دهۆك و زاخۆ بەردەوامن ل سەر پێشڤەچوونێ د خولا ستێرێن ئیراقێ دا
هەردو نوونەرێن بەهدینان دهۆك و زاخۆ ب سێ خالێن گرنگ شیان سەركەفتنێ ل سەر یانەیێن باشۆرێ ئیراقێ بینن، ژ چارچووڤەیێ هەڤڕكیێن گەڕا 16 یا خولا ستێرێ ئیراقێ یا فوتبۆلێ و دیارییەكا جوان ب دەنتە جەماوەرێ خوە.
ل یاریگەها خوە تیما فوتبۆلا یانەیا دهۆك سەركەفتنا خوە یا هەشتێ د خولا ستێرێن ئیراقێ دا تۆمار كر، پشتی ب ئەنجامێ دو گۆلان بەرانبەر گۆلەكێ سەركەفتنێ ل سەر مێڤانا خوە یانەیا كەربلا بینت، ئەوا ل ئەینییا بۆری ل یاریگەها یانەیا دهۆك هاتییە كرن، هەردو گۆلێن ئەلهۆیێن چیا ژلایێ یاریزانان پیشەكارێ تونسی عیماد الواتی و زیاد ئەحمەد ژ پەنەلتیێ .
ژلایێ خوەڤە تیما زاخۆ كوڕێن خابووری ب سێ خالێن گرنگ ژ بەغدا ڤەگەڕیان پشتی دگەل خودانێن ئەردی یانەیا نەفت ئەلبەسرا ب دو گۆلێن پاقژ بینن، پیشەكارێ زاخۆییان یێ كامیرۆنی فرانك سێدرێك شیا ئێك ژ بلەزترین گۆلێن د خولا ستێرێن ئیراقێ دا تۆماربكەت پشتی بۆرینا 37 چڕكەیان، گۆلا دویێ یا زاخۆ ژلایێ كاپتنێ تیمێ ئەمجەد عتۆان د خولەكا 72ێ دا تۆماربكەت و تیما خوە بەر ب سەركەفتنا دویێ ژ دەرڤەیی یاریگەها خوە دا ل پارێزگەها بەسرایێ ببەت پشتی ل چارشەمبییا بوری شیابوون ب سەركەڤن ل سەر مینا ب دو گۆلان بێ بەرانبەر ئەوا ژلایێ هێرشبەرێ وی فرانك سێدرێكی ڤە هاتینە تۆماركرن.
د كونگرەیێ رۆژنامەڤانی دا ئەحمەد خەلەف راهێنەرێ تیما دهۆكێ دیار كر یارییەكا ب هێز و هەڤڕكی بەرانبەر تیما كەربەلا هاتە كرن، دوورئێخستنا یاریزانێ وان كارتیكرن ل سەر ئاستێ یاریێ هاتە كرن، هەر یارییەكا دكەین ب زەحمەتن لێ بزاڤێن مە هەردەم بۆ سێ خالێن یاریێ نە، سۆپاسییا هەمی یاریزانان دكەم كو شیانێن مەزن یێ جەستەیی دناڤ یاریگەهێ دا ب كار دئینن و دیسان سۆپاسییا جەماوەرێ یانەیێ ژی دكەم بەردەوام پشتەڤانێن تیما مە بووینە.
ژلایێ خوەڤە تەلال ئەلبلۆشی راهێنەرێ یانەیا زاخۆ كەیفخوەشیا خوە دیار كر ب ئەنجامێن باش یێن تیما خوە و گۆت: پیرۆزباهییا كارگێری و جەماوەرێ دلسۆز یێ یانەیا زاخۆ دكەم كو ئەم شیایین بۆ دو یارییا ل دووڤ ئێك دلێ وان خوەش بكەین، سەرباری ئەركێ مە ب سانەهی نەبوو و هەردو تیمێن مێڤان خودانێن ئەردی بوون لێ ئەم شیاین ل دووڤ پلانێن خوە و زاخا یاریزانان ب گەهینە سەركەفتنێ.
بڤان سەركەفتنێ تیما دهۆكێ خالێن خوە گەهاندنە 27 خال و پێشڤە هاتە رێزا چارێ و زاخۆ ب25 خالان پێشڤە هاتە رێزا شەشێ، ئەوا یانەیا جەوییە ب40 خالان سەرێ لیستێ دهێت، شورتە 32 خالان رێزا دویێ دهێت.
