دهۆك و زاخۆ د رێزبەندیەكا نە چاڤەڕێ كری دا وەرزێ خوە ب دووماهی ئینا
ل ئەینییا بۆری ب فەرمی پەردە ل سەر وەرزێ 2022- 2023 یا خولا ئیراقێ بۆ یانەیێن پلا نایاب یا تەپا پێی ب دووماهی هات ئەوا دهێتە هژمارتن ئێك ژ درێژترین وەرزێن د دیرۆكا چالاكیێن تەپا پێی یا ئیراقێ هاتیە كرن و ل سەر ئاستێ جیهانێ كو هەر ژ 10ێ چڕیا ئێكێ یا سالا 2022ێ دەستپێكری ل21ێ ڤێ هەیڤێ ب دووماهی هاتی، پشتی هەڤڕكییەكا دژوار تیما یانەیا شۆرتە بۆ جارا دویێ ل دووڤ ئێك ناسناڤ دەستڤە ئینا و هەردو یانەیێن سیناعە و دیوانیە پاشڤە چوونە پلا ئێك.
د رێزبەندیەكا نە باش دا دهۆكێ مانا خوە پاراست
تیما تەپا پێی یا یانەیا دهۆك ئێك ژ وەرزێن خوە یێن خراب درێزبەندیا 12ێ دا ب دووماهی ئینا ب كۆمكرنا 50 خالان ژ11 سەركەفتن، 17 وەكهەڤی و 10 خوسارەتیان، 34 گۆل تۆماركرن و 39 گۆل ل سەر هاتینە تۆماركرن، د قۆناغا ئێكێ دا شیابوو 32 خالان كۆمبكەت ل رێزا شەشێ بهێت، لێ د قۆناغا دویێ دا ئەو ئاست و ئەنجام نە هاتنە دیتن ژ 18 یاریێن ڤێ قۆناغێ بتنێ سێ سەركەفتن بەرانبەر هەشت وەكهەڤی و حەفت خۆسارەتیان ژ رێزبەندیا شەشێ پاشڤەچوو رێزا 12ێ، دبیت مانا تیمێ د خولێ دا پلانا كارگێریێ بیت، لێ راهێنەرێ تیمێ یێ پارێزگەهێ سلێمان رەمەزان ل بن گڤاشتنێن جۆدا بوو ژ وانا كێم یاریزانێن شارەزا و نەبوونا پێگۆهۆڕەكێ سەركەفتی، ژباشترین یاریزانێن هاتینە دیتن پیشەكارێ كۆتیڤۆاری گراهیر یانیك زاكێری خودانێ نەهـ گۆلان، یاریزانێن گەنج ژیار گۆڤەند، رێوان ئەمین، هەرێم تەحسین و گۆلپارێز ئەحمەد بەشار، دبیت بۆ جەماوەرێ یانەیێ ژبەر ئەوان گوهۆڕین و كاودانێن پەیدابووین و بۆ جارا ئێكێ پشتی شەش سالێن ڤەقەتیانێ ژ بەر كاودانێن وی دەمی یێن دژوار ژ پەژییا كۆرۆنایێ و قەیرانا دارایی لێ بۆ وەرزێ بهێت ب ئەڤان ئاماران و جهێ رێزبەندیێ جەماوەر رازی نەبیت.
زاخۆ ب گوهۆڕینا سێ راهێنەران خوە داكەفتنێ قورتالكر
تیما یانەیا زاخۆ ئەو ئاست و ئەنجامێ چاڤەڕێ بوونێ ژلایێ جەماوەری د وەرزێ ئەڤ سالە دا نە هاتە دیتن تایبەت د قۆناغا ئێكێ دا و كەفتنە ل بن گڤاشتنێن جۆدا ژوانا گوهۆڕینا راهێنەر و یاریزانێن پیشەكار، لێ دووماهیێ شیان مانا خوە ب پارێزین بۆ وەرزێ نوو یێ خولا پیشەكاران، كوڕێن خابۆری ب كۆمكرنا 42 خالان رێزبەندیا 15ێ هات ژ نەهـ سەركەفتن، 15 وەكهەڤی و 14 خوسارەتی كو 39 گۆل تۆماركرینە بەرانبەر 42 گۆل ل سەر هاتینە تۆماركرن، د ماوەیێ هەردو قۆناغان دا سێ راهێنەران سەرپەرشتیا تیمێ كرینە ئەوژی حەمزە هادی بتنێ چار یاریێن دەستپێكێ بڕێڤەبرین سێ خوسارەتی و ئێك سەركەفتن ئینابوو، دووڤدا حەیدەر عەبدولئەمیر ل جهێ وی هاتە دانان، پشتی بۆرینا 23 یارییان نەشیا هیڤیێن كارگێری و جەماوەرێ زاخۆ ب جه بینت هەشت خوسارەتی و هەشت وەكهەڤی و حەفت سەركەفتن ئیناین و دەست ژ كارێ خوە بەردا، یاریا گەڕا 27ێ ژ خولێ بوو یا ئێكێ یا راهێنەرێ نوكە یێ سۆری نزار مەحرۆس ئەوێ سێ سەركەفتن، شەش وەكهەڤی و سێ خوسارەتی ئیناین، ژ باشترین یاریزانێن زاخۆ فەرحان شكۆر خودانێ نەهـ گۆلان، یێ مەغربی عومەر مەنسۆر و یێ نێجیری بۆبەكر، رەمەزان سەدیق، ئەحمەد سەبری دگەل گۆلپارێز محەمەد سالح، بۆ وەرزێ نوو یێ پیشەكاریێ جەماوەرێ زاخۆ ب هیڤییە ئەو ئاست و ئەنجامێن وەرزێ بۆری بۆ یێ بهێت نە هێتە دیتن.
هەولێر و نەورۆزێ هەلوەستێ خوە باشتر لێكرن
تیما یانەیا هەولێر شیا قەرەبوویا ژ دەستدانا خالێن قۆناغا ئێكێ د قۆناغا دویێ دا بكەت تایبەت پشتی دەست ب كاربوونا راهێنەر عەباس عوبێدی ل جهێ یێ سۆری نزار مەحرۆس، سەرجەمێ گشتی هەولێر شیا ل رێزا شەشێ بهێت 58 خال كۆمكرن ژ 16 سەركەفتن، 10 وەكهەڤی و12 خوسارەتی، د قۆناغا ئێكێ دا بتنێ 22 خال كۆمكربوون رێزا 16ێ هاتبوو، لێ د قۆناغا دویێ دا 36 خال كۆمكرن وەكو تیمەكا هەڤڕك دیاربوو ئەمجەد رازی ب 10 گۆلان گۆلكەرێ تیمێ بوو، ژلایەكێ دووڤە یانەیا نەورۆز ژی شیا هەلوەستێ خوە یێ قۆناغا ئێكێ بۆ قۆناغا دویێ باشتر لێبكەت و سەرجەمێ گشتی ب51 خالان رێزا نەهێ بهێت ب14 سەركەفتن، نەهـ وەكهەڤی و 15 خوسارەتی، پیشەكارێ وێ كلاودیۆ ئۆلیڤێر ب 11 گۆلان گۆلكەرێ تیمێ بوو.
شورتە ناسناڤێ خوە یێ دویێ پاراست و سیناعە و دیوانیە داكەفتن
ب دووماهی هاتنا هەڤڕكیێن وەرزێ 2022- 2023ێ تیما یانەیا شورتە یا بەغدایی ب كۆمكرنا 82 خالان سەرێ لیستێ هات ب جووداهیا چار خالان ژ هەڤڕكا خوە یا رێزا دویێ جەوییە و شیا بۆ جارا دویێ ل دووڤ ئێك و یا حەفتێ د دیرۆكا خوە دا ناسناڤێ خولێ ب دەستڤە بینت، هەردو یانەیێن سیناعە خودانا 28 خالان رێزا 19ێ و بەری دووماهیێ، دیوانییە یا 20 و دووماهیێ ب 12 خالان ب فەرمی پاشڤەچوونە پلا ئێكا ئیراقێ، موهەنەد عەبدولرەحیم ب تۆماركرنا 17 گۆلان ناسناڤێ گۆلكەرێ خولێ هاتە خەلاتكرن، ل دووڤ تۆمارا خولا ئیراقێ دا ئەوا ئێكەم جار ل وەرزێ 1974-1975ێ، یانەیا زەورا خودانا بلندترین ناسناڤێن خولێ یە ب 14 جاران، جەوییە حەفت جاران، شورتە حەفت جاران، تەلەبە پێنچ، هەولێر چاران، یانەیا ئەلرەشید سێ جاران، یانەیێن دهۆك، نەفت ئەلوەسەت، ئەلجەیش، سەلاحەدین، مینا هەر ئێك جارەكێ ب دەستڤە ئیناینە.
وەرزێ پیشەكاریێ دێ سیستەمەكێ نوو دەستپێكەت
ل دەستپێكا هەیڤا بۆری ب چاڤدێریا محەمەد شیاع ئەلسودانی سەرۆك وەزیرێن ئیراقێ ئێكەتیا تەپا پێی یا ئیراقێ گرێبەستا پرۆتۆكۆلا پیشەكاریكرنا خولا ئیراقێ دگەل دەستەیا لالیگا یا ئیكەتیا تەپا پێی یا ئسپانیا ئیمزاكربوو بەرهەڤبوونا سەرۆكێ لالیگایێ خافیێر تیباس ب كۆژمێ پێنچ ملیار یۆرۆیان كو دەستەكا لالیگا دێ وەرزێ بهێت سەرپەرشتیكرنا خولا ئیراقێ دكەت و سیستەمێ خولا پیشەكار ل دووڤ ستاندەرێن فیفایێ ل جهێ خولا نایاب دانیت.
ژ مەرجێن قۆناغا ئێكێ هاتینە دانان
ئێك: دڤێت هەر یانەیەك پلانەك رێكخستی و پەسەندكری هەبیت ژبۆ پێشئێخستنا تیمێن لاوان و ل بن چاڤدێریا پزیشكی دابن و گرێبەستێن ب نڤێسین هەبن.
دو: هەبوونا یاریگەهەكا ب ستاندرێن دیاركری و مەرجێن رێكەپێدان و باوەرنامە هەبیت، ژوورا دادڤانان، ژوورا كادرێ هەوارهاتنا دەستپێكی، جهەكێ تایبەت یێ راهێنانێ.
سێ: پلانەكا تایبەت یا راهێنانێ بۆ یاریزانێن لاوان هەبیت ب سەرپەرشتیكرنەكا تەسەل ل دووڤ یاسایەكا بنەرت و دەزگەهێن تەندرۆستی بیت.
چار: بجهئینانا هەمی رێنما و مەرجێن ، رێڤەبەرێ گشتی، سكرتێرێ یانێ، رێڤەبەرێ دارایی، بەرپرسێ ئاسایسێ، بەرپرسێ راگەهاندنێ، بەرپرسێ بزیشكی، چارەسەرێ سرۆشتی، راهێنەرێ ئێكێ یێ تیمێ، هاریكارێ تیما ئێكێ، رێڤەبەرێ بەرنامەیێ گەشەپێدانا لاوان، راهێنەرێ لاوان، سلامەتی و ئاسایشا زێرەڤانان.
پێنچ: راپۆرتا دارایی یا سالانە ب هەمی ناڤەرۆكێ ڤە، تایبەت ئەوا گرێدایێ ب ڤەگۆهاستنێن یاریزانان دگەل پێزانێن دارایی یێن هەمی فەرمانبەر و ئەو كەسێن دناڤ یانەیێ دا كار دكەن.
شەش: نووكرنا بەردەوام یا راپۆرتێن دارایی
حەفت: پێداچوون ل سەر هەمی لیستەیێن دارایی
هەشت: هەبوونا كۆدەكێ تایبەت یێ رەفتاران دڤێت هەمی یاریزان و رێڤەبەر پابەندبن دگەل هەبوونا بەرپەرسەكێ یاسایی سەرپەرشتیا هەمی كارێن یاسایی بكەت.
