دهۆك و زاخۆ دێ بزاڤێن سه‌ركه‌فتنێ ل به‌غدا كه‌ن
ئه‌ڤرۆ،
چاڤه‌ڕێ یه ئه‌ڤرۆ و سوبه‌هی یاریێن گه‌ڕا ده‌هێ ژ قۆناغا ئێكێ یا هه‌ڤڕكیێن خولا ئیراقێ بۆ یانه‌یێن پلا نایاب یا ته‌پا پێی بهێنه ئه‌نجامدان یانه‌یێن دهۆك، زاخۆ و نه‌وروز دێ ژ ده‌رڤه‌یی یاریگه‌هێن خوه بۆ سێ خالێن یاریێ جه‌نگن و هه‌ولێر د ناڤ ئه‌رد و جه‌ماوه‌رێ خوه دا بزاڤێن به‌رده‌وامییا ئه‌نجامێن باش كه‌ت.
بڕیاره ئه‌ڤرۆ ل ده‌مژمێر دو یێ پشتی نیڤرۆ تیما یانه‌یا دهۆك ل باژێرێ به‌غدا ببیته مێڤانا یانه‌یا سیناعه، تیما پارێزگه‌هێ ب 11 خالان رێزا 13ێ دهێت ئانكۆ به‌رده‌وام رێزبه‌ندیێ به‌ر ب پاشڤه چوونێ د چیت، ژلایێ خوه‌ڤه تیما سیناعه ئێك ژ هه‌ڤڕكێن لاوازه كو ل رێزا 19ێ و به‌ری دووماهیێ ب تنێ دو خال كۆمبكرینه، ئه‌ڤ یاریه ده‌لیڤه‌یه بۆ ئه‌لهۆیێن چیا قه‌ره‌بوویا خوساره‌تیا یاریا بوری بكه‌ت ئه‌وا ل گه‌ل یانه‌یا كه‌رخ ب دو گۆلان دناڤ ئه‌رد و جه‌ماوه‌رێ خوه دا تووشی خوساره‌تیێ بوویی، راهێنه‌رێ تیمێ سلێمان ره‌مه‌زان دێ لبن گڤاشتنێن كێماسیێن پێكهاتیێ خوه هه‌مبه‌ری خودانێن ئه‌ردی بیت، ژبه‌ر نه پشكداریا پیشه‌كار نورو سولێ و هنگاو محه‌مه‌د ژبه‌ر كارتێن سۆر دیاریا كه‌رخێ دا و هه‌روه‌سان هنگاڤتنا هه‌ر ئێك ژ كه‌ریم ده‌لی، ئیڤان سلێمان و هه‌رێم ته‌حسین، لێ دێ بزاڤێ كه‌ت ب یاریزانێن یه‌ده‌ك بشێن ئه‌وان كێماسیا پڕبكه‌ت، ژ یاریێن دی یێن ئه‌ڤرۆ كاره‌با- نه‌جه‌ف، كه‌رخ- شورته، كه‌ربه‌لا- ئه‌لقاسم، جه‌ویه- نه‌فت.
ژلایێ خوه‌ڤه تیما یانه‌یا زاخۆ سۆبه‌هی دێ ل یاریگه‌ها شه‌عب یا نێڤده‌وله‌تی ل ده‌مژمێر دو یێ پشتی نیڤرۆ بیته مێڤانا یانه‌یا حدود ئێك ژ تیمێن هه‌ڤڕكه ل رێزبه‌ندیێ ئه‌وا ب 17 خالان رێزا شه‌شێ دهێت، به‌روڤاژی یانه‌یا كوڕێن خابۆری ئه‌وا د كاودانه‌كێ هه‌ستیار دا ده‌ربازدكه‌ت بتنێ شه‌ش خال كۆمكرینه و رێزا 17ێ دهێت ئانكو یاریه‌كا ب سانه‌هی نابیت بۆ زاخۆییا و دێ ئاسته‌نگ هه‌بن هه‌تا بگه‌هیته ئارمانجا خوه، هه‌ر ژ یاریێن سوبه‌هی، هه‌ولێر دێ مێڤانداریا زه‌ورا كه‌ت د یاریه‌كا بهێز دا، نه‌وروز دێ بیته مێڤانا نه‌فت ئه‌لمیسان، ته‌له‌به- نه‌فت ئه‌لوه‌سه‌ت، نه‌فت ئه‌لبه‌سرا- دیوانیه.
