ده‌رزین ل سلىمانیى په‌یدابووین
شڤان سالم گولى
عه‌ره‌ب دبێژن (ما بنی علی باگل فهو باگل)، ئانكو هه‌ر تشتێ ل سه‌ر چونه‌یێ بهێته ئاڤاكرن دێ چوننه بیت، گه‌له‌ك دوور ناچین بیرا خوه ل بۆیه‌رێن 16 ئۆكتۆبه‌رێ بینین، كو هه‌ر ئێك ژ باڤێل تالبانی و لاهۆر شێخ جه‌نگی تێدا ب پله‌كێ چوونه سه‌رێ مله‌كێ، و شیان خوه ب پالپشتیا هه‌ر ئێك ژ ئیران و ئیراق و بریتانیا بكن ژماره ئێكێن ئێكه‌تیا نیشتمانی، پرسا گرنگ ئه‌ڤه‌یه گه‌لۆ ئه‌ڤ دو كه‌سه ل پێشی بۆیه‌رێن ئاماژه پێدایی چ كاریگه‌ریه‌كا وان یا سیاسی هه‌بوویه؟ ئه‌رێ هه‌ڤكاری و ته‌باییا ڤان دو كه‌سان دێ چه‌ند به‌رده‌وام بیت؟ ئه‌رێ كارڤه‌دانا په‌یوه‌ندیێن ڤان چه‌ند كاریگه‌ری ل سه‌ر رایا جه‌ماوه‌ری و كاربده‌ستێن ئێكه‌تیا نیشتمانی دێ هه‌بت؟ ئه‌رێ داویا ئێكه‌تیا نیشتمانی دێ ب چ ئاقاره‌كی دا چیت؟
كۆمه‌كا پرسێن دی ژی ل گۆڕێ هه‌نه، كو هه‌ژی به‌رسڤدانێ نه.
ئه‌گه‌ر باش خوانده‌ڤانێ هێژا های ل بۆیه‌رێن به‌ری ئوكتوبه‌رێ هه‌بن هیچ ژ ڤان ب حساب كارێكته‌رێن ناڤ هاتی ئه‌و ناڤونیشانێن وه‌سا ب هێز و كاریگه‌رێن سیاسی نه‌بووینه، لێ هه‌ر دویان ئه‌و ڤالاتیا ژ ئه‌نجامێ نه‌خوه‌شكه‌فتنا مام جه‌لال تالبانی باش بكارئینان بۆ گه‌هشتن بۆ مه‌به‌ستا خوه، ب تایبه‌ت ژی ئێكه‌تی د ناڤبه‌را بالێن جودا جودا دا په‌رت و به‌لاڤ ببوو، دیاره ڤالاتی و نه‌بوونا به‌گره‌وه‌نده‌كا وان یا سیاسی و دیسا نه‌رازیبوونا كۆمه‌كا ئالیگرێن ئێكه‌تی ژ په‌یوه‌ندیێن ئێكه‌تیا نیشتمانی و پارتی و به‌رچاڤ خستنا رویه‌كێ خراب ژ پارتی بۆ جاده‌یا ئێكه‌تیا نیشتمانی ب مه‌به‌ستا ڤه‌شارتنا گه‌نده‌لی و بێ سه‌روبه‌ریا ناڤخوه‌یا ئێكه‌تیا نیشتمانی ده‌لیڤه خۆشكرن كو ئه‌ڤه كه‌سه ب ئاسانی بكه‌ڤن داڤێن وه‌لاتێن دژی كورد و جاشایه‌تیه‌كا چو جار نه‌هێت ژ بیركرن پێ دانه كرن، و ب پالپشتیا هه‌مان وه‌لاتان ئێكه‌تی ده‌ربازی قووناغا هه‌ڤسه‌رۆكیێ كرن و هه‌ردو ب هه‌ڤسه‌رۆكێن ئێكه‌تیا نیشتمانی هاتن نیشانكرن، لێ یا هه‌ردو هه‌ڤسه‌رۆكان هزر تێدا نه‌كری سه‌رده‌ری ل گه‌ل پارتی بوویه كو خودان سه‌نگ و پێگه‌یا سیاسی و جه‌ماوه‌ری ل ئاست ئیراق و هه‌رێما كوردستانێ یه، چونكی ب خه‌یالا وان 16ی ئوكتۆبه‌رێ نه‌مانا پارتی دێ ده‌ستپێكه‌ت و ئێدی كێشه‌یا سه‌رده‌ریكرنێ ل گه‌ل پارتی نامینیت، لێ دیاره مان و ب هێزبوونا پارتی میلێ ده‌مژمێرا وان پێچه‌وانه‌ی ئاراسته‌یا خوه زڤری و ئه‌ها ل ڤێرێ ده‌رزا لێك ترازانێ هێدێ هێدی خوه‌یا دبیت.
ئه‌و ژی ده‌ما باڤێل مان و بهێزبوونا ئێكه‌تیێ د نێزیكبوونێ ژ پارتی دا بینت و لاهۆر ته‌ڤاڤ پێچه‌وانه، ئه‌ڤه ژ ئالیه‌ك دی ژی مالباتا تالبانیان لاهۆری ب مه‌ترسیه‌ك رژد ل سه‌ر ناڤوده‌نگ و ده‌ستهه‌لاتداریا خوه دبینن، له‌وا ژی رۆژ بو رۆژ چه‌قێن ململانا وان توند و تۆلتر دبن و ئاكامێن وێ خرابتر و ئه‌وا ل ڤێ داویێ ژی رویی دایی ئێك ژ وان ئاكامێن خراب،كو ب گۆره‌یى زۆر ژێده‌ران هه‌ولا ژه‌هرخوراوكرنا باڤێل تالبانی هاتبوویه دان، هه‌ر چه‌نده بالێ لاهۆر تالبانی ڤێ ب سیناریۆیێ دزانن، لێ بێ حاشایه كو ئێكه‌تیا نیشتمانی سه‌ربۆره‌كا باش ل گه‌ل ژه‌هرخوران و كرنا سه‌ركردێن خوه هه‌بوویه، له‌وا ژی ئه‌ڤه هه‌موو گومانان دره‌ڤینیت، چو پێ نه‌ڤێت ماستاوچی و خودان به‌رژوه‌ندی و سیاسی یێن ئێكه‌تیا نیشتمانی ژی د ڤێ هه‌ڤكێشێ دا بێ هه‌لویست نابن چ دیار چ نهێنی. وه‌لاتێن ده‌ست ل پشت په‌رده‌یان هه‌یین و ب تایبه‌ت ژی ئیران و ب من بریتانیا ژی ل گه‌ل هه‌موو هه‌ولێن خوه ددن بۆ پاراستنا هه‌ڤسه‌نگیێ لێ ره‌وش و بۆیه‌رێن د ناڤ ئێكه‌تی دا رووددن ده‌رخه‌رێن وێ نه كو سه‌رێ دو به‌ڕانان د مه‌نجه‌له‌كێ دا ناكه‌لیت و د پێشه‌رۆژێ دا ئێكه‌تی دوور نینه ئه‌گه‌ر تووشی شه‌ڕه‌كی نه‌بیت، تووشێ دابڕانه‌كا دی ببت و پارته‌كا دی ژێ ڤه‌قه‌تیت.
