دهۆك دێ دهست پێنگاڤا ئێكێ یا بهرههڤیان كهت
ئهڤرۆ،
چاڤهڕێ دهێته كرن د ڤێ حهفتیێ دا تیما تهپا پێی یا یانا دهۆك دهست ب خرڤهبوون و پێنگاڤا ئێكێ یا بهرههڤیان بۆ وهرزێ نوو و قۆناغا ڤاڤارتنێن دهربازبوونێ بۆ پلا نایابا ئیراقێ بكهت پشتی ئێكهتیا تهپا پێی یا ئیراقێ بڕیار دایی ههردو تیمێن خودانێن رێزێن دویێ یێن كۆما ئێك و دو یا پلا ئێك یاریهكا ڤهبڕ بكهن ژبۆ پلێتا چارهنڤیس و دهربازبوونێ بۆ پلا نایاب ئهوا دێ سهركهفتیێ وان ههمبهری یانا ئهمانهت بهغدا خودانا رێزا 18ێ یا پلا نایاب ل باژێرێ بهغدا كو بڕیاره یاریێن وان ل ئهیلۆنا بهێت دهستپێكێ بكهن.
د داخویانیهكێ دا سلێمان رهمهزان راهێنهرێ نوو یێ تیما تیما تهپا پێی یا یانا دهۆك بۆ رۆژناما ئهڤرۆ گۆت: بڕیاره سێ شهمبیا بهێت خرڤهبوونا یاریزانان بهێته كرن ل یاریگهها دهۆكێ خوه بهرههڤكرن بۆ یاریێن بهێت یێن چارهنڤیس و ئێكلاكهر بهر ب پلا نایابا ئیراقێ، ههرچهنده ههتا نوكه چو گرێبهستێن فهرمی ل كهل چو یاریزانێن نوو نه هاتیه كرن لێ ئهم نوكه د دانوستاندنان داینه ل گهل چهند یاریزانێن باش و د دهمهكێ نێزك دا دێ هێنه راگههاندن پێحهمهت دهست ب پلان و بهرههڤیێن خوه بۆ یاریێن داهاتی.
ژلایهكێ دووڤه ناڤهاتی دیاركر دهم پێ دڤێت ههتا تیمهكا رێكخستی بهێته لێگدان و گۆت: ژبهركو رێژا مهزن یا یاریزانێن وهرزێ بوری مه نهماینه لهورا دێ دهم پێ بڤێت ههتا تیمهكا رێكخستی بهرههڤ بكهین و بهێته لێگدان ژبهركو دێ ژ خالا دهستپێكی كار بۆ كهین و چێكرنا تیمێ ژی ب سانههی نابیت لێ رژدین ل گهل پشتهڤانیا كارگێریێ كو باشترین شێوه تیما دهۆكێ بهرههڤ بكهین و بۆ پلێتا دهربازبوونێ باشترین بهرههڤیان بكهین.
دهێته زانین ل حهفتیا بوری و ب فهرمی كارگێریا یانا دهۆكێ كادرێ راهێنانێ یێ تیما خوه یا تهپا پێی بۆ وهرزێ نوو و یاریێن چارهنڤیس و ئێكلاكهر بۆ پلا نایاب دهست نیشانكربوون ئهوژی پێكهاتی بوو ژ سلێمان رهمهزان راهێنهری، ئهحمهد جودهیع و هومام سالح هاریكارێن وی، یێ بهرازیلی مارسێلۆ راهێنهرێ چهستهیی و حسێن جهبار راهێنهرێ گۆلپارێزان، بۆ زانین دهۆك دێ یاریا ئێكێ و ڤهبر ل گهل ناسریه كهت و سهركهفتیێ وان دێ ههمبهری ئهمانهت بهغدا بیت بۆ پلێتا دهربازبوو بۆ پلا نایابا ئیراقێ.
