دهۆك و زاخۆ دوور ژ پشتەڤانێن خوە دخوازن سەركەفتنێ بكەنە دیاری
چاڤەڕێ دهێتە كرن ئەڤرۆ و سوبەهی دەهـ یاریێن گەڕا 27ێ ژ هەڤڕكیێن خولا ستێرێن ئیراقێ یا فوتبۆلێ ل یاریگەهێن جودا بهێنە ئەنجامدان، یانەیێن دهۆك، زاخۆ و هەولێر ژ دەرڤەیی یاریگەهێن خوە شەڕێ سێ خالان كەن و نەورۆز دناڤ پشتەڤانێن خوە دا هیڤیێن سەركەفتنێ هەنە.
دهۆك دێ قەرەبوویا خالان كەت
سوبەهی ل دەمژمێر شەشێ ئێڤاری تیما یانەیا دهۆك دێ بیتە مێڤانا یانەیا كەربەلا د یارییەكا ب هێز و هەڤڕكی دا، ئەلهۆیێن چیا بریندارن و د كاودانەكێ باش دا نینن پشتی دو وەكهەڤیێن ل دووڤ ئێك و ژ دەستدانا ب سانەهی یا چەندین خالان، ئەوا نوكە ب 40 خالان رێزا شەشێ دهێت ژ 10 سەركەفتن، 10 وەكهەڤی بەرانبەر شەش خوسارەتیان ئەنجامێن ڤێ دووماهیێ بوویە جهێ دلگرانییا پشتەڤانێن ئەلهۆیان و گڤاشتن ل سەر كارگێری و راهێنەری كرینە كو ئاست و ئەنجامێن سەركەفتی ڤەگەڕینن، لەوما بۆ ڤێ یاریێ یاریزان لبن گڤاشتنان داخوازكرینە ژبۆ سەركەفتنێ وئاشتكرنا جەماوەرێ خوە، سەرەبار ئەركێ وان بەرانبەر یانەیا كەربەلا یا ب سانەهی نابیت ئەوا شەڕی بۆ خالان دكەت پێخەمەت خوە پاراستن ژ داكەفتنێ ژبەركو ل رێزا14ێ ب 25 خالان دهێت، دبیت ئەنجامێ خراب یێ تیما دهۆك ببیتە ئەگەر راهێنەرێ وێ ئەحمەد خەلەف دەست ژ كارێ خوە بكێشیت و هەكە سەركەفتن ئینا دێ باوەری و ژەمەكا ب هێز دەتە وی و یاریزانان.
زاخۆ گەشبینە بەردەوامیێ بدەتە سەركەفتنان
ژلایێ خوەڤە هەر سوبەهی و دەمژمێر شەشێ ئێڤاری تیما یانەیا زاخۆ دێ ل یاریگەها ئەلمەدینە ل باژێرێ بەغدا بیتە مێڤانا یانەیا ئەمانەت بەغدا د یارییەكا ب دەلیڤە بۆ كوڕێن خابووری ژبۆ پاراستنا رێزبەندییا خوە و هیڤیێن زێدەتر پێشڤەچوونێ، زاخۆ د دەمەكێ زێرین دا د بۆرینت تایبەت یا سالا 2024ێ كو هەتا نوكە د خولێ دا چو خوسارەتی نە داینە، ئەوا نوكە ب 46 خالان رێزا چارێ دهێت ب12 سەركەفتن، 10 وەگهەڤی بتنێ سێ خوسارەتی هەنە، ل دیڤ ئامارێن تیما زاخۆ د سالا 2024ێ دا 13 یاریێن خولێ كرینە نەهـ سەركەفتن ئیناینە بەرانبەر چار وەكهەڤیان و یارییەك یا پاشئێخستیە ئانكو چو خوسارەتی نەداینە ئەڤچەندە ژی ل سەر دەستێ راهێنەرێ وێ یێ قەتەری تەلال ئەلبلۆشی بوویە، دبیت یارییا سوبەهی بەرانبەر ئەمانەت بەغدا درێژەپێدانا ئەنجامێن باش بیت ژبەركو خودانێن ئەردی ل رێزا 19ێ و بەری دووماهیێ ب 17 خالان دئێن، لێ د تەپا پێی دا هەر ئەنجامەك دهێتە پێشبینیكرن.
هەولێر پێدڤی ب موعجیزەكێ یە
بڕیارە ئەڤرۆ ل دەمژمێر 3:45 ئێڤاری تیما یانەیا هەولێر ل بەغدا ببیتە مێڤانا یانەیا كەرخ د یارییەكا ب زەحمەت بۆ كوڕێن كەلهە و منارە، ژبەر ئەنجامێن وێ یێن خراب بوو ئەگەر كارگێریا یانەیا هەولێر دەست ژ كارێ خوە بكێشیت ئەڤچەندە بیت كارتیكرنەكا مەزن ل سەر ئاستێ یاریزانێن وێ بكەت لەوما پێدڤی ب موعجیزەكێ یە هەتا خوە ژڤێ تەنگاڤیێ قورتالبكەت، هەولێر ب23 خالان رێزا 16ێ دهێت لبن گەڤێن داكەفتنێ دایە، سەركەفتنا ئەڤرۆ بەرانبەر گەرخ دبیت هەڤكێش بۆ چارەسەركرنا چەند ئاریشەیێن تەكنیكی و كارگێری، یانەیا مێڤاندار ئەوا 24 خال كۆمكرین رێزا 15ێ دهێت.
دەلیڤەكا باش بۆ نەورۆز پەیدابوویە
هەر ئەڤرۆ دەمژمێر 3:45 ئێڤار یانەیا نەورۆز ل یاریگەها سلێمانیە مێڤاندارییا یانەیا ئەلقاسم كەت، ئەڤ یارییە بۆ خودانێن ئالایێ سپی و سۆر دەلیڤەیە سێ خالان ب دەستڤە بینت و رێزبەندییا خوە پارێزین ئەوێن هەتا نوكە ب38 خالان رێزا حەفتێ دهێت، تیما ئەلقاسم دبیت سۆپرایزەكێ بینت سەرباری رێزبەندییا وێ ل رێزا 18ێ یە ب كۆمكرنا 18 خالان و ترسا داكەفتنێ ل سەر وێ ژی هەیە.
ژ یاریێن دی ئەڤرۆ، نەجەف- تەلەبە، كارەبا- شورتە، نەفت ئەلبەسرا- نەفت ئەلوەسەت، یاریێن سوبەهی حدود- جەویە، مینا- نەفت، زەورا- نەفت میسان.
هەلوەستێ گشتی بڤی شێوەیە.
1- شورتە 57 خال.
2- جەوییە 56 خال.
3- زەورا 39 خال.
4- زاخۆ 46 خال.
5- نەجەف 43 خال.
6- دهۆك 40 خال.
7- نەورۆز 38 خال.
8- حدود 37 خال.
9- نەفت 37 خال.
10- نەفت میسان 36 خال.
11- تەلەبە 34 خال.
12- ئەلمینا 30 خال.
13- كارەبا 28 خال.
14- كەربەلا 25 خال.
15- كەرخ 24 خال.
16- هەولێر 23 خال.
17- نەفت ئەلبەسرا 22 خال.
18- ئەلقاسم 18 خال.
19- ئەمانەت بەغدا 17 خال.
20- نەفت ئەلوەسەت 12 خال.