دهۆك بەردەوامە ل سەر ئەنجامێن خراب
قەیس وەیس:
بۆ یارییا شەشێ ل دووڤ ئێك تیما فوتبۆلا یانەیا دهۆك بەردەوامە ل سەر زنجیرا ئەنجامێن خراب و نەشیا هیچ سەركەڤتنەكێ د ڤان یارییان دا بینیت، پشتی د یارییا سێشەمبییا بۆری بەرانبەر مێڤانا خوە یانەیا مینا یا بەسرایی ب گۆلەكێ وەكهەڤ بووی ئەوا ژ چارچووڤەیێ یاریێن پاشئێخستی یێن تیما دهۆكێ كو ژ گەڕا 27ێ بوو.
دهۆكێ دەلیڤەیا پێشڤەچوونێ ژ دەستدا
تیما یانەیا دهۆك مفا ژ یاریێن خوە یێن پاشئێخستنی نە دیت و نەشیا سەركەڤتنێ ل سەر یانەیا مینا بینت سەرباری یا پێشكەڤتی بوو ب گۆلا هێرشبەرێ خوە ئیبراهیم غازی لێ د خولەكا 42ێ دا یاریزانێ پێشتر یێ یانەیا دهۆك عەلا عەبدولزەهرە شیا گۆلا وەكهەڤیێ بینیت، هەردو گۆلێن یاریێ ژ لێدانێن پەنەلتیان هاتبوونە تۆماركرن، بڤێ ئەنجامی تیما دهۆكێ مانا خوە ل رێزا شەشێ پاراست ب كۆمكرنا 54 خالان ژ 15 سەركەڤتن، نەهـ وەكهەڤی و 10 خوسارەتییان، تیما مێڤان بوونە 40 خال رێزا 16 ڕاوەستیا، بڤێ وەكهەڤیێ تیما دهۆكێ نەشیا مفایی ژ یاریێن پاشئێخستی وەربگریت و پێشڤەچوون د ڕێزبەندیێ دا ژ دەستدا.
گۆلپارێزێ دهۆكێ هیڤی خواست ب هێز ڤەگەڕین
د كۆنگرەیەكێ رۆژنامەڤانی یێ پشتی یاریێ محەمەد سالح گۆلپارێزێ تیما یانەیا دهۆك گۆت: یاریزانێن تیما مە دناڤا یاریگەهێ دا ئەوا د شیان دا پێشكێش كر، پێنەڤێت بۆ هەر یارییەكێ ئەم بتنێ هزرا سەركەڤتنێ دكەین لێ ئەڤە فوتبۆلە، وەرزەكێ ب زەحمەتە ل سەر یاریزانێن مە دا دهێت، پێشتر مە ئەنجامێن گەلەك باش هەبووینە د نوكە دا ئەم یێ د قۆناغەكا هەستیار دا دەرباز دبین، ب هیڤی نە بۆ یاریێن بهێت قەرەبوو بكەین و ب هێز ڤەگەڕین.
شەمبییا بهێت دهۆك مێڤانا ئەلگەرمەیە
چاڤەڕێ دهێتە كرن تیما فوتبۆلا یانەیا دهۆك ل شەمبییا بهێت ببیتە مێڤانا یانەیا ئەلگەرمە ل باژێرێ رۆمادی ژ چارچووڤەیێ هەڤڕكیێن گەڕا 36 یا خولا ستێرێن ئیراقێ ئەوا دێ ل دەمژمێر حەفتێ مەغرب هێتە كرن، تیما دهۆكێ ئەوا لبن گڤاشتن مەزن و نەپشكدارییا چەند یاریزانێن وان ژبەر ئەگەرێن جودا ژ وانا پیتەر گۆرگیس ئەوێ تیم هێلایی و چوویە وەلاتێ سوید، ئەركێ دهۆكییا ب زەحمەتە دگەل یانەیا ئەلگەرمە ئەوا دناڤ ئەردێ خوە دا ژ دەستدانا خالان بزەحمەت بیت.
پیتەر گۆرگیس گۆلكەرێ دهۆكێ یە
تیما دهۆكێ خوانا دەهـ یاریزانێن پشكداری د تۆمار كرنا 37 گۆلان دا هەیە سەرجەمێ 38 گۆلان و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش پێنچ گۆل، ئیبراهیم غازی سێ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، موسیس، زانا عەلی گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
