دهۆك و زاخۆ دێ بەرانبەر یانەیێن زەورا و تەلەبە پێنگاڤا ئێكێ هاڤێژن
شاهۆ فەرید:
بڕیارە سوباهی رۆژا ئەینی وەرزی نوو یێ خولا ستێرێن ئیراقێ یا فوتبۆلێ ب ئەنجامدانا دو یارییان ل یاریگەهێن دهۆك و هەولێرێ، ئەوا 20 یانە دێ هەڤڕكیێ ل سەر ناسناڤێ خولا ئیراقێ كەت و یاریێن ب شێوەیێ خول دو قۆناغ هەتا 20ێ خزیرانا سالا 2025ێ یا بەردەوام بیت.
دهۆك دێ ئاهنگا خولێ رێكئێخیت
سوبەهی ل دەمژمێر حەفتی شەڤ یانەیا دهۆك بەری دەستپێكرنا یارییا خوە بەرانبەر یانەیا زەورا ب ئێك دەمژمێر هەموو وەرزشڤانێن ئیراقێ و دەرڤە دێ چاڤ ل یاریگەها یانەیا دهۆك یا وەرزشی بن ژبۆ دیتنا رێورەسمێن ئاهنگا ڤەكرنا وەرزێ نوو یا خولا ستێرێن ئیراقێ بن، ئەوا دهێتە چاڤەڕێكرن كەسانێن مەزن یێن دناڤ وەرزشا كوردستانێ و ئیراقێ دا و بەرهەڤبوونا عەدنان درجال سەرۆكێ فیدراسیۆنا فوتبۆلا ئیراقێ و خاڤیێر تێبیاس سەرۆكێ دەستەیا لالیگا یا ئسپانی، ل دووڤ بەرنامەیێ هاتە دانان بۆ نیڤ دەمژمێرا ئێكێ دێ ئاهنگا ڤەكرنا خولێ بیت ب هەبوونا برگەیێن هونەری و فلكلۆری یێن كوردستانی و ئیراقێ و نیشاندانا یاریێن ئاگرین.
دهۆك یا بەرهەڤە بۆ یاریێ
پشتی ب دووماهی هاتنا ئاهنگێ بڕیارە ل دەمژمێر هەشت شەڤ تیما فوتبۆلا یانەیا دهۆك مێڤاندارییا یانەیا زەورا بكەت د پێنگاڤا ئێكێ یا وەرزێ نوو بۆ خولا ستێرێن ئیراقێ، كارگێرییا یانەیێ تیما خوە ب هەموو لایەكی ڤە بەرهەڤكرییە، ب ئینانا كادرەكێ نوو یێ راهێنانێ و كۆمەكا یاریزانێن پیشەكار و ڕەڤەندا كورد و ئیراقی ل دەرڤە، بەرپرسێن یانەیێ گەشبینن بۆ یارییا ئەڤرۆ جوانترین دیاری ژی ب سەركەفتی ب دەنە جەماوەرێ خوە ئەوا دهێتە پێشبینیكرن زێدەتری 23 هزار كەس بەرهەڤی یارگەهێ بن، ئەلهۆیێن چیا بەرهەڤن و رژدن بۆ دەستڤە ئینانا ئێكەم سێ خالێن یاریێ.
زاخۆ دێ ل بەغدا بزاڤێ بۆ سەركەفتنێ كەت
ژلایێ خوەڤە تیما یانەیا زاخو دێ ل رۆژا ئێكشەمبییا بهێت ل پایتەختێ ئیراقێ بەغدا بیتە مێڤانا یانەیا تەلەبە د یارییەكا دی یا بهێز دا، كوڕێن خابووری ژ دەرڤەیی یاریگەها خوە لێ دبیت كۆمەكا پشتەڤانێن وێ ل یاریگەهێ بەرهەڤبن، دبیت ئەركێ كوڕێن خابووری ب سانەهی نەبیت لێ بەرهەڤیێن وان و دانانا كەمپێ راهێنانێ و گەشبینییا كادرێ راهێنانێ و یاریزانان دبیت پالدەرێ ب دەستڤە ئینانا سەركەفتنێ بیت.
ئەركێ هەولێر و نەورۆزێ خراب نینە
ژلایەكێ دیڤە یانەیا هەولێر ژی دێ سوبەهی ل یاریگەهـ و دناڤ جەماوەرێ خوە دا دەست ب وەرزێ نوو كەت، دەمێ مێڤاندارییا یانەیا دیالا كەت د یارییەكا ب زەحمەت نابیت بۆ كوڕێن قەلهە و منارە، تیما مێڤان پشتی نێزیكی 18 سالان ژ دووركەڤتنێ بۆ وەرزێ ئەڤ سالە ڤەگەڕیایە خولێ، لێ هەولێری باش دزانن ژ دەستدانا هەر خالەكێ دناڤ یاریگەها خوەدا دێ باجا وێ یا گران بیت، ژلایەكێ دووڤە یانەیا نەورۆز ل شەمبییا بهێت دێ بیتە مێڤانا كەربەلا د پێنگاڤا خوە یا ئێكێ دا.
ژ یاریێن دی یێن گەڕا ئێكێ
رۆژا شەمبی، شورتە- ئەلكەرمە، نەجەف- نەفت، نەفت ئەلبەسرا- ئەلكەرخ، یاریێن رۆژا ئێكشەمبییا بهێت، كارەبا- جەوییە، مینا- حدوود، ئەلقاسم- نەفت میسان.
بۆ زانین ل وەرزێ 2023 – 2024 یانەیا شورتە هەردو ناسناڤێن خول و كۆپا ئیراقێ دەستڤە بینت، یانەیا زاخۆ رێزبەندیا پێنجێ هاتبوو و دهۆك یا شەشێ، د یاریا پلەیی ئۆف دا دهۆك شیا پلێتا دەربازبوونێ بۆ جاما یانەیێن كەنداڤی دەستڤەبنیت.
