دهۆك و هەولێر دەربازبوونە قووناغا 16ێ
قەیس وەیس:
هەردو یانەیێن كوردستانی دهۆك و هەولێر دەربازبوونە قووناغا 16ێ ژ هەڤڕكیێن كۆپا ئیراقێ یا فوتبۆلێ پشتی شیایین سەركەڤتنێ ل سەر هەڤڕكێن خوە بینن و یانەیا نەورۆز پلێت ژ دەستدا، د یاریێن واندا ئەوا ژ چارچووڤەیێ قووناغا 32ێ هاتینە كرن، ئەوا 10 یانە ژ ڤێ قووناغێ دەربازبووین و شەش یانەیێن دیتر چاڤەڕێ وان بووینە ژ وانا یانەیا زاخۆ ئەوێن وەرزێ بۆری ڕێزێن ئێكێ هەتا شەشێ هاتین.
پێنگاڤا ئێكێ سەركەڤتی بوو
دناڤ ئەردێ خوە دا و بێ بەرهەڤبوونا جەماوەرێ خوە تیما یانەیا دهۆك قارەمانا ئیراقێ یا وەرزێ بۆری شیا ب گۆلەكێ بێ بەرانبەر سەركەڤتنێ ل سەر یانەیا حوسێن بینیت ئەوا ژلایێ پیشەكارێ وێ یێ لوبنانی كەریم دەرویش د خولەكا 78ێ دا تۆماركری، ب درێژاهییا یاریێ ئاستێ چاڤەڕێ كری یێ یانەیا دهۆك نە هاتە دیتن و دبیت نە بەرهەڤبوونا پشتەڤانێن وێ ئێك ژ كارتیكرنێن ڤێ چەندێ بیت.
هارۆن ئەحمەد گەشبینە
ل دۆر ڤێ یاریێ هارۆن ئەحمەد كاپتنێ تیما دهۆكێ گۆت: دبین هندەك هزربكەن بەرانبەر یانەیەكێ مە یاری دكر د خولا پلا نایاب یاریێ دكەن و دێ سەركەڤتنەكا ب سانەهی بیت، لێ یارییەكا بزەحمەت هاتە كرن، تیما مێڤان ژی هاتبوو سەركەڤتنێ، لێ ئەم شیاین ب گەهینە ئارمانجا خوە ب سەركەڤیت، ب ئۆمێدین ئەڤ سەركەڤتنە دێ بەردەوامی دان بیت ب ئەنجامێن باش و سەركەڤتی و ب ئۆمێدین ئەڤ سەركەڤتنە دەستپێكە بۆ پاراستنا ناسناڤێ خوە، دیاربوو هەر ژ دەستپێكا یاریێ تیما حوسێن دەمێ یاریێ دكۆشت ب ئێخستنا یاریزانان بۆ ناڤ یاریگەهێ دا و تەپە گەلەك گیروو دكر، دیاربوو ئەوان حەزا پەنەلتیان هەبوو، لێ مە هەموو بزاڤ كرن بگەهینە گۆلا وان و شیان سەركەڤتنێ بینن.
هەولێر دەربازبوو و نەورۆز خوسارەت بوو
ژلایەكێ دووڤە تیما یانەیا هەولێر ب سەركەڤتنەكا گرنگ ژ باشۆرێ ئیراقێ ڤەگەریا پایتەختێ كوردستانێ پشتی ب گۆلەكێ بێ بەرانبەر سەركەڤتی ل سەر خودانێن ئەردی یانەیا ناسرییە، گۆلا هەولێرییان ژلایێ هێرشبەر سەفین مەنسۆر د خولەكا 85ێ دا تۆماركری، ژلایێ خوەڤە یانەیا نەورۆز پلێتا دەربازبوونێ ژ دەستدا پشتی دگەل مێڤانا خوە یانەیا بەحریب ب لێدانێن پەنەلتییا تووشی خوسارەتیێ بووی ب 4-2 گۆلان ئەوا یارییا وان بێ گۆل وەكهەڤبووین.
ژ ئەنجامێن یاریێن دی
رومادی 1-1 ئەلگەرمە، ب لێدانێن پەنەلتییان 2-1 بۆ ئەلگەرمە، نەفت میسان 3-چنە نەفت بەسرا، مەسافی1-1 مینا ب لێدانێن پەنەلتییان 5-4 بۆ مینا، مووسل1-1 حەشد ب لێدانێن پەنەلتیان 5-3 بۆ حەشد، كەربەلا 2-چنە ئەمانەت بەغدا، غاز ئەلشیمال چنە-چنە ئەلقاسم، ب لێدانێن پەنەلتییان 4-3 بۆ ئەلقاسم.
شەش یانە ل قووناغا 16ێ چاڤەڕێ بوون
پشتی ب دووماهی هاتنا قووناغا 32ێ و دەربازبوونا 10 یانەیێن سەركەڤتی، شەش یانە ئەوێن ل وەرزێ بۆری ڕێزێن ئێكێ هەتا شەشێ بوو ل قووناغا 16ێ چاڤەڕێ بوون ئەو ژی، شورتە، تەلەبە، زەورا، زاخۆ، جەوییە و نەفت، دهێتە پێشبینیكرن د نێزكترین دەم دا فدراسیۆنا فوتبۆلا ئیراقێ پشككێشان بۆ قووناغا 16ێ ب پشكدارییا 16 یانەیان ئەنجامبدەت، دووڤدا ژڤان و یاریگەهێن یاریێن ڤێ قووناغێ بەلاڤبكەت، ئەوا دێ هەموو یاری ب شێوەیێ كەتنا ئێكجاركی كو سەركەڤتنیێ هەر یارییەكێ ئێكسەر دەبازبیتە قووناغا هەشتێ.
هەژی گۆتنێ یە تیما یانەیا دهۆك بۆ جارا ئێكێ د دیرۆكا خوە و یانەیێن كوردستانی دا ناسناڤێ كۆپا ل وەرزێ بۆری 2024-2025ێ ب دەستڤە ئینابوو، پشتی ب سەركەڤتی ل سەر یانەیا زاخۆ، ئەوا یاری دگەل بۆرینا هەردو چارێكێن زێدەكری بێ گۆل ب دووماهی هاتبوو و گەهشتییە لێدانێن پەنەلتییان ب ئەنجامێ 5-3 گۆلان دهۆكێ ناسناڤێ كۆپا ئیراقێ ب دەستڤە ئینابوو.
