دهۆك بەرانبەر یاریەکا ب زەحمەت و زاخۆ دێ بزاڤێن سەركەفتنێ كەت
دهێتە چاڤەڕێ كرن ئەڤرۆ و سوبەهی پێنج یاریێن مایی ژ چارچووڤێ گەڕا 10ێ یا خولا ستێرێن ئیراقێ یا تەپا پێی بهێنە ئەنجامدان، هەردو یانەیێن دهۆك و زاخۆ دێ ژ دووری جەماوەرێ خوە مێڤانێن یانەیێن بەغدایی بن د ئەركێن ب زەحمەت و ب هێز دا.
بڕیارە ئەڤرۆ ل دەمژمێر 2:30 پشتی نیڤرۆ تیما یانەیا دهۆك ل یاریگەها كۆت ببیتە مێڤانا یانەیا جەوییە ئێك ژ بهێزترین یاریێن وێ د خولێ دا، ئەلهۆیێن چیا د رەوشەكا خراب دایە تایبەت پشتی ئەوان ئەنجامێن لاواز و دەست ژ كاركێشانا راهێنەرێ تیمێ سلێمان رەمەزانی و حەیدەر سەباح ئەوێ هاریكارێ راهێنەر ل جهێ وی هاتە دانان، رێزبەندییا نوكە تیما دهۆكێ تێدا ل رێزا نەهێ یە ب 12 خالان ژ سێ سەركەفتن، سێ وەكهەڤی و سێ خوسارەتی، بەرانبەر دا یانەیا جەوییە كێمتر ئێك یاری سەرێ لیستا خولێ دهێت ب 22 خالان و هێرشبەرێ وێ ئەیمەن حسێن ب حەفت خالان ژی گۆلكەرێ خولێ یە، بۆ ڤێ یاریێ دبیت هەر ئێك ژ ستێرێن جەوییە ئەحمەد بایش و پیشەكارێ وان یێ تۆگۆلی كۆفی فرانكۆ یاریێ نەكەن ژبەر هنگاڤتنێ، لێ تیما دهۆكێ پێدڤی ب سەركەفتنێ یە ژبۆ ئاشتكرنا جەماوەرێ خوە و ڤەگەڕیان بۆ رێزێن پێشێ و راوەستیانا ژ دەستدانا خالان ئەوا ئەڤە دێ بۆ ماوەیێ نێزیكی هەیڤەكە و چار یارینە تام نەكرییە سەركەفتنان، دووماهی سەركەفتنا وێ دگەل نەجەف بوو ل 24ـێ مەها بۆری، دووڤدا دگەل كەرخ تووشی خوسارەتیێ بوو، پسیارە ئەوە ئەرێ دهۆك دێ شێت ئێكەم خوسارەتی گەهینتە جەوییە یان ژی خودانێن ئەردی دێ برینێن ئەلهۆیێن چیا كورترل لێكەت!.
ژلایەكێ دووڤە تیما یانەیا زاخۆ سوبەهی ل دەمژمێر 2:30 پشتی نیڤرۆ دێ ل یاریگەها ئەمانەت بەغدا بیتە مێڤانا یانەیا نەفت د یارییەكا دی یا تاقیكرن بۆ كوڕێن خابۆری ژبەر كو ئەو ژی ل بن گڤاشتنێن جەماوەرێ خوەیە دەرئەنجامێن وێ یێن نە خوەجهـ د خولێ دا ئەوا نوكە 10 خال كۆمكرین و رێزا 11ێ دهێت ژ دو سەركەفتن، چار وەكهەڤی و دو خوسارەتییان، ژلایێ خوەڤە تیما نەفتێ ئەوا ب خالەكێ ژ یاریگەها دهۆكێ هاتی دێ بزاڤێ بۆ سێ خالان كەت و خوە نێزیكی رێزێن ئێكێ كەت ئەوا نوكە ب 16 خالان رێزا حەفتێ دهێت، تەلال ئەلبلۆشی راهێنەرێ یانەیا زاخۆ بەرانبەر تاقیكرنەكا ب هێزە كو تیمەكە دهێتە هژمارتن یا سەرخست د خولێ دا، لڤێرە كوڕێن خابووری دێ شێن جەماوەرێ خوە ئاشتكەن یان ژی دێ تووشی ئەنجامەكێ دی یێ نە چاڤەڕێ كری بن!
ژ یاریێن دی یێن ئەڤرۆ، تەلەبە- كەربەلا، ئەلقاسم- كەربەلا، زەورا- ئەمانەت بەغدا، بۆ زانین هەردو یانەیێن دهۆك و زاخۆ دێ یاریێن خوە یێن بهێت ژی ژ گەڕا 11ێ ژ دەرڤەیی یاریگەها خوە دگەل حدوود و كەرخ كەن.
