دهۆك و زاخۆ یا ڕێزێن خوە ب هێز دئێخن و ئەلگەرمە ڤەگوهاستنێن یاریزانان شاراندینە
بازارێ گرێبەست و ڤەگۆهاستنا یاریزانان بۆ حەفتییا دویێ یە بەر ب شاڕاندیێ دچیت و كۆمەكا یانەیێن كوردستانی و ئیراقی بهێز دگەل گەرما ڤێ هاڤینێ هاتینە دناڤ دانۆستاندنێن چەند یانەیان دا، یانەیا ئەلگەرمە یا باژێرێ ئەنبارێ مەزنترین گرێبەست د وەرزێ ئەڤ سالە و دیرۆكا خولا ستێرێن ئیراقێ دا تۆمار كرییە، هەرچەندە دانۆستاندنێن یاریزانان و گرێبەستان بەردەوامبن لێ دگەل دووماهی نێڤسینا ڤی بابەتی ئەڤ پێنگاڤە هاتینە هاڤێژتن.
یانەیێن كوردستانی و پێنگاڤێن جودا
یانەیێن دهۆك و زاخۆ د بەردەوام ل سەر بهێزكرنا ڕێزێن تیمێن خوە و دانۆستاندن دگەل كۆمەكا یاریزانان دهێتە كرن، هەتا نوكە ئەوێن بفەرمی هاتینە ڕاگەهاندن، ئەحمەد عەلی یاریزانێ ڕەڤەندا كورد و خەلكێ باژێرێ دهۆكێ و یانەیا ڕین یا فرەنسی گرێبەستا یانەیا دهۆكێ ئیمزاكر، دیسان گرێبەستا هەر ئێك ژ ستێرێ خوە یێ كوتیڤۆاری یانیك زاكێری و یێ لوبنانی كەریم دەرویش بۆ وەرزەكێ دی نوو كرن، ژلایەكێ دووڤە بڕیارە ئەڤرۆ ستیرێ یانەیێ هارۆن ئەحمەد مان و نەمانا خوە دگەل یانەیێ ئێكلا كەت، هەر لسەر بابەتێ گرێبەستان یانەیا دهۆك بزاڤێ دكەت هێرشبەرێ خوە یێ پێشتر یێ تونسی عیماد ئەلواتی ڤەگەرینیت.
ژلایێ خوەڤە یانەیا زاخۆ ئەوا دێ بەرهەڤییا بۆ كۆپا كەنداڤی ژی كەت بفەرمی ڕاگەهاند شێركۆ كەریم یاریزانێ پێشتر یێ یانەیا هەولێرێ گرێبەستا وان ئیمزاكر، هەروەسان هێرشبەرێ هەلبژارتیێ سوریێ عەلا دالی ژ یانەیا ئەرگەرمە پەیوەندی ب یانەیا زاخۆ كر، هەردیسان محەمەد عەلی عەبود و یێ یەمەنی ناسر محەمەدو گرێبەستا خوە دگەل یانەیا زاخۆ نوو كر.
ژلایەكێ دووڤە ژبەر گوهۆڕینێن ڤێ داویێ و هەلبژارتنێن دەستەیا نوو یا كارگێریێ هەتا نوكە یانەیا هەولێر هیچ گرێبەستەك ڕانەگەهاندیە و بڕیارە دڤێ حەفتیێ دا دەست ب دانۆستاندنان دگەل هندەك یاریزانێن خوە بكەت پشتی چوونا زێدەتری حەفت یاریزانێن وێ.
بۆ زانین ئێك ژ بلندترین گرێبەستێن ڤی وەرزی ب ئێك ملیار و250 ملیۆن دیناران كو یانەیا ئەلگەرمە گرێبەستا ستێرێ هەلبژارتیێ ئیراقێ ئەیمەن حسێن ئیمزاكریە.
