دهۆك دێ پشكداریێ د فیستەڤالا شانۆیا ئیراقێ یا گەنجان دا كەت
بریارە ب پشتەڤانیا رێڤەبەریا گشتی یا رەوشەبیری و هونەر یا دهۆكێ، باژێرێ دهۆكێ پشكداریێ ب شانۆیەكێ د فیستەڤالا شانۆیا ئیراقێ یا گەنجان دا بكەت كو ل بەرە ل باژێرێ نەجەف بهێتە گێران.
كاروان سلۆ، هاریكارێ دەرهێنەر و رێڤەبەرێ شانۆیێ بۆ رۆژناما ئەڤرۆ خویا كر كو ئەو دێ شانۆیەكێ ب ناڤونیشانێ (هۆشێن تەڕمەكی) ژ دەقێ (ل بەندا گۆدۆی) یێ نڤیسەرێ ئیرلەندی (سامۆێل بێكێت) هاتیە وەرگرتن، كو ژ دەرهێنانا (سەرحان ئەحمەد) یە، دێ پشكداری فیستەڤالێ بن كو ل بەرە ل 20 ڤێ هەیڤێ بهێتە گێران، هەروەسا دیاركر كو پشتی ئەڤ شانۆیە ل سالا بۆری پشكداری گەڕا سێیێ یا فیستەڤالا شانۆیێ ل كەركووك بووی و شیا بەربژاری هەر سێ خەلاتێن (باشترین بەرهەم ـ باشترین دەرهێنەر ـ شانۆكارێ ئایندە) بیت، و خەلاتێ (باشترین سینۆگرافیا) ب دەستخوەڤە ئینایی، دیسا پشكداری فیستەڤالا یەكتا بووی.
كاروان سلۆی گۆت كو ئەو د نوكە دا دێ پشكداریێ د فیستەڤالا شانۆیا ئیراقێ یا گەنجان بن كو جارا ئێكێ یە باژێرێ دهۆكێ دێ پشكداری ڤێ فیستەڤالێ بیت.
