دهۆك دێ پێنگاڤا ئێكێ بۆ هیڤیێن مه‌زن هاڤێژیت
ئه‌ڤرۆ، زنار زوبیر:
ژبۆ ب ده‌ستڤه ئینانا ئارمانجا خوه تیما ته‌پا پێی یا یانا دهۆك دێ ل ئه‌ینیا بهێت پێنگاڤا خوه یا ئێكێ و هیڤیێن مه‌زن بۆ پلا نایاب هاڤێژیت ده‌مێ ل یاریگه‌ها خوه و دناڤ جه‌ماوه‌رێ خوه دا مێڤانداریا یانا عه‌فك بكه‌ت ژ چارچووڤێ هه‌ڤڕكیێن گه‌ڕا ئێكێ و ده‌ستپێكا وه‌رزێ نوو یێ خولا پلا ئێكا عیراقێ.
عادل ناسر راهێنه‌رێ دهۆكێ بۆ رۆژناما ئه‌ڤرۆ گوت: به‌رهه‌ڤی گه‌هشتینه ئاسته‌كێ باش و رژدبوون ل ده‌ڤ یاریزانان په‌یدابوویه ژلایێ جه‌سته‌یی و هونه‌ری و ده‌رونی بۆ ده‌ستپێكه‌كا باش یا ئارمانجێن مه یێن مه‌زن ئه‌وژی ڤه‌گه‌ڕیان بۆ پلا نایاب، هه‌رچه‌نده كاروانێ مه یێ درێژه و تیمێن هه‌ڤڕك دناڤ كۆمێ دانه لێ گه‌شبینم دێ گه‌هینه ئارمانجا خوه.
بۆ زانین وه‌رزێ نوو یێ خولا پلا ئێكا عیراقێ دێ پشكداریا 24 یانا و هاتینه به‌لاڤكرن ل سه‌ر دو كۆما یاریێن وان دێ ب شێوێ خول دو قۆناغ هێنه كرن، هه‌ر كۆمه‌كێ ئێك یانه ئێكسه‌ر ده‌ربازبته پلا نایاب و تیما سێیێ دێ هه‌مبه‌ر تیما 18ێ یا پلا نایاب بیت ژبۆ پلێتا سێیێ یا خولا نایاب، كۆما دهۆكێ پێكهاتیه ژ یانێن، عه‌فك، رومادی، حدوود، سلیخ، كۆفه، مه‌سافی ئه‌لجنوب، دیفاع ئه‌لمه‌ده‌نی، میسان، عه‌له‌م، مرور و سوق ئه‌لشیوخ.
