دهێت و مێڤاندارا وێ شورتە ب شەش خالان رێزا چارێ دهێت.
یاریێن رۆژا ئەینی
ئێك ژ یاریێن دی یێن بهێز و كۆپیتكا هەڤڕكیێن گەڕا چارێ دا تیما یانەیا زاخۆ دێ ل یاریگەها خوە مێڤاندارییا یانەیا تەلەبە یا بەغدایی كەت، كوڕێن خابووری ب دو خالان رێزا 17ێ دهێت ژ دو وەكهەڤییا كو ئەنجامێن نە چاڤەڕێ كرینە بۆ جەماوەرێ وێ، راهێنەرێ زاخۆ یێ قەتەری تەلال ئەلبلۆشی داخواز كرییە بهێنفرەهـ بن و گەشبینە د یارییا دگەل تەلەبە دەستپێكا سەركەفتنان بیت، لێ یانەیا بەغدایی ئەوا د یارییا بۆری دا تووشی مەزنترین خوسارەتی بوویی بەرانبەر نەفت میسان دێ لبن گڤاشتنا جەماوەرێ زاخۆ بزاڤێن قەرەبووكرنێ كەت ئەڤ یارییە دێ ل دەمژمێر 9:30 هێتە ئەنجامدان، ژ یاریێن دی یێن رۆژا ئەینی، حدوود- زەورا، ئەلقاسم- نەفت ئەلبەسرا، نەجەفت- كەربلا، ل شەمبییا بهێت سێ یاریێن دی ژی بڤی رەنگی دێ هێنە كرن، نەفت میسان- ئەمانەت بەغدا، كەرخ- جەوییە، كارەبا- نەفت.
