دهۆك و هۆكارێن پاشكەڤتنا ئەنجامان
ئیحسان حەسەن
رەنگە پرسیارا ژ هەموویان گرنگتر نها دناڤا جادەیا وەرزشی دا ل پارێزگەهێ و جەماوەر و پشتەڤانێن فوتبۆلا یانەیا دهۆك ئەوبیت، كا بۆ چی تیما وان نەشیایە لڤێ داویێ ب تایبەت پشتی بدەستڤەئینانا ناسناڤێ خولا قارەمانێن یانەیێن كەنداڤی ب ئەنجامێن دلخوشكەر یان ژی ب وی ئاستێ جاران دەركەڤیت، نە لیاریگەها خوە نە لدەرڤە و سەركەڤتنان بدەستڤە بینیت، جارێ دڤێت ئەم لدەستپێكێ بزانین هژمارەكا ئەگەران یێن هەین تیمێن فوتبۆلێ نەشێن سەركەڤتنان تۆماربكەن، ئەوژی هۆكارێن تەكنیكی، جەستەیی و تەكتیكی نە، یان ژی لاوازیا ئاستێ یاریزانان یێن كەسوكی نە، دیسان نە گونجاندنا هێلێن تیمێ نە پێكڤە و هنگاڤتنێن یاریزانان و گڤاشتنێن دەرونی نە، هەروەسا نە بجهئینانا تەكتیكا راهێنەری و هەتا گوهارتنا راهێنەری و هندەك جاران یاریزان نە و هەتا دووماهییێ، لێ ئەوا من تێبینی كری، ئەگەرێن ڤان ئەنجامان ڤەدگەریێتە ڤان خالان، یا ئێكێ هاتنا خوارا ئاستێ تەكنیكی یێ هژمارەكا یاریزانێن یانەیێ یێن كاریگەر ژبەر ژیێ وان دیسان هنگاڤتنان، ئەڤ چەندە ژی بۆ ئەگەرێ هندێ كو لاوازییەك د دروستكرنا هێرشاندا پەیدابیت و گول نەهێنە تۆماربكەن، ڤێ وەكر هەتا ئەو شیان نەبن كو بەرگیریێ وەكو پێدڤی ژدەڤەرا خوە بكەن، یا دویێ نەبوونا هێرشبەرێ سوپەر یێ كو بشێت گۆلان بۆ تیمێ بینیت، بەلگەژی تا نەها چ ناڤێن یاریزانان دناڤا لیستەیا پێشییێ یا گۆلكەرێن خولێ نینن و هەتا رێژا گۆلان ژی هند یا مەزن نینە، یا سێیێ، چوونا راهێنەرێ تیمێ مەسعوود میرال و ئینانا راهێنەرەكێ نوو كو پێدڤی ب دەمی یە تا كو خوە ب گونجینیت دگەل خولا ئیراقێ، كارتێكرنا مەزن ل رەوشا تیمێ و دەرونێ یاریزانان كر، باوەریا بدەستڤەئینانا ئەنجامان لدەڤ وان لاواز كر ب تایبەت ب رەفتار و داخویانیێن خوە یێن نەرەوا، یا چارێ پشت بەستنا تیمێ لسەر هژمارەكا یاریزانان بدرێژاهییا هەڤركیێن ڤی وەرزی دهەموو مەیداناندا و مانا تیمێ لسەر تەكتیكەكا دەستنیشانكری، نەبوونا پێگهورێن سەركەڤتی ئەگەرەكێ دی یە، یا پێنجێ گڤاشتنێن یاریان و راهێنانێن چر و پاشئێخستنا هژمارەكا یاریان و كرنا وان هەر سێ تا چار رۆژان ژبەر پشكداریا تیمێ دخولا كەنداڤی دا، بارێ جەستەیی یێ یاریزانان گران كر، ڤێ چەندێ كارتێكرن لسەر ئاستێ وان كر، یا شەشێ دگەل نێزیكبوونا بداوی هاتنا هەڤركیێن خولێ دڤێت ژبیر نەكەین كو هەموو یاریزان نەشێن ب هەمان لەزاتی و هێز یاریێ بكەن ب تایبەت ئەگەر ژیێ یاریزانی یێ مەزن بیت، ئەڤ چەندە یا دیارە لسەر هژمارەكا یاریزانان، یا حەفتێ گڤاشتنێن دەرونی یێن مەزن ژبەر وان گلەیێن هاتینە كرن ژلایێ جەماوەری ڤە لسەر هژمارەكا یاریزانان كو نە ژهەژی درێسێ یانەیێ نە، وەكر نەتنێ ئەو باوەریا خوە ژدەست بدەن، بەلكو گیانێ شەركرنێ و حەزا سەركەڤتنێ لدەڤ وان نەمینیت، یا هەشتێ و ژهەمییا گرنكتر دڤێت جەماوەر ژبیر نەكەت كو شاشیێن دادڤانان ژی دگەلەك هەلكەڤتنان دا زولمەكا مەزن ل ئەنجامێن تیمێ كر، لێ ئەڤ رامانا وێ چەندێ نادەت كو یانەیا دهۆك وەرزەكێ سەركەڤتی پێشكێش نەكریە، لەوما پێدڤییە هێشتا ئەم چاڤەرێ بین.
