دهۆك ڤەگەڕیا سەركەفتنان و زاخۆ چاڤ ل سێ خالانە
تیما تەپا پێی یا یانەیا دهۆك ڤەگەڕیا سەركەفتنان پشتی ڤەقەتیانەكا درێژ بۆ ماوەیێ پێنج گەڕان ژ سەركەفتنان دووركەفتی، پشتی دوهی سەركەفتنەكا گرنگ و مەعنەوی ل سەر یانەیا حدوود ب گۆلەكێ بێ بەرانبەر د یارییا واندا ئەوا ژ چارچووڤەیێ گەڕا 11ێ یا خولا ستێرێن ئیراقێ ل یاریگەها كۆت هاتییە كرن.
د نیڤا ئێكێ دا تیما یانەیا دهۆك ب هێز هاتە دناڤ یاریگەهێ دا دەرئەنجامێ گڤاشتنێن بەردەوام شیا گۆلا ئێكێ و پێشكەفتنێ بینت ئەوا ژلایێ یاریزانێ وێ جەبار كەریم د خولەكا 19ێ دا تۆماركر، پشتی ڤێ گۆلێ یانەیا حدوود بزاڤكرن ژبۆ راستڤەكرنا ئەنجامێ یاریێ لێ ئەنجام وەكو خوە ما، د نیڤا دویێ دا تیما دهۆكێ بەردەوامی دا ئاستێ خوە و ئەنجام پاراست ب گۆلەكێ بەرانبەر سەركەفتن ئینا.
د پرێسكۆنفرانسێ رۆژنامەڤانی دا جەبار كەریم خودانێ گۆلا سەركەفتنێ و باشترین یاریزانێ یاریێ گۆت: سۆپاس بۆ خودێ ئەم ڤەگەڕیاینە سەركەفتنا و دەستخوەشییا هەمی یاریزانان دكەم و سۆپاسییا راهێنەری دكەم باوەری دایە من، گۆلا من دیارییە بۆ جەماوەرێ دهۆكێ تایبەت ئەوێن هاتینە یاریگەهێ و پشتەڤانی كرین.
ژلایێ خوە بڕیارە ئەڤرۆ دەمژمێر2:30 پشتی نیڤرۆ تیما یانەیا زاخۆ ل یاریگەها كۆت ببیتە مێڤانا یانەیا كەرخ یا بەغدایی د دیارییەكا هەستیار دا بۆ كوڕێن خابووری ئەوێن ل بن گڤاشتنێن جەماوەرێ خوە دێ شەڕی بۆ سێ خالان كەن و ڤەگەڕیان بۆ سەركەفتنان، زاخۆ ب 11 خالان ژ دو سەركەفتن و پێنج وەكهەڤییا و دو خوسارەتیان ل رێزا 10ێ دهێت، بەرانبەر دا كەرخ 10 خال هەنە رێزا 12ێ دهێت، ژلایەكێ دووڤە تیما هەولێری مفا ژ ئەرد و جەماوەرێ خوە وەرنەگرت پشتی دگەل زەورا ب گۆلەكێ تووشی خوسارەتیێ بووی، هەر ژ یاریێن ئەڤرۆ، نەورۆز دێ مێڤاندارییا نەفت كەت، نەجەف- ئەلقاسم، جەوییە- تەلەبە.
