دهۆك و زاخۆ ب چ شێوە دێ مفایی ژ ڕاوەستیانا خولێ وەرگرن
قەیس وەیس:
ل دووڤ بڕیارا فدراسیۆنا فوتبۆلا ئیراقێ هەڤڕكیێن خولا ستێرێن ئیراقێ یا فوتبۆلێ بۆ گەڕا چارێ هەتا 26ێ ڤێ مەهێ بهێتە ڕاوەستاندن ب هەڤدەم دا دگەل ڕاوەستیانا پرانییا خولێن جیهانی ژبۆ دەلیڤەدان بۆ هەلبژارتیێن ئەوان وەلاتان ب ئەنجامدانا یاریێن خوە یێن ڤاڤارتنێن كۆپا كێشوەران و دەربازبوون بۆ مۆندیالا 2026ێ، هەلبژارتیێ ئیراقێ ژی دێ دو یاریان د دەمێ ڕاوەستیانێ دا بەرانبەر هەلبژارتیێن فلەستین و كوریا باشۆر كەت.
غالب ئەلزاملی ئەندامێ فدراسیۆنا ناڤهاتی بۆ دەزگەهێن رۆژنامەڤانی گۆت: ل دووڤ سیستەمێ نێڤدەولەتی بڕیارە یاریێن گەڕا چارێ ژ خولا ستێرێن ئیراقێ بهێتە ڕاوەستاند پشتی ب دووماهی هاتنا گەڕا سێیێ ئەوا بڕیارە هەر ژ شەشێ چریا ئێكێ یا بهێت دەستپێبكەت كو ئەڤ ڕاوەستاندە ل دووڤ سیستەمێ رۆژێن فیفایێ نە ل سەر ئاستێ جیهانێ، هەروەسان هەلبژارتیێ ئیراقێ دێ دو یاریێن خوە ژ ڤاڤارتنێن مۆندیالا جیهانی 2026ێ بەرانبەر هەر ئێك ژ فلەستن و كوریا باشۆر كەت، ئەوا دهێتە چاڤەڕێ كرن ئەڤ ڕاوەستاینە بۆ ماوەیێ 20 رۆژان بەردەوام بیت.
هەرچەند د ناڤ خولا ستێرێن ئیراقێ دا چار یانەیێن كوردستانی پشكدارن ئەو ژی دهۆك، زاخۆ، هەولێر و نەورۆز ئەوێن دێ ب دانانا پلان و بەرنامەیێن راهێنانێ تایبەت ژبۆ باشترین بەرهەڤی بۆ یاریێن داهاتی و مفا وەرگرتن ژ ڕاوەستیانا خولێ، لێ هەردو یانەیێن دهۆك و زاخۆ ڕاوەستیانا خولێ ب دەلیڤە دیتیە كو فریزەیێ خوە ب گوهۆڕن و بڕیار پشتی ب دووماهی هاتنا یاریێن گەڕا سێیێ كەڤتبوو د بوارێ ب جهئینانێ دا.
یانەیا دهۆك پشتی سەركەفتنەكا گرنگ ل سەر یانەیا نەجەف ب گۆلەكێ دێ هەموو بزاڤان كەت بەرهەڤیێن باش بكەت هەروەكو مەسعۆد میرال راهێنەرێ یانەیا دهۆكێ دیار كر بۆ دەمێ بهێنڤەدانا خولا ستێرێن ئیراقێ دێ بەرهەڤییان بۆ روودانەكا نوو كەن ئەو ژی كۆپا كەنداڤی ئەوا بڕیارە ئێكەم یارییا خوە ل 22ێ ڤێ مەهێ دناڤ ئەرد و جەماوەرێ خوە دا مێڤاندارییا ئەهلی سەنعا یا یەمەنی بكەت ژ چارچووڤەیێ كۆما دویێ یا قارەمانیێ ئەوا هەشت یانەیێن كەنداڤییا عەرەبی پشكدارن و هاتینە بەلاڤكرن ل سەر دو كۆما، هەروەسان بڕیارا بۆ وێ یاریێ یاریگەهە ب جوانیەكا دی یا فریزەیی یا بەرهەڤبیت.
ژلایێ خوەڤە كوڕێن خابوری یانەیا زاخۆ ب سەركێشییا راهێنەرێ خوە یێ قەتری تەلال ئەلبەلۆشی ڕژدن ل سەر ئاست و ئەنجامێن خوە مینن ئەوێ بۆ رۆژنامەیا ئەڤرۆ گۆت: ڕاوەستایا خولێ وێستگەهە بۆ باشترین بەرهەڤی، سەرباری تیما مە كەتبوو ل سەر رێكەكا باش و سەركەفتنەكا مەزن ئینابوو و دا بەردەوامبین ل سەر ئاست و ئەنجامێن خوە، لێ بۆ ڤێ دەمێ داهاتی دێ كار كەین هەموو یاریزانێن د بەهەڤیێن باش دابن هەتا خول ڤەدگەڕیت.
بۆ زانین هەلبژارتیێ ئیراقێ دێ یارییا خوە یا ئێكێ ئەڤرۆ مێڤاندارییا فلەستین كەت، یارییا دویێ ل 15ێ هەمان مەهـ دێ ل پایتەختێ كوریا باشۆر سییول بیتە مێڤانا خودانێن ئەردی.
