دهۆك د دیدارەكا ئاگرین دا دێ بزاڤێن تۆلڤەكرنێ كەت
چاڤەڕێ دهێتە كرن ئەڤرۆ دو یاری ژ گەڕا 35ێ یا هەڤڕكیێن خولا ئیراقێ بۆ یانەیێن پلا نایابا تەپا پێی بهێنە ئەنجلمدان، ل یاریگەها خوە تیما یانەیا دهۆك دێ مێڤانداریا یانەیا كارەبا یا بەغدایی دكەت ئێك ژ دیدارێن ئاگرین و تۆلڤەكرنێ بۆ ئەلهۆیێن چیا، یاریا دویێ دێ دناڤبەرا یانەیا تەلەبە و سیناعە دا هێتە كرن.
ئەلهۆیێن چیا پێدڤی ب سێ خالێن یاریێ هەنە
پشتی د گەڕا بۆری دا د ناڤ ئەرد و جەماوەرێ خوە دا تیما تەپا پێی یا یانەیا دهۆك نە شیایی سەركەفتنا خوە ب پارێزیت و دیاریا جەژنێ بدەتە جەماوەرێ خوە دەمێ دگەل یانەیا كەربەلا ب گۆلەكێ وەكهەڤبوویی، بڕیارە ئەڤرۆ ل دەمژمێرحەفت ئێڤاری ئەلهۆیێن چیا ب دروشمێ تۆلڤەكرن و قەرەبوویا خالێن یاریا بۆری بهێتە د ناڤ یاریگەهێ دا و پشت گەرمیا پشتەڤانێن خوە بزاڤێن سەركەفتنێ بەرانبەر یانەیا كارەبا بكەت ئێك ژ تیمێن بوویە ئاستەنگا هەمی یانەیان و وەكو هەسپێ رەش خوە د خولێ دا دیاركری ئەوا ب سەركێشیا راهێنەرێ خوە یێ گەنج لوەئی سەلاح هەتا نوكە ب كۆمكرنا 58 خالان رێزا چارێ دهێت ژ 16 سەركەفتن و 10 وەكهەڤیان، ئێك ژ وان سەركەفتنا ل سەر یانەیا دهۆكێ ئینابوو د قۆناغا ئێكێ دا دەمێ ل باژێرێ بەغدا دهۆك ب سێ گۆلێن پاقژ تووشی خوسارەتیێ كری، لێ بۆ ڤێ یاریێ تیما دهۆك یا ب سەركێشیا راهێنەرێ پارێزگەهێ سلێمان رەمەزن پشتی بۆرینا 34 یاریان ب47 خالان رێزا نەهێ دهێت ژ11 سەركەفتن و 14 وەكهەڤییا دێ بزاڤێن تۆلڤەكرنێ و قەرەبوویا خالێن یاریا بۆری ژی كەت، هەرچەندە تیما مێڤان پاریەكێ ب سانەهی نابیت و دبیت خوە ب ئاستەنگ نیشا خودانێن ئەردی ب دەت.
راهێنەرێ دهۆكێ چ دبێژیت!
ل دۆر دووماهی بەرهەڤیێن تیما دهۆكێ بۆ یاریا ئەڤرۆ راهێنەر سلێمان رەمەزان بۆ رۆژنامەیا ئەڤرۆ گۆت: پێنەڤێت یاری ب سانەهی نابیت بەرانبەر تیمەكێ بوویە ئێك هەڤڕكێن یانەیێن د پێشییا لیستێ دا، بۆ ڤێ یاریێ پێدڤی ب پشتەڤانیا جەماوەرێ خوە ینە، پێنەڤێت پلانێن مە بۆ سەركەفتنێ نە، هەرچەندە ژ بەر هنگافتنێ دو باشترین یاریزانێن مە پشكدار نابن سیابەند عەگید ژبەر هنگافتنێ و رێوان ئەمین ژبەر سێ كارتێن زەرد، لێ یا دشیان دا بیت وەكو تیم ب گیانێ كۆم دێ بزاڤێن سێ خالان بیت.
رێزبەندیا خولێ چەوایە؟
پشتی ب دووماهی هاتنا یاریێن گەڕا 34ێ ژ خولا پلا نایابا ئیراقێ هەلوەستێ گشتی یێ یانەیان بڤی رەنگی بوون، شورتە سەرێ لیستێ پاراستیە ب73 خالان، جەویە 66 خالان رێزا دویێ دهێت، زەورا ب60خال، كارەبا 58خال، تەلەبە 56 خال، نەجەف 52خال، كەرخ ب47 خال، رێزێن سێیێ هەتا هەشتێ دهێن، تیما دهۆكێ ب47 خالان رێزا نەهێ دهێت، هەر ئێك ژ نەفت میسان ب47 خال، كەربەلا 46 خال، نەورۆز ب45 خال و حدوود ب43ێ خالان رێزێن دەهێ هەتا 13ێ دهێن، تیما زاخۆ پێشڤە هاتە رێزا 14ێ ب40 خالان، نەفت ئەلبەسرا ب38 خالان، نەفت ئەلوەسەت 36خال، ئەلقاسم 34 خال، نەفت ب32 خالان، سیناعە ب 27 خالان و دیوانیە ب12 خالان رێزێن 15ێ هەتا 20ێ و دووماهیێ دهێن.
