دهۆك و زاخۆ، هەولێر و نەورۆز چاڤ ل سەركەڤتنانە ژ بۆ باشتركرنا هەلوەستێ خوە
قەیس وەیس:
بڕیارە سوبەهی دەست ب هەڤڕكیێن گەڕا 19 یا خولا ستێرێن ئیراقێ یا فوتبۆلێ ب ئەنجامدانا سێ یاریێن گرنگ بهێنە كرن، ئەوا دێ یاریێن وان هەتا ئێكشەمبییا بهێت بەردەوامبن.
دهۆك بەرانبەر ئاستەنگا ئەلغراف
جەماوەرێ وەرزشی یێ یانەیا دهۆك ب ژڤانن سوبەهی ئەینی ل دەمژمێر نەهی شەڤ ژبۆ دیتنا یارییا تیما خوە بەرانبەر خودانێن ئەرد یانەیا ئەلغراف ئەوا دێ ل یاریگەها ناسریە هێتە كرن، ئەلهۆیێن چیا پشتی دو یاریێن بۆری یێن ئاست وئەنجامێن نە چیگیر دێ بزاڤێ كەت دڤێ یاریێ دا ڤەگەڕێتە سەركەڤتنان ئەوا هەتا د ڕێزبەندییا نەهێ دا ب 27 خالان ژ حەفت سەركەڤتن، شەش وەكهەڤی و پێنچ خوسارەتی هەنە، د بەرانبەر دا یانەیا ئەلغراف ب كێمترییا ئێك خال ل ڕێزا 11ێ دهێت.
زاخۆ چاڤ ل سەركەڤتنێ یە
ژلایێ خوە تیما یانەیا زاخۆ دێ ئێكشەمبییا بهێت یارییا خوە یا ڤێ گەڕێ دناڤ ئەرد و جەماوەرێ خوە دا كەت و چاڤ ل سەركەڤتنێ یە، كوڕێن خابووری 30 خال كۆمكریمە ل ڕێزا حەفتێَ دهێت ژ ڤەڕێشا هەشت سەركەڤتنان، شەش وەكهەڤی و چار خوسارەتی هەنە، دڤێ یاریێ دا ئەوا دێ بیتە پێنگاڤا ئێكێ دناڤ ئەردێ خوە دا ڕاهێنەرێ وێ ئەیوب ئۆدیشۆ گەشبینە خەلاتەكی بدەتە جەماوەرێ زاخۆ، دبەرانبەر یانەیا نەفت پاریەكێ ب سانەهی نابیت ئەوا 21 خال هەین دێ ژ بەغدا بۆ سەركەڤتنێ هێتە دناڤ یاریگەهێ دا، بڕیارە ئەڤ یاریە ل دەمژمێر نەهی شەڤ بهێتە كرن.
هەولێر د ئەركەكێ ب سانەهی دا
ژلایەكێ دووڤە یانەیا هەولێر ل باژێرێ نەجەف دێ ل شەمبییا بهێت بیتە مێڤانا یانەیا ئەلقاسم كو دهێتە هژمارتن ئەركەكێ ب سانەهی یە بۆ كوڕێن كەلهە ومنارە، ئەوا دێ دەمژمێر نەهی شەڤ هێتە كرن، تیما پایتەختێ كوردستانی ل ڕێزا چارێ دهێت ب كۆمكرنا 35 خالان ژ 10 سەركەڤتن، پێنج وەكهەڤی و سێ خوسارەتیان، ژلایێ خوەڤە یانەیا ئەلقاسم ل دووماهییا ڕێزبەندیێ دهێت یا 20ێ یە ب تنێ دو خال كۆمكرینە.
نەورۆز و نەجەف شەڕەكێ دی یە
ژلایەكێ دووڤە سوبەهی ئەینی ل دەمژمێر نەهێ شەڤێ تیما یانەیا نەورۆز د ناڤ ئەرد و ل پێشجاڤێن جەماوەرێ خوە دێ مێڤاندارییا یانەیا نەجەف كەت، تیما كوردستانی 19 خال كۆمكرینە ل ڕێزا 15ێ دهێت ژ شەش سەركەڤتن، ئێك وەكهەڤی و11 خوسارەتی، ژلایێ خوەڤە یانەیا نەجەف ل ڕێزا 19ێ و پێش دووماهیێ دهێت ب هەشت خال.
كۆنگرەیێ رۆژنامەڤانی
عەبدلغەنی شەهەد ڕاهێنەرێ دهۆكێ دیاركر ئەو یێن هاتینە ناسریە بۆ ب دەستڤە ئینانا ئەنجامەكێ باش لێ د هەمان دەمدا هیچ كێماتییەكێ بۆ تیما مێڤان نا دانن و گۆت: یاری ب سانەهی نابیت و دێ بهێز بیت، تیما مە ژی یا بەرهەڤە ب هیڤی نە بۆ سەركەڤتنێ،
ژلایێ خوەڤە بۆ یارییا زاخۆ و نەفتێ ئەیۆب عۆدیشۆ ڕاهێنەرێ زاخۆ گۆت: راستە یاری د ناڤ ئەرد و جەماوەرێ مەیە و ئەڤە ژی خالەكا گرنگە بۆ باشتركرنا ئاستێ تیمێ، لێ ژبەركو بەری چار رۆژە مە یارییەكا مەزن د كۆپا كەنداڤی دا كربوو، نەچاربووین ب پلانەكا تایبەت یاریێ بكەین، لێ بۆ ڤێ یاریێ ژی دڤێت پلانەكا دی بوو هەبیت، هەموو یاریزان بەرهەڤن، مە پشتەڤانێن دلسۆز و حەزژێكەرێن یانەیا خوە هەنە گەشبینن بەردەوامیێ بدەینە ئەنجامێن سەركەڤتی.
وەحید رەشید شرۆڤەكارێ وەرزشی ل پارێزگەها دهۆكێ دیار كر یاریێن ڤێ حەفتیێ بۆ هەر چار یانەیێن كوردستانی ب زەحمەتن دبیت وەكو هەلسەنگاندنا یاریێن بۆری یارییا هەولێر یا ب سانەهی بیت بەرانبەر یانەیا ئەلقاسم، لێ ئەڤێ یانەیێ گوهۆڕین یێن دناڤ پێكهاتیێ خوە دا كرین.
یارییا دهۆك بەرانبەر ئەلغراقە دێ بزەحمەت بیت و دبیت یاریزانێن وێ گەلەك وەستیانێ ببینن، لێ ژبەركو د یاریێن بۆری دا ئەو ئاستێ چاڤەڕێ كری نیشان نەدابوو، لێ بۆ ڤێ یاریێ وهەكە هارۆن 100% یێ بەرهەڤ بیت دێ دهۆك شێت جێوازیەكا باش پەیداكەت و پتر خوە گەینتە گۆلا مێڤانان، دهۆك پێدڤی ب سەركەڤتنێ یە ژبۆ قەرەبوویا خالێن یاریێن بۆری، شیان یێن هەین هەكە ڕاهێنەر ب درۆستی سەرەدەریێ دگەل یاریێ بكەت و سەركەڤتی بیت د پلان و تەكتیكا خوە دا، تیما ئەلغرافە یاریزانێن باش هەنە و دناڤ ئەردێ وێ دایە.
لدۆر یارییا زاخۆ ژی گۆت: ل چارشەمبییا بۆری تیما زاخۆ یارییەكا گرنگ د كۆپا كەنداڤی دا كربوو، دبیت وەستیان ل سەر یاریزانان دڤێ یاریێ دا بهێتە دیتن، لێ ڕاهێنەرێ تیمێ یێ نوو ئەیۆب ئۆدیشۆ شارەزاهییەكا باش ل سەر خولێ هەیە و دبیت هند بۆ بزەحمەت نەبیت لێ ئەو یاریزانێن دگەل دا دبیت هێشتا ئەو پێدڤی ب دەمی بیت ژبۆ باشتر ل دووڤ پلانێن وی یاریێ بكەن، سزادانا ستێرێ زاخۆ یێ بەرازیلی ئۆرینیۆ دی بیت كارتیكرنێ ل سەر لایەكێ تیمێ بكەت، ل ب گشتی زاخۆ دێ باشتر بیت.
ژ یاریێن دی یێن مایی ژ ڤێ گەڕێ.
سوبەهی ئەینی
تەلەبە دێ مێڤاندارییا جەوییە كەت ل دەمژمێر 11:15 شەڤ.
یاریێن رۆژا شەمبیێ
شورتە- دیالا ل دەمژمێر نەهی شەڤ.
مووسل- مینا ل دەمژمێر نەهی شەڤ.
ئەلكەرخ- زەورا ل دەمژمێر 11:15 شەڤ.
ئەلگەرمە- نەفت میسان، ل دەمژمێر 11:15 شەڤ.
ل رۆژا ئێكشەمبی، یانەیا كارەبا دێ ل یاریگەها زەورا مێڤاندارییا ئەمانەت بەغدا ل دەمژمێر 11:15 شەڤ كەت.
هەلوەستێ گشتی بەری دەستپێكرنا یاریێن ڤێ گەڕێ.
1- جەوییە 40 خال.
2- شورتە 35 خال كێمترییا دو یارییان.
3- ئەلگەرمە 35 خال.
4- هەولێر 35 خال.
5- تەلەبە 34 خال.
6- زەورا 31 خال كێمترییا دو یارییان.
7- زاخۆ 30 خال.
8- كەرخ 28 خال
9- دهۆك 27 خال.
10- دیالا 27 خال.
11- ئەلغراف 26 خال. .
12- نەفت 21 خال كێمترییا یارییەكێ.
13- مینا 20خال.
14- ئەمانەت بەغدا 19 خال كێمترییا یارییەكێ.
15- نەورۆز 19 خال.
16- مووسل 19 خال.
17- نەفت میسان 16 خال.
18- كارەبا 15 خال.
19- نەجەف هەشت خال.
20- ئەلقاسم دو خال.
هێرشبەرێ هەولێرێ سەرێ لیستا گۆلكەران دهێت
1- شێرزۆد تیمیرۆف 13 گۆل ژ یانەیا هەولێر.
2- فیدیلیس كۆكۆ 11 گۆل ژ یانەیا ئەلغراف.
3- لیۆنێل ئیتیبا 10 گۆل ژ یانەیا شورتە.
4- عەلا ئەلدالی 10 گۆل ژ یانەیا مووسل.
5- یونس حەمۆد 9 گۆل ژ یانەیا كەرخ.
6- پیتەر گۆرگیس 9 گۆل ژ یانەیا دهۆك.
7- حەسەن عەبدولكەریم(قۆقی) 7 گۆل ژ یانەیا زەورا.
8- دیبۆتی ئۆگۆنا 6 گۆل ژ یانەیا زاخۆ.
9- محەمەد جەواد 6 گۆل ژ یانەیا جەوییە.
