دهۆك دێ بزاڤێ كەت مفای ژ ئەرد و جەماوەرێ خوە وەربگریت
چاڤەڕێ دهێتە كرن ئەڤرۆ ل دەمژمێر حەفتی شەڤ تیما فوتبۆلا یانەیا دهۆك د ناڤ ئەرد و ل پێشچاڤێن جەماوەرێ خوە مێڤاندارییا یانەیا مینا یا بەسرایی بكەت ژ چارچووڤەیێ یاریێن پاشئێخستی یێن تیما دهۆكێ ئەو ژ گەڕا 27ێ هاتییە ڕاوەستاندن ژبەر پشكدارییا تیما دهۆكێ د كۆپا كەنداڤی دا، ئەڤ یارییە بۆ دهۆكییان گرنگە پێخەمەت ڤەگەڕاندنا هێز و ئاستێ تیمێ.
ژبلی سەركەڤتنێ چو بژاردەیێن دی نینن
تیما یانەیا دهۆك ئەوا د نوكە دا ل رێزا شەشێ دهێت ب كۆمكرنا 53 خالان ژ 15 سەركەڤتن، هەشت وەكهەڤی و 10 خوسارەتییان، د بەرانبەر دا تیما مێڤان خودانا 39 خالانە ل رێزا 16ێ دهێت، ئەلهۆیێن چیا ب سەركێشیا ڕاهێنەرێ رۆژهەلاتێ كوردستانێ ئەمیر ئەزرەفشان دڤێت یارییا ئەڤرۆ ب سەركەڤیت ژبۆ ڤەگەڕاندنا هێز و ئاستێ جاران یێ دهۆكێ و ئاشتكرنا جەماوەرێ توورە ل سەر ئەنجامان، لێ دبیت یانەیا مینا ئاستەنگێ بێخیتە د ڕێكا سەركەڤتنا ئەلهۆییان دا ئەوا د ڕێزبەندەیا خراب یا پاشڤەچوونێ بۆ خولا نایاب دێ هەموو بزاڤان كەت ئەنجامەكێ باش ب دەركەڤیت، د دووماهی پێنچ یاریێن دناڤبەرا هەردو یانەیان دا، دهۆكێ نەشیایە سەركەڤتنێ بینت، بەلكو سێ وەكهەڤی و دو خوسارەتی هەبووینە.
بەرپرسێ لەقا سەرەدانا تیما دهۆكێ كر
دناڤا ئێك ژ یەكەیێن ڕاهێنانێ یێن تیما دهۆكێ ل یاریگەها سێیێ یا ڕاهێنانێ دا د. نەوزاد عەبدوللا بەرپرسێ لەقا ئێك یا پارتی دیموكراتی كوردستان سەرەدانا تیما دهۆكێ كر ژ نێزیك بۆ دیتنا دووماهی بەرهەڤیێن تیمێ و بلندكرنا مۆرال یاریزانان و هیڤی خواست بۆ یارییا بەرانبەر مینا هەموو بزاڤان بكەن پێخەمەت بشێن سەركەڤتنێ بینن و دلێ جەماوەرێ خوە خوەشبكەن.
ئەمیر ئەزرفشان گەشبینە دڤێ یاریێ دا ئاست و ئەنجام ڤەگەڕین
د كۆنگرەیەكێ ڕۆژنامەڤانی دا ئەوا پشتی یارییا بەرانبەر نەجەف بۆ دەزگەهێن ڕاگەهاندنێ هاتبوو ئەنجامدان ئەمیر ئەزرەفشان ڕاهێنەرێ تیما یانەیا دهۆك گۆت: بۆ هەر یارییەكێ ئەم بۆ سەركەڤتنێ دكەین، یارییا بەرانبەر ئاست و ئەنجام یێ پێشبینیكری نەبوو، دلگرانم ب ئاستێ تیما خوە هەرچەندە بۆ هەر یارییەكێ ئەم بەرهەڤیێن باش دكەین و دڤێت سەركەڤتنان بینن، یانەیا دهۆك سەنگ و ناڤودەنگێ خوە هەیە.
36 گۆل یاریزانێن دهۆكێ تۆمار كرینە
تیما دهۆكێ خوانا دەهـ یاریزانێن پشكداری د تۆمار كرنا 36 گۆلان دا هەیە سەرجەمێ 37 گۆلان و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، موسیس، زانا عەلی گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
ب دووماهی هاتنا یاریێن گەڕا 35ێ لیستا گشتی یا ڕێزبەندیێ بڤی شێوەیە
1- شورتە 80 خال.
2- زەورا 74 خال.
3- زاخۆ 66 خال.
4- تەلەبە 57 خال.
5- جەوییە 57 خال.
6- دهۆك 53 خال، كێمترییا دو یارییان.
7- ئەلگەرمە 52 خال.
8- نەفت 52 خال.
9- ئەلقاسم 51 خال.
10- نەفت میسان 48 خال.
11- نەورۆز 46 خال.
12- هەولێر 44 خال، كێمترییا یارییەكێ.
13- كارەبا 44 خال.
14- نەجەف 42 خال.
15- كەرخ 40 خال.
16- مینا 39 خال، كێمترییا یارییەكێ.
17- دیالا 37 خال.
18- نەفت ئەلجنوب 29 خال.
19- كەربەلا 22 خال.
20- حدود 20 خال.
