دهۆك دێ بیته مێڤانا سۆران و زاخۆ چاڤه‌ڕێ یه
ئه‌ڤرۆ،
ب ئارمانجا ده‌ستڤه ئینانا سێ خالێن یاریێ دهێته چاڤه‌ڕێكرن ئه‌ڤرۆ ده‌مژمێر دو پشتی نیڤرۆ تیما ته‌پا پێی یا یانا دهۆك یاریا خوه ژ ده‌رڤه‌یی یاریگه‌ها خوه بكه‌ت ده‌مێ دبیته مێڤانا یانا سۆران ژ چارچووڤێ هه‌ڤڕكیێن گه‌ڕا نه‌هێ بۆ یانێن خولا پلا نایابا كوردستانێ، ژلایێ خوه‌ڤه یانا زاخۆ د ڤێ گه‌ڕێ دا یا چاڤه‌ڕێ كری بیت ده‌رئه‌نجامێ خوه‌ڤه‌كێشانا یانا هه‌لۆ ژ وه‌رزێ ئه‌ڤ ساله ژبه‌ر قه‌یرانا دارایی.
كوڕێن دهۆكێ ب 12 خالان رێزا پێنجێ دهێت و یاریا خوه یا گه‌ڕا هه‌شتێ ل گه‌ل نه‌وروز ئه‌نجام نه‌دابوو پشتی ئێكه‌تیا ته‌پا پیێ یا كوردستانێ بڕیارا پاشئێخستنا سێ یاریان دا ژوانا یا دهۆكێ بوو، خودانێن ئه‌ردی یانا سۆران ب نه‌ه خالان رێزا ده‌هێ دهێت و دێ ب پشتبه‌ستن ب جه‌ماوه‌رێ خوه و سه‌ركه‌فتنا یاریا بوری كه‌ت ئه‌وا ل گه‌ل زاخۆ ئه‌نجامدایی و بۆ یاریا ئه‌ڤرۆ گه‌شبینه به‌رده‌وامبیت ل سه‌ر ئه‌نجامێن خوه.
لدور دووماهی به‌رهه‌ڤیێن یانا دهۆكێ سه‌ردار عارف ستێرا تیمێ بۆ رۆژناما ئه‌ڤرۆ گوت: بۆ یاریا ئه‌ڤرۆ ژی ئه‌م به‌رهه‌ڤین و رژدین بیێ خال ژ یاریگه‌ها سۆران نه ڤه‌گه‌ڕیێن، هه‌موو یاریزان د ئاسته‌كێ بلند دانه و بیێ هنگاڤتن و كادرێ راهێنانێ لدووڤ نه‌خشێن رێكخستی پلانێن سه‌ركه‌فتنێ داناینه، هه‌ر تیمه‌كا ئه‌م ل گه‌ل بكه‌ین هه‌موو هزرا بۆ دكه‌ین و دانین تیمه‌كا هه‌ڤڕكا مه، دێ شه‌ڕی كه‌ین هه‌تا دووماهیا فیركا دادڤانی ژبۆ گه‌هاندنا ئارمانجا مه ئه‌وژی بیێ ئه‌نجامه‌كێ باش نه ڤه‌ڕیێن، بهیڤی مه بشێن دلێ جه‌ماوه‌رێ خوه خۆشكه‌ین و سه‌ركه‌ڤین.
