دهۆك و زاخۆ دێ یانێن هه‌ولێری و سلێمانیێ مێڤان كه‌ن
ئه‌ڤرۆ،
دهێته چاڤه‌ڕێكرن ئه‌ڤرۆ، سوبه‌هی و ئه‌ینیا بهێت هه‌ڤڕكیێن گه‌ڕا 12ێ یا خولا كوردستانێ بۆ یانێن پلا نایاب یا ته‌پا پێی ب ئه‌نجامدانا حه‌فت یاریان بهێته كرن، هه‌ردو یانێن پارێزگه‌هێ دهۆك و زاخۆ دێ مێڤانداریا یانێن هه‌ولێرا پایته‌خت و پارێزگه‌ها سلێمانیێ كه‌ن.
سوبه‌هی رۆژا پێنچ شه‌مبی یانا دهۆك د ناڤ ئه‌رد و جه‌ماوه‌رێ خوه دا دێ مێڤانداریا یانا پێشمه‌رگه‌یا هه‌ولێرێ كه‌ت، ئه‌لهویێن چیا ب زاخه‌كا بلند دێ هێنه دناڤ یاریگه‌ها خوه دا ئه‌وێن 16 خال كۆمكرین و رێزا چارێ دهێت و ب هیڤیێن به‌رده‌وام بۆ ئه‌نجامێن باش كه‌ت، ژلایێ خوه‌ڤه تیما مێڤان پێشمه‌رگا هه‌ولێرێ پشتی ڤێ دووماهیێ ئاست و ئه‌نجامێن خوه یێن باش ڤه‌گه‌ڕاندن دێ شه‌ڕی بۆ خالێن یاریێ كه‌ت ئه‌وا نوكه ب 13 خالان رێزا هه‌شتێ دهێت، هه‌ر ژ یاریێن پێنچ شه‌مبیێ هندرین خودانا سه‌رێ لیستێ 21 خالان دێ مێڤانداریا چه‌مچه‌مال كه‌ت، سیروانی نوو خودانا رێزا دویێ ب 19 خالان بیته مێڤانا سه‌یدسادق ئه‌وا 15 خال هه‌ین و رێزا پێنجێ دهێت.
ل رۆژا ئه‌ینی كوڕێن خابووری ب ژڤانن دیاریا خوه یا ڤێ گه‌ڕێ دا مێڤانداریا یانا ده‌ربه‌ندیخان ل یاریگه‌ها ده‌لال بكه‌ن، زاخۆ ب نه‌ه خالان رێزا 13ێ دهێت كو ئه‌ڤ رێزبه‌ندیه بوویه جهێ دلته‌نگیا جه‌ماوه‌ری و وه‌كریه كارگێریا یانێ خه‌میس حه‌مودی وه‌كو راهێنه‌رێ نوو ده‌ستنیشان بكه‌ت و دێ بیته تاقیكرنا وی یا ئێكێ د خولا كوردستانێ دا، هه‌مبه‌ری وێ ده‌ربه‌ندیخان ئه‌وا رێزا نه‌هێ دهێت ب 13 خالان دێ بزاڤێ كه‌ت ب ئه‌نجامه‌كێ باش ڤه‌گه‌ڕیێت، ژ یاریێن دی یێن رۆژا ئه‌ینی برایه‌تی دێ مێڤانداریا سۆران كه‌ت.
چاڤه‌ڕێ یه ئه‌ڤرۆ رۆژا چار شه‌مبی دو یاری بهێنه كرن و بڤی ره‌نگی، هه‌ولێر دێ مێڤانداریا ئارارات كه‌ت و نه‌وروز بیته مێڤانا شه‌قلاوه، بۆ زانین هه‌موو یاری ده‌مژمێر دویێ پشتی نیڤرۆ هێنه ئه‌نجامدان.
