دهۆك دێ نەجەف مێڤان كەت و زاخۆ و هەولێر د دێربیەكێ ئاگرین دا
قەیس وەیس:
بڕیارە سوبەهی پێنج شەمبی، ئەینی و شەمبییا بهێت هەڤڕكیێن گەڕا پێنجێ ژ خولا ستێرێن ئیراقێ یا تەپا پێی ب ئەنجامدانا دەهـ یارییان ئەوا بۆ ماوەیێ دەهـ رۆژ بوو هاتییە پاشئێخستن، ژبەر پشكداریێن هەلبژارتیێ ئیراقێ یێن ئۆلمپی، نشتیمانی و لاوان بۆ ڤاڤارتنێن مۆندیالا جیهانی 2026 و كۆپا ئاسیا و یاریێن هەڤالینی.
ب پشتگەرمییا جەماوەری دهۆك گەشبینە بۆ سەركەفتنێ
ل رۆژا ئەینییا بهێت ل دەمژمێر حەفت شەڤێ جەماوەرێ یانەیا دهۆك چاڤەڕێ یارییەكا ب هێزە دەمێ تیما وان بەرانبەر یانەیا نەجەف، ئەلهۆیێن چیا ب هەشت خالان ژ دو سەركەفتن و دو وەكهەڤییان رێزا سێیێ دهێت، نەجەف ب پێنج خالان رێزا 12ێ دهێت، راوەستیانا خولێ وێستگەهەكا باش بۆ هەردو یانەیان دانابوو تایبەت یانەیا دهۆك ئەوا د ماوەیێ خولێ دا یاریزانێن وێ تووشی وەستیانا جەستەیی و هنگاڤتنێن سڤك هەبووینە ل دووڤ داخویانیێن بەرپرسێن تیمێ دبیت هەمی هاتبنە چارەسەكرن، لێ بەرانبەردا یانەیا نەجەف ژی یا داخوازكرییە بۆ ڤەگەڕیانێ و دێ شەڕی هەتا دووماهی چركە بۆ خالێن یاریێ كەت، د دیرۆكا یاریێن د ناڤبەرا هەردو تیمان دا دهۆكێ حەفت سەركەفتن و هەشت خوسارەتی و سێ وەكهەڤی ئیناینە، ژ یاریێن دی یێن رۆژا ئەینی تیما یانەیا نەورۆز دێ ل باژێرێ بەغدا بیتە مێڤانا یانەیا ئەمانەت بەغدا، نەورۆز ب چار خالان رێزا16ێ دهێت و مێڤاندارا وێ ژی چار خال هەنە رێزا 14ێ دهێت.
یارییا هەولێر و زاخۆ ب تاما دێربیێ كوردستانی یە
ژلایێ خوەڤە تیما یانەیا زاخۆ دێ ل هەولێرا پایتەخت بیتە مێڤانا یانەیا هەولێرێ ب تاما دێربیێ كوردستانێ دا ئەوا دێ ل شەمبییا بهێت دەمژمێر حەفتی شەڤ یاریگەها شەهید فرانسۆ حەریری مێڤاندارییا وێ كەت كو دبیتە دیدارا وان یا 31 د دیرۆكا خولا ئیراقێ دا، زاخۆ ب سەرپەرشتییا راهێنەرێ خوە یێ قەتەری تەلال ئەلبلۆشی دەستپێكەكا خراب ئینایە ئەوا ب سێ خالان رێزا 18ێ دهێت ژ سێ وەكهەڤی و خوسارەتیەكێ، راوەستیانا خولێ د بەرژوەندییا راهێنەرێ وێ دا بوو ژبۆ چارەسەركرنا كێماسیێن تیمێ، ژلایێ خوەڤە تیما هەولێرێ ژی ئاست و ئەنجامێن لاواز هەبووینە ئەوا چار خال كۆمكرین رێزا17ێ دهێت سەركەفتن و وەكهەڤیەكێ ئینایی.
ژ یاریێن دی ل رۆژا پێنج شەمبی، جەوییە- شورتە، زەورا- نەفت ئەلوەسەت، مینا- ئەلقاسم، رۆژا ئەینی، نەفت بەسرا- نەفت میسان، تەلەبە- كارەبا، رۆژا شەمبی، كەربەلا- حدوود، كەرخ- نەفت.
هەلوەستێ گشتی یێ رێزبەنییا خولێ، جەوییە سەرێ لیستێ دهێت ب 12 خال، شورتە نەهـ خال، دهۆك هەشت خال، هەرئێك ژ زەورا، حدود، ئەلقاسم ب حەفت خالان رێزێن دویێ هەتا شەشێ دهێن، هەر ئێك ژ كەربەلا، نەفت ئەلبەسرا، كارەبا، نەفت، نەفت میسان ، نەجەف پێنج خالان رێزێن حەفتێ هەتا12ێ دهێن، هەر ئێك ژ تەلەبە، ئەمانەت بەغدا، كەرخ، نەورۆز، هەولێر ب چار خالان رێزێن 13ێ هەتا 17ێ لدووڤ ئێن دهێت، زاخۆ سێ خالان رێزا18ێ، نەفت ئەلوەسەت دو خالان و مینا ب ئێك خال رێزێن 19 و دووماهیێ دهێن.
