دهۆك د ئەركەكێ ب زەحمەت دایە و هەولێر گەشبینە ژ ئاستەنگا نەفتێ دەرباز بیت
ئەڤرۆ
بڕیارە سوبەهی و دوزبە حەفت یاری ژ هەڤڕكیێن قۆناغا 16 یا كۆپا ئیراقێ یا تەپا پێی بهێنە ئەنجامدان، ل ئەینیا بهێت دەمژمێر 9:30 شەڤ هەردو یانەیێن كوردستانێ دهۆك و هەولێر دێ یاریێن دناڤ یاریگەه و جەماوەرێن خوە ئەنجامدەن، فێدراسیۆنا تەپا پێی یا ئیراقێ بڕیار دایە یاریا جەویە و شورتە بۆ دەمەكێ بهێتە پاشئێخشتن ژبەر پشكداریا شورتە د قارەمانیا عەرەبی دا.
– دهۆك دێ شەڕێ دەربازبوونێ كەت
ل یاریگەها خوە تیما یانەیا دهۆك دێ مێڤانداریا یانەیا تەلەبە یا بەغدایی كەت ئێك ژ یانەیێن هەڤڕك بۆ ناسناڤێ كۆپایێ، یاری بۆ ئەلهۆیێن چیا ب سانەهی نابیت ژبەر كو دێ بەرانبەر تیمەكێ بیت ب رێزبەندیا خولێ و یاریزانێن بەردەست باشترە ژ دهۆكێ لێ د ناڤ ئەرد و جەماوەرێ خوە دا دێ شەڕێ دەربازبوونێ كەت و بزاڤێن پێنگاڤەكا باش بۆ كۆپایێ هاڤێژیت، ل دووڤ داخویانیێن بەرپرسێن وێ تەلەبە دێ رژدیێ ل سەر ناسناڤێ كۆپایێ دكەت لەوما دێ ب هەموو هێز و چەكێ خوە هێنە دناڤ یاریگەهێ دا.
– دیدارێن دناڤبەرا هەردو یانەیان دا
ل دووڤ ئامارێن بەردەستێ رۆژناما ئەڤرۆ هەردو یانە 22 جاران بەرانبەر ئێك بووینە د خول و كۆپا ئیراقێ دا، هەشت سەركەفتن بۆ دهۆكێ و هەشت بۆ تەلەبە بەرانبەری شەش وەكهەڤیان، مەزنترین خوسارەتیا دهۆكێ ل مەها ئەیارا 2002 ب شەش گۆلان بێ بەرانبەر بوو.
– سلێمان رەمەزان ب هیڤییە هەتا دووماهیێ نە راوەستیێن
راهێنەر سلێمان رەمەزان بۆ رۆژناما ئەڤرۆ دیاركر یاریا وان ب سانەهی نابیت لێ ئەوان ژی ئارمانجێن دوور هەنە و یا د شیان دابیت دێ ب چەكێ خوە و پلان شەڕی بۆ سەركەفتنێ كەن و گۆت: گەشبینن ب پشتگەرمیا جەماوەرێ خوە ئەو هیڤیێن مە هەین هەتا دووماهیێ نە راوەستیێن.
– باشترین ئەنجامێ دهۆكێ د كۆپایێ دا
باشترین ئەنجامێ تیما دهۆكێ د كۆپا ئیراقێ دا ل وەرزێ 2015-2016 بوو دەمێ گەهشتیە قۆناغا پێش دووماهیێ، د قۆناغا16ێ هاتە هژمارتن سەركەفتی ل سەر كارەبا ب3-0، ل قۆناغا هەشتێ سەركەفت ل سەر نەفت ب2-1گۆلان، د قۆناغا چارێك دووماهیێ دا ب گۆلەكێ سەركەفتن ل سەر ختوت ئینا و دەربازبوو یاریا پێش دووماهیێ، دڤێ قۆناغێ دا هیڤیێن وێ ب غەدر راوەستیان، پشتی دو یاری دگەل یانەیا جەویە یا بەغدایی كرن، د یاریا ئێكێ دا ئەوا ل یاریگەها دهۆكێ هاتیە كرن ئەلهۆیێن چیا ب چار گۆلان بەرانبەر گۆلەكێ سەركەفتن ئینابوو، لێ د یاریا دویێ دا ب سیناریۆیا ترسێ و گەڤان ئەوا ژلایێ یانەیا جەویە و جەماوەر و یاریزانێن وێ دژی دهۆكێ ب كارئیناین و هەتا دەمێ یاریێ دا شیان ب سێ گۆلان بێ بەرامبەر گۆلەكێ سەركەفتنێ بینت و دەربازبیتە یاریا دووماهیێ.
– هەولێر ب مۆرالا خولێ دێ بەرانبەری نەفت وەسەت بیت
ژلایێ خوەڤە تیما یانەیا هەولێر دێ ل یاریگەها خوە شەهید فرانسۆ حەریری مێڤانداریا تیما نەفت وەسەت كەت، یانەیا دویێ یا كوردستانی ب مۆرالا بلند یا خولێ دێ هێتە دناڤ یاریێ دا پشتی هاتنا راهێنەر عەباس عوبێد ئەنجامێن باش دەستڤە ئینایە.
ژ یاریێن دی، سوبەهی پێنچ شەمبی ئەمانەت بەغدا-كەرخ، حدوود- شرگات، نەفت میسان- كەربلا، رۆژا ئەینی، زەورا- نەفت بەسرا، بەحری مەسافی.
