دهۆك دێ بزاڤێن دوبارە سەركەفتنێ و پاراستنا جهێ خوە كەت
ئەڤرۆ
چاڤەڕێ یە ئەڤرۆ چار یاری ژ چارچووڤێ هەڤڕكیێن گەڕا 31ێ یا خولا ئیراقێ بۆ یانەیێن پلا نایاب بهێنە ئەنجامدان، د گرنگترین یاریێن ئەڤرۆ دا و دناڤبەرا دو یانەیێن كوردستانی دا ل دەمژمێر 4:45 ئێڤاری تیما تەپا پێی یا یانەیا دهۆك ل باژێرێ سلێمانیێ دێ بیتە مێڤانا یانەیا نەورۆز، پێشبینی دهێنە كرن هژمارەكا باش یا جەماوەرێ دهۆكێ دناڤ یاریگەهێ دا ئامادەبیت.
دهۆك دێ بزاڤێن دۆبارە سەركەفتنێ كەت
تیما یانەیا دهۆك ئەوا نوكە ب 45 خالان رێزا شەشێ دهێت ژ 11 سەركەفتن، 12 وەكهەڤی و حەفت خوسارەتی شیایە ل رێزبەندیەكا باش بمینت و دێ بزاڤێ كەت دۆبارە سەركەفتنا خوە یا قۆناغا ئێكێ دا ل سەر خودانێن ئەردی نەوروز بینت ئەوا شیایی بەری پێنچ هەیڤان د ناڤ یاریگەها خوە سەركەفیت ب گۆلەكێ بێ بەرانبەر، دیسان دێ بزاڤێ كەت رێزبەندیا خوە یا شەشێ پارێزیت ژبەركو ئەنجامێ خوسارەتی و سەركەفتنا هەڤڕكێن وێ دێ رێزبەندیێ ژ دەستدەت بتنێ وەكهەڤی و سەركەفتنێ دێ پارێزیت، ژلایێ خوەڤە تیما نەوروز دێ بۆ قەرەبوویا سێ خالێن یارییا بۆری و تۆلڤەكرنێ هێتە دناڤ یاریگەهێ دا، ل حەفتیا بۆری تووشی خوسارەتیێ بوو دگەل حدوود، تیما سلێمانیێ 38 خال یێن كۆمكرین ل رێزا 13ێ دهێت.
سلێمان رەمەزان: دێ شەڕی بۆ ئەنجامەكێ باش كەین
ل دۆر ڤێ یاریێ سلێمان رەمەزان راهێنەرێ تیما دهۆكێ بۆ ئەڤرۆ دیار كر یاریا وان ب سانەهی نابیت بەرانبەر تیمەكێ دناڤ ئەرد و جەماوەرێ خوە دا، لێ وەكو یانەیا دهۆك بۆ هەر یاریەكێ ئەم بەرهەڤیێن باش دگەین و دێ پلانێن رێكخستی هەبن، د ڤێ یاریێ دا دێ بێ بەرهبین ژ شیانێن یاریزانێن خوە محەمەد مەعەن ژبەر كارتا سۆر، هەروەسان پیشەكارێ مە برێنس ئۆبۆكۆ ئەوێ ژبەر كاودانێن خێزانی تیم ب جه هێلایی و هنگاڤتنا نورو سۆلێ، دێ كارتیكرنا خوە هەبیت لێ مە باوەری ب هەمی یاریزانێن خوە هەنە بۆ ئاستەكێ باش نیشان بدەن، پێنەڤێت تیما نەورۆز ژی دێ بۆ سێ خالان كەت لەوما یاری دێ بزەحمەت، ئەم دێ هەمی بزاڤان كەین ب ئەنجامەكێ دلخوەشكەر و گەشبینم دێ یێ باش بیت، لێ ئەڤە تەپا پێی یە دڤێت هەر 90 خولەكان دا نە راوەستیێن گڤاشتنێ و فشارێ ل سەر تیما وان بكەین.
شرۆڤەكارێ وەرزشی یاریێ ب دێربیێ كوردستانێ دبینت
ژلایێ خوەڤە وەحید رەشید شرۆڤەكارێ وەرزشی ل پارێزگەها دهۆكێ گۆت: یاریێن دناڤبەرا یانەیێن كوردستانێ تامەكا تایبەت بۆ جەماوەری و یاریزانان یا هەیی لەوما دبینم ئەڤ یاریە وەكو دێربیەكێ یە و جەماوەر دێ بشێوەكێ جودا پشتەڤانیێ كەن، هەردو تیم د گەڕا بۆری دا سەركەفتن نە ئیناینە لەوما یاری دێ بهێز بیت و دێ هەڤڕكیێ بۆ سێ خالان كەن، نە پشكداریكرنا سێ یاریزانێن سەرەكی یێن یانەیا دهۆكێ دبیت كارتیكرنێ ل سەر پلانێن راهێنەری هەبن لێ راهێنەر یێ شارەزایە دزانیت دێ چەوا جهێ وان هێتە گرتن، ب هیڤییا وێ یەكێ یاریەكا جوان و نیشاندانێن شارستانی یێن جەماوەری ببینن.
رێزبەندیا یانەیان د خولێ دا
ل دووڤ دووماهی رێزبەندیا خولێ هەلوەستێ بڤی رەنگی یە، جەویە ب 62 خالان سەرێ لیستێ دهێت، شورتە ب61 خالان، زەورا ب57خالان، كارەبا51خالان و تەلەبە ب50 خالان رێزێن سێیێ هەتا پێنجێ دهێن، دهۆك ل رێزا شەشێ ب45خالان، هەرسێ یانەیێن نەفت ئەلمیسان، كەرخ و نەجەف ب 42 خالان رێزێن حەفت هەتا نەهێ دهێن، كەربەلا ب41خال، حدود41خال، هەولێر 39خال، نەوروز 38 خال، نەفت ئەلبەسرا ب36 خالان رێزێن 10ێ هەتا 14ێ دهێن، زاخۆ ب 33خالان رێزا 15ێ دهێت، نەفت ئەلوەسەت ب33خالان، ئەلقاسم29خال، نەفت27خال، سیناعە23خال و دیوانیە ب نەه خالان رێزێن 16 هەتا 20 و دووماهیێ دهێن.
