ده‌ربه‌ده‌ریێ به‌ری وی دایه نڤیسینا هه‌لبه‌ستان
دهۆك، شاكر ئه‌تروشی:
هه‌لبه‌ستڤانێ دۆری وه‌لات (محه‌مه‌د عه‌لی به‌رواری) كو ب (بێوار به‌رواری) یێ به‌رنیاسه، د دیداره‌كێ دا بۆ رۆژناما ئه‌ڤرۆ گۆت: ل سالا (1957) ل باژێرێ مووسل ئه‌ز ژ دایكبوویمه و دژیه‌كێ بچووكدا مه په‌یوه‌ندی ب شۆڕه‌شێ كر بووین و بووینه پێشمه‌رگه، ل سالا 1974 ده‌ربه‌ده‌ری وه‌لاتێ ئیرانێ بووین، پشتی سێ سالا چووینه ئه‌مریكا و هه‌تا نوكه ل وی وه‌لاتی دژین.
هه‌روه‌سا گۆت: ده‌مێ ئه‌م گه‌هشتینه ئه‌مریكا من گه‌له‌ك خه‌ریبیا وه‌لاتێ خوه كوردستانێ و باژێرێ خوه كر و من هند خوه دیت ئه‌ز یێ ب نڤیسینا چه‌ند په‌یڤان خه‌ریبی و هه‌ست و سۆزا خوه بۆ وه‌لاتێ خوه ده‌ردبڕم و ئێدی بڤی ره‌نگی من ده‌ست ب نڤیسینا هه‌لبه‌ستێ كر و هه‌تا نوكه یێ به‌رده‌وامم، بۆ زانین ناڤه‌رۆكا پتریا هه‌لبه‌ستێن من ل دۆر ده‌ربه‌ده‌ریێ نه، هه‌روه‌سا هه‌لبه‌ستێن ئه‌ڤینی و شۆَڕه‌شگێڕی ژی دنڤیسم و دیوانا من یا ئێكێ ل بن ناڤێ (ده‌ربه‌ده‌ری و ئه‌ڤینیا وه‌لاتی) ل سالا (1989) چاپ بوویه و نوكه ئه‌ز یێ به‌رهه‌ڤیێ بۆ دیوانه‌كا دی دكه‌م كو دێ ب پیتێن لاتینی به‌لاڤكه‌م و هه‌لبه‌سته‌كا من (كوردستان) ژلایێ هونه‌رمه‌ندا ده‌نگخۆش (مهاباد ئیبراهیم) بوویه ستران و هاتیه گۆتن.
بێواری به‌رواری گۆت: د وه‌ختی دا هنده‌ك بزاڤێن ئه‌ده‌بی و ره‌وشه‌نبیری و كلتۆری یێن كوردی ل ئه‌مریكا دهاتنه كرن، زێده‌باره‌ی خوه‌نیشادانا بۆ پشته‌ڤانیا دۆزا كوردی، لێ پشتی هاتنا كۆرۆنایێ ئه‌و چالاكی گه‌له‌ك یێن كێم بووین، چنكو ئه‌مریكا نه وه‌ك ئۆرۆپایه و هژمارا كوردان ل ئۆرۆپا گه‌له‌كا زۆره.
ل دووماهیێ گۆت: ل سالا (1988) هه‌تا نوكه ئه‌ز یێ ل ویلایه‌تا كالیفۆرنیا سه‌ندیاگو دژیم، ل 2003 هه‌تا 2010 وه‌ك وه‌رگێر ئه‌ز ل گه‌ل له‌شكرێ ئه‌مریكی هاتبوومه كوردستانێ، نوكه من نڤیسینگه‌هه‌كا فێركرنا شۆفێریێ هه‌یه و ئه‌ز سه‌رپه‌رشتیا وێ دكه‌م.
