دهۆك و زاخۆ، هەلبژارتنا ڕاهێنەران یا فەرە
ئیحسان حەسەن
دیارە لڤان رۆژان زۆربەی یانەیێن ئیراقێ یێن هەموو شیانێن خوە دئێخنە كار بۆ هندێ گرێبەستێن خوە دگەل یاریزان و راهێنەران بداوی بینن، دەست ب كەمپێن خوە یێن خوە بەرهەڤكرنێ بكەن، بەری دەستپێكرنا خولا ستێرێن ئیراقێ یا فوتبۆلێ، هەر چەندە شەش یانە پشتی ماوەیەكێ دی یێ كێم دێ كەڤنە دناڤا هەڤڕكیێن كۆپا سۆپەرا ئیراقێ دا، كو تێدا هەر دو نوونەرێن كوردستانێ و پارێزگەها دهۆكێ، یانەیێن دهۆك و زاخۆ دێ هەڤڕكییێ ژبۆ بدەستڤەبرنا ڤی ناسناڤی بۆ جارا ئێكێ د دیرۆكا خوە دا كەن، چونكو كەمپێن ڕاهێنانێ خالا ئێكێ یا خوە بەرهەڤكرنێ یە بۆ وەرزێ نوو كو تێدا دەستەكا ڕاهێنانێ هەلسەنگاندنەكا تمام بۆ یاریزانێن خوە ژلایێ بلندبوونا شیانێن وان یێن جەستەیی و یێن تەكنیكی برێكا تاقیكرنێن جودا بكەت، دیسان هەلسەنگاندنا ئاستێ راستەقینە یێن تیما خوە بەری بكەڤیتە د ناڤا هەڤركییان دا بكەت، ب تایبەت ئەگەر ئەم بزانین كو هەردو یانەیێن مە ئەو دەرفەت نینە رێكخستنا كەمپەكێ راهێنانێ چ ل نافخو یان دەرڤەی وەلاتی بكەن، لێ هەتا بەری نڤێسینا ڤی بابەتی، تشتێ سەیر ئەوە هەر دو یانەیێن مە یێن پارێزگەهێ پشتی ژ دەستدانا ڕاهێنەرێن خوە یێن وەرزێ بوری، ب فەرمی گرێبەست دگەل دەستەكا نوو یا راهێنانێ نەكرینە، ئەوێن كو پێدڤییە سەرپەرشتییێ لسەر تیمێ بۆ وەرزێ نوو یێ خولێ بكەن، هەتا نها ناڤێ راهێنەران ژی ئاشكرا نەكرینە ژبلی دەنگۆیێن پەیوەندییا زاخۆ ب ڕاهێنەرەكێ قەتەری، یا دروست ژی ئەبوو ئەڤ پێنگاڤە بەری هەموویان هاتبا هاڤێتن، دا باشتر بیت ئەگەر راهێنەرێن خوە زوو دەستنیشانكربان، هەتا بووچوونێن وان ژی وەرگرتبان لسەر كێماسی و پێدڤیێن تیمێ، ژبەر كو ئەو پتری هەموویان دزانین كا تیم پێدڤی ب كیژ جۆرێ یاریزانانە، ل كیژ هێلێ كێماسی لێ هەیە، ب تایبەت ئەو یاریزانین یێن كو پێدڤییە لسەر وان گورانكاریەكی د ئاست و ئەنجامێن تیمێ دا پەیدابكەن، ژبەر كو ئینانا زۆربەی یاریزانان بەری راهێنەری، دبیت وی نەئێخیتە لبەر بەرپرسیارەتیێن مەزن، ب تایبەت ئەگەر ئەنجام بەرۆڤاژی هیڤیێن كارگێریێ و جەماوەری هاتن، هەمی دەما دشێت بێژیت، ئەز بەرپرس نینم ژ ڤان ئەنجامان، چونكو یاریزانین نوو هەلبژارتنێن من نەبووینە، ژبەر كو تیمێن مە هژمارەكا گورانكاریان دپێكهاتیێن خوە دا كرینە، راهێنەر پێدڤی ب دەمی یە داكو بشێت كونجاندنێ دناڤ رێزێن تیمێ دا پەیدابكەت، پلان و تەكتیكا خوە لسەر ئاڤا بكەت، یا من دڤێت بێژم چونكو دەم یێ كێمە باشتر ئەوە هەر دوو تیمێن پارێزگەهێ، خوە نە ئێخینە لبن گڤاشتنێ و تنێ كار لسەر بلندبوونا زاخا یاریزانین خوە یێن بەری و یێن نوو بكەن، ئەڤ كۆپە بلا ببیتە باشترین بەرهەڤی بۆ وەرزێ نوو، بەلێ هەر دێ مینیت، لەزكرن د ئینانا دەستەكەكا نوو یا راهێنانێ كو ژهەژی ناڤێ هەر دوو یانەیێن مە بیت، مفا وەرگرتن ژ شاشیێن وەرزێ بوری، خالا هەرا گرنگ و بهێز ژبۆ بجهئینانا ئارمانجان و پشكداریەكا سەرفەراز د خول و قارەمانیێن پاشەرۆژێ دا.
