دهۆك و جەوییە د كۆپیتكا یاریێن ڤێ حەفتیێ دا
ئەڤرۆ
قەیس وەیس:
دهێتە چاڤەڕێكرن ئەڤرۆ شەش یاریێن مایی ژ گەڕا 26ێ یا خولا پلا نایابا ئیراقێ یا تەپا پێی بهێنە ئەنجامدان، یانەیا دهۆك د كۆپیتكا یاریێن ڤێ حەفتیێ دا بیتە مێڤانا جەویە، ژلایێ خوەڤە یانەیا هەولێر د یاریەكا ب سانەهی دا دیوانیە مێڤان كەت.
• ئەلهۆیێن چیا د تاقیكرنەكا ب هێز دا یە
ئەڤرۆ دەمژمێر چارێ ئێڤاری تیما یانەیا دهۆك ل یاریگەها شەعب باژێرێ بەغدا دێ بیتە مێڤانا یانەیا جەویە د یاریەكا بهێز و كۆپیتكا یاریێن ڤێ حەفتیێ دا، ئەلهۆیێن چیا د نوكە دا 36 خال ژ نەه سەركەفتن، نەه وەكهەڤی كۆمكرینە و رێزا نەهێ دهێت، دهێتە زانین ئەڤە بۆ ماوەیێ چار حەفتیە تام نەكریە سەركەفتنان و رێزبەندیا خوە یا شەشێ ژ دەست دایە، لەوما دێ هەموو بزاڤا كەت خوە ژ ئاستەنگا جەویە قۆرتالكەت و ڤەگەڕێتە رێزێن پێشیێ، ژلایێ خوەڤە تیما جەویە هەڤڕكا سەرەكی یا دەستڤە ئینانا ناسناڤێ خولێ یە، ئەوا 51 خال كۆمكرین و سەرێ لیستێ دهێت، هەرچەندە د یاریا ئەڤرۆ دا ژبەر سزایێن ئێكەتیا تەپا پێی یا ئیراقێ جەماوەر دناڤ یاریگەهێ دا ئامادە نابیت زێدەباری دوورئێخستنا ستێرێ وێ ئیبراهیم بایش و چار یاریزانێن دی ژبەر ئەگەرێن جۆدا، راهێنەرێ دهۆكێ سلێمان رەمەزان دێ ب چەكێ خوە یێ بەردەست بزاڤێن سەركەفتنێ و لادانا ئەوان گڤاشتنێن ل سەر هەین كەت، هەرچەندە د یاریا بۆری دا بەرانبەر تەلەبە دەست ژ كاركێشانا خوە پێشكێشی كارگێریێ كربوو، لێ نە هاتە قەبوولكرن.
• هەولێر بەرانبەر دەلیڤەیا سەركەفتنێ یە
ژلایێ خوەڤە یانەیا هەولێر ل یاریگەها خوە شەهید فرانسۆ حەریری دێ ل دەمژمێر 6:30 شەڤ مێڤانداریا یانەیا دیوانیە كەت، تیما كوردستانی 32 خال كۆمكرینە رێزا 13ێ دهێت بەرانبەر دەلیڤەكا باش یا دەستڤە ئینانا سێ خالان ژبەركو تیما مێڤان سەرجەمێ 25 یاریان بتنێ ئێك سەركەفتن هەیە حەفت خال كۆمكرینە رێزا 20ێ و دووماهیێ دهێت ئانكو چارەنڤیسێ وێ بۆ پاشڤە چوونا پلا ئێك تا رادەیەكێ مەزن ئێكلابوویە لێ د هەر یاریەكێ دا كاودانێن خوە هەنە و دوور نینە سۆپرایزەكێ ژی بینت.
ژ یاریێن دی یێن ئەڤرۆ، تەلەبە و شورتە د یاریەكا دی یا ئاگرین دا، نەفت ئەلبەسرا- حدوود، نەفت میسان- كەرخ، نەفت وەسەت- نەفت.
