دهۆك و زاخۆ دێ یاریێن هەڤالینێ دگەل یانەیێن ئیراقێ كەن
د ڕێژەپێدان ب ڕاهێنانێن خوە هەردو یانەیێن دهۆك و زاخۆ بەردەوامن ل سەر كەمپێن ڕاهێنانێ خوە بەرهەڤكرن بۆ وەرزێ نووی ێ خولا ستێرێن ئیراقێ ئەوا بڕیارە ل 13ێ مەها بهێت دەستپێبكەت، هەروەسان چەند یانەیێن ئیراقی كەمپێن خوە ل دەرڤە داناینە.
دهۆكێ زاكێری سزادا
تیما یانەیا دهۆك ئەوا بەردەوامە ل سەر كەمپا خوە یا ڕاهێنانێ ل باژێرێ پیرمام یا هەولێرا پایتەخت ئەوا ب سەرپەرشتییا ڕاهێنەرێ خوە یێ بەرازیلی سێرجیو ڤاراس، ژبۆ باشترین بەرهەڤی بۆ وەرزێ نوو، هەرچەندە هەتا سێ یاریزانێن نوو نەگەهشتینە دناڤ ڕێزێن تیمێ دا ژبەر ئەگەرێن جودا، بڕیارە ئەڤرۆ پیتەر گۆرگیس بگەهیت، ژلایەكێ دووڤە كارگێرییا یانەیێ كار ب سیستەمێ پێگیریكرن ب ڕێنمایان كر و ژبەر نە پێگێرییا ستێرێ وێ یێ كۆتڤۆاری یانیك زاكێری ب ڕێنمایێن ڕاهێنانان و بەرهەڤ نەبوویە، بڕیار هاتە دان ئەو بهێتە سزادان بێ دیاركرنا جورێ سزایی.
ژ لایەکێ دووڤە ب فەرمی گریبەستا هێرشبەرێ بەرازیلی جواو کابرالی هاتە ڕاگەهاندن و بڕیارە ئەڤرۆ پەیوەندیێ ب رێزین تیمی بکەت
هەر دووماهی پێشهاتیێن تیمێ د كەمپێ ڕاهێنانێ دا بڕیارە دڤێ حەفتیێ دا دو یاریێن هەڤالینی دگەل یانەیێن بەغدایی و باشۆرێ ئیراقێ ل هەولێرا پایتەخت بكەن بەری كەمپا خوە ب دووماهی بینن و ڤەگەرینە دهۆكێ، بۆ زانین ل حەفتییا بۆری دهۆكێ دو یاریێن هەڤالینی دگەل هەلبژارتیێ لاوێن ئیراقێ كربوو.
زاخۆ دێ كەمپێ خوە ل هەولێرێ دانیت
ل دووڤ دەنگۆباسێن هاتینە بەلاڤكرن و ژێدەرێن نێزیك ژ یانەیێ ڕاهێنەرێ تیمێ یێ قەتەری ویسام رزق خواستیە كەمپێ خوە یێ دەرڤە ل شوونا بچنە وەلاتێ توركیا پووشمان بووینە دێ كەمپێ خوە ل هەولێرا پایتەخت ل باژێرێ پیرمام دانن كو دهێتە پێشبینیكرن سوبەهی دەستپێبكەن و پێنچ شەمبییا بهێت یارییەكا هەڤالینی دگەل یانەیا ئەلكەرخ بكەن، ئەڤ بڕیارە هات ژبەر كێمبوونا دەمی و نە مفا وەرگرتن و دێ یاریزانی بێزاركەن.
هەر ژ دەنگۆباسێن بەلاڤبوویی كارگێرییا یانەیێ دیاركرییە تیما وان نێزیكی 90% تمامبوویە و ئەو پێدڤی ب دو یاریزانێن پیشەكار هەنە د نێزیك دا دێ ئەو ژی چارەسەربیت، ژلایەكێ دووڤە بابەتێ نەڕازیبوونا پشكەكا جەماوەرێ یانەیێ ب درێسێ یانەیێ ژی بوویە گەنگەشەیەكا درێژ، هەرچەندە یانەیا زاخۆ دیاركرییە كو ئەو درێسە ڕامانێ ژ كەلەتۆرەكێ دێرین یێ باژێرێ زاخۆ ددەت ئەوژی پرا دەلالە، دبەرانبەردا كۆمەكا دی یا پشتەڤانان هزر دكەن هند درێس گرنگ نینە بەرانبەر دەستڤەئینانا سەركەڤتنان و دەستكەڤتەكی.
