دهێنه ته‌خمین كرن كو بزاڤا گۆڕان 24 كورسیان ب ده‌ستڤه نه‌ئینیت
ئه‌ز د وێ باوه‌ریێ دا مه ئه‌گه‌ر ئه‌ڤرۆ ده‌نگدان بهێنه‌كرن بزاڤا گۆڕان دێ گه‌له‌ك كێمتر ژ 24 كورسیان د په‌رله‌مانێ كوردستانێ بده‌ستڤه ئینیت. د زانستێن پارتێن سیاسی دا، ب تایبه‌ت د سه‌رده‌مێ هه‌وا پورپاگه‌ندێ بۆ ده‌نگدانێ، رودانێن ده‌م كورت و ده‌م درێژێن جڤاكی، ئابوری و ب تایبه‌ت سیاسی باندورا راسته‌وخو ل سه‌ر كێم كرن یان زێده بوونا ده‌نگێن حزبان دروست دكه‌ن. دروست بوونا بزاڤا گۆڕان هه‌ڤده‌م بوویه دگه‌ل چه‌ند رودانێن گرنگێن سه‌ر ئاستێ عیراق و كوردستانێ، ژ وان: د وی ده‌می دا بزاڤا گۆڕان هاته راگه‌هاندن كو عیراق د قه‌یرانه‌كا شه‌رێ نافخویی دا بوو ( شه‌رێ سونی و شیعێن عه‌ره‌ب)، ڤێ چه‌ندێ كارتێكرن ل سه‌ر پارتێن كوردستانی د بیافێ هه‌فپه‌یمانی دا دروست كربوو و ل سه‌ر ئاستێ كوردستانێ عینادا سیاسی یا مێژووی د ناڤبه‌را پارتێن كوردستانی دا. پشكدار بوونا بزاڤا گۆڕان بو جارا ئێكێ د پروسه‌سا ده‌نگدانا په‌رله‌مانێ كوردستانێ دا ل 2009ێ 25 كورسی بده‌ستڤه ئینان. لێ ل 2013ێ 24 كورسی و ئه‌گه‌ر ئه‌ڤرۆ ده‌نگدان بهێته كرن دێ ئه‌ڤ رێژه‌یه گه‌له‌ك به‌ر ب كێمیێ ڤه چیت، ئه‌و ژی ژ به‌ر كومه‌كا فاكته‌ران:
هه‌ر پارته‌كا سیایی چ سه‌ر ده‌مێ هه‌وا پرۆپاگندا هه‌لبژارتنان یان د سه‌رده‌مێ ئوپوزسیون بوونێ زور خال و سیمبولان د كه‌ته ئارمانج كو زورتر جه‌ماوه‌ری ل دورێن خو كوم بكه‌ت و ده‌سته‌لاتێ بده‌ستڤه بینیت. لێ ئه‌گه‌ر پارته‌كا سیاسی زور سوز دابنه خه‌لكی و ئه‌ڤ سوزه د سه‌رده‌مێ ده‌سته‌لاتداریێ دا بجه نه‌هاتن دێ یا ب زه‌حمه‌ت بیت ڤێ رێژێ جاره‌كا دی بده‌ست ڤه بینیت. بزاڤا گۆڕان ژ وان پارتانه چ سه‌رده‌مێ ئوپوزسیون بوونێ یان سه‌رده‌مێ هه‌وا راگه‌هاندنێ زور سوزێن گرنگ دابوونه جه‌ماوه‌ری لێ پرانیا ڤان سوزان بجه نه‌هاتن، هه‌ر ب به‌شدار بوونا بزاڤا گۆڕان د ده‌سته‌لاتێ دا قه‌یرانێن سیاسی یێن هه‌رێما كوردستانێ ئالوزتر لێ هاتن (مینا هه‌ولا راستڤه‌كرنا یاسایا سه‌روكاتیا هه‌رێمێ ل 23-7 ل په‌رله‌مانی) و قه‌یرانا ئابووری.
خالا دوویێ، خورت بوون و لاواز بوونا هه‌ژمونا پارتێن سیاسی گرێدایی ب دروست كرنا هه‌ڤپه‌یمانیا سیاسی یه د ناڤبه‌را ئه‌كته‌رێن ستراتیژی و پارتێن جوراوجورێن سیاسی. چێكرنا هه‌ڤپه‌یمانی و هه‌فكاریا خورتا ل فێ دیماهیكێ دنافبه‌را بزاڤا گۆڕان و یه‌كێتیێ دا دێ بیته فاكته‌ره‌كێ گرنگ كو پتر د به‌رژه‌وه‌ندیا یه‌كێتیێ دا بیت و ب زه‌ره‌را بزاڤا گۆڕان بدیماهیك بهێت. زورینا ئه‌و كه‌سێن ده‌نگێ خو داینه بزاڤا گۆڕان ئه‌فرۆ ڤێ پرسێ ژخو دكه‌ن: مه ده‌نگێ خوه دا بزاڤا گۆڕان چونكه بزاڤه‌كا به‌رهه‌لستكاره، ب تایبه‌ت ل هه‌مبه‌ر یه‌كێتیێ، مه نه‌دزانی ئه‌ڤرۆ دێ د ئێك به‌ره دا بن. خالا سێیێ، د كونگرێ بزاڤا گۆڕان دا به‌رێز نوشێروان خو به‌ربژێر نه‌كر بو پوستێ رێكخه‌رێ گشتی یێ بزاڤا گۆڕان، ئانكو تا ئه‌ڤرۆ بیێ ده‌نگدان رێكخه‌رێ گشتی یه و هه‌روه‌سا زور جار بریارێن تاكره‌وانه یێن داین و گه‌له‌ك جاران سه‌ره‌دانا لایه‌نێن سیاسی یێن كرین بێ كو راوێژێ د گه‌ل جفاتا رێفه‌به‌ریا بزاڤا گۆڕان بكه‌ت، ئانكو ئه‌ف سه‌ره‌ده‌ریه شێوازه‌ك ژ پێناسا تاكره‌ویێ ده‌ردبریت. باشترین ده‌لاله‌ت بو ڤێ چه‌ندێ ئه‌ڤه‌یه كو زور لایه‌نگر، هه‌لسوراو و ئه‌ندامێن جڤاتا ناڤه‌ندیا بزاڤا گۆڕان ره‌خنێن توند ل رێكخه‌رێ گشتی گرتینه و هنده‌ك ژ كه‌سێن به‌رنیاس دلسار بوینه یان ژی هاتینه په‌راوێز كرن.
خالا چارێ، ئافراندنا ژینگه‌هه‌كا ساخله‌م د سه‌رده‌مێ ده‌نگدانێ دا گه‌له‌ك گرنگی و هه‌ستیاریا خو یا هه‌ی ژ بۆ پارتێن سیاسی. ئێك ژ خالێن هه‌ره سه‌ره‌كی كو باندورا خو دروست كریه ل سه‌ر ژینگه‌ها ئه‌ڤرۆ یا پارتێن سیاسی یێن كوردستانێ، شه‌رێ داعشه. بزاڤا گۆڕان هێزه‌كا چه‌كداری نینه كو بشێن حه‌ماسه‌تێ بو كومه‌لگه‌هێ دروست بكه‌ت، هه‌رچه‌نده وه‌زیرێ پێشمه‌رگه هه‌لسوراوێ بزاڤا گۆڕانه. د ڤی شه‌رێ ل هه‌مبه‌ر داعش دا رولێ پارتێن كو هێزا سه‌ربازی هه‌ی دناف جڤاكێ دا ب باندور و ب هێزترن.
