دهۆك ب سه‌ركه‌فتیانه ژ به‌سرا ڤه‌گه‌ڕیا و سه‌رێ لیستێ پاراست
ئه‌ڤرۆ،
تیما ته‌پا پێی یا یانا دهۆكێ ب ئارمانجا خوه یا سه‌ره‌كی ل باژێرێ به‌سرا شاد بوو پشتی ب سه‌ركه‌فتی ل سه‌ر خودانێن ئه‌ردی یانا مه‌سافه ئه‌لجنوب ب گۆله‌كێ بێ به‌رامبه‌ر، د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا نه‌هێ یا خولا پلا ئێكا ئیراقێ هاتیه كرن.
د نیڤا ئێكێ دا و پشتی بورینا نه‌ه خوله‌كان یاریزانێ دهۆكێ سامر محه‌مه‌د شیا گۆله‌كا جوان بۆ تیما خوه تۆماربكه‌ت ژ ده‌رڤه‌یی ده‌ڤه‌را په‌نه‌لتیێ ئه‌وا به‌ری ڤێ گۆلێ دادڤانێ یاریێ راهێنه‌رێ دهۆكێ عادل ناسر دوورخستی ب كارتا سۆر پشتی نه‌رازبوونا خوه ل سه‌ر بڕیارێن دادڤانی كرین، پشتی ڤێ گۆلێ تیما مه‌سافی لڤینێن باش كرن لێ هه‌مبه‌ری وێ یاریزانێن دهۆكێ نه راوه‌ستیان به‌لكۆ به‌رده‌وام بوون ل سه‌ر گڤاشتنێن خوه بۆ تۆماركرنا گۆلا دویێ لێ نیڤا ئێكێ ب پێشكه‌فتنا دهۆكێ ب دووماهی هات.
د نیڤا دویێ دا تیما مێڤان ده‌ست ب گڤاشتنا كر و چه‌ندین هێرشێن مه‌ترسی بۆ سه‌ر گۆلا دهۆكێ برن ژبۆ راستڤه‌كرنا ئه‌نجامێ یاریێ لێ هه‌موو بزاڤێن وان ژلایێ هێلا به‌ره‌ڤانی و گۆلپارێزێ دهۆكێ هاتنه راوه‌ستاندن، هه‌مبه‌ری وێ هاریكارێ راهێنه‌رێ‌َ دهۆكێ محه‌مه‌د یوسف چه‌ند گوهۆرین كرن ژبۆ كێمكرنا ئه‌وان هێرشێن به‌رده‌وام و شیان لدووڤ پلانا هێرشێن هه‌ڤدژ گۆلا دویێ ژلایێ هێرشبه‌رێ پێكهۆر ئیبراهیم غازی دا بینن ئه‌وا د خوله‌كا 82ێ دا تۆماركری و سێ خالێن گرنگ بۆ تیما خوه مسۆگه‌ر كه‌ت و ب سه‌ركه‌فتیانه ژ به‌سرا ڤه‌گه‌ڕن.
لدور ڤێ سه‌ركه‌فتنێ ئه‌حمه‌د سه‌بری یاریزانێ یانا دهۆكێ كه‌یفخووشیا خوه بۆ رۆژناما ئه‌ڤرۆ دیاركر كو شیان سێ خالێن گرنگ ب ده‌ستڤه بینن و سه‌ركه‌فتیانه ژ به‌سرا ڤه‌گه‌ڕیێن و گۆت: یاریه‌كا ب سانه‌هی نه بوو لێ ئه‌و ئارمانجا مه دڤیایی شیاین بجهبینین، سه‌رباری گڤاشتنێن رێكێ و وه‌ستیانا یاریزانان لێ هه‌موویان ب گیانێ كۆم و ئێك هێز هاتنه د ناڤ یاریگه‌هێ دا و شیان دو گۆلان تۆماربكه‌ین وبه‌رده‌وامیێ بده‌ینه هیڤیێن خوه یێن ده‌ربازبوونێ، پیروزه ل جه‌ماوه‌رێ یانێ و رژدین بۆ به‌رده‌وام سه‌ركه‌فتنان هه‌تا بگه‌هینه ئارمانجا خوه.
بڤی ئه‌نجامێ تیما یانا دهۆك جهێ خوه ل سه‌رێ لیستا كۆما ئێكێ پاراست ب 23 خالان.
