ده‌رئێخستنا مۆله‌تا شۆفێریێ دێ هێته رێكخستن
هه‌ولێر، قائید میرۆ:
بڕیاره پێداچوون د سیسته‌مێ ده‌رئێخستنا مۆله‌تا شۆفێریێ دا بهێته كرن و به‌رپرسه‌كێ هاتنوچوونا هه‌رێما كوردستانێ ژی دبێژیت: بتنێ ل ئێك رێڤه‌به‌ری سیسته‌مێ كۆریا باشوور بۆ ده‌رئێخستنا مۆله‌تا شۆفێریێ دهێته بجهئینان.
عه‌مید ئه‌سعه‌د مه‌لا كه‌ریم، په‌یڤدارێ هاتنوچوونا هه‌رێما كوردستانێ بۆ رۆژناما ئه‌ڤرۆ دیار كر، ل هه‌رێما كوردستانێ ژ لایێ نه‌ه رێڤه‌به‌ریێن هاتنوچوونێ مۆله‌تا شۆفێریێ دهێته ده‌رئێخستن و گۆت: “بتنێ ل رێڤه‌به‌ریه‌كا هاتنوچوونێ سیسته‌مێ ده‌رئێخستنا مۆله‌تا شۆفێریێ ب سیسته‌مێ كۆریه و یێن دی ژی هه‌موو ل گوره‌ی سیسته‌مێ كه‌ڤنن، هه‌رچه‌نده بڕیاره پێداچوون د سیسته‌مێ ده‌رئێخستنا مۆله‌تا شۆفێریێ دا بهێته كرن، چونكو سیسته‌مێ كۆری ژی وه‌كو پێدڤی نینه و نوكه ل كۆریاباشوور ناهێته بجهئینان”.
عه‌مید ئه‌سعه‌د مه‌لا كه‌ریم ئاماژه ب وێ چه‌ندێ كر كو جوداهی د ناڤبه‌را پارێزگه‌هێن هه‌رێما كوردستانێ دا بۆ دانا مۆله‌تا شۆفێریێ یا هه‌ی و گۆت: “بڕیاره ل گوره‌ی پلانه‌كا وه‌زاره‌تا ناڤخوه هاتنوچوونا هه‌رێما كوردستانێ هه‌موو ببیته ئێك سیسته‌م، ئانكو جوداهی د ناڤبه‌را چو رێڤه‌به‌ریان دا نه‌مینیت و ب ئێك سیسته‌م مۆله‌تا شۆفێریێ بهێته ده‌رئێخستن”.
