ده‌زگه‌هێن هه‌والگیریێ یێن توركیا و سووریێ كۆم دبن
ب، سه‌رجان مه‌حمود:
ئیسماعیل په‌كین به‌رپرسێ ژوورا هه‌والگیریا به‌رێ یا سوپایێ توركیا د داخۆیانیه‌كێ دا راگه‌هاند كو پشتی كۆمبوونا ل مۆسكۆ یا د ناڤبه‌را ده‌زگه‌هێن هه‌والگیریێ یێن توركیا و سووریێ دا، دێ كۆمبوونا دویێ ژی د ناڤبه‌را هه‌ر دو ئالیان دا هێته سازكرن و گۆت: (ژ سالا ۲۰۱۱ ڤه په‌یوه‌ندیێن مه ل گه‌ل سووریێ نه‌ماینه و ئه‌و یه‌ك هه‌م د وارێ ئێمناهیێ و هه‌م ژی د وارێ ئابووری و سیاسی دا زیانه‌كا مه‌زن گه‌هاندیه هه‌ر دو ده‌وله‌تان و چه‌ند جاران ب ناڤبژیڤانیا رۆسیا و ئیرانێ هه‌ڤدیتن هاتنه كرن لێ بێی ئه‌نجام بوون و ژ به‌ر ڤێ یه‌كێ كۆمبوونا كو د ناڤبه‌را هاكان فیدان سه‌رۆكێ ده‌زگه‌هێ هه‌والگیریا توركیا و عه‌لی مه‌ملوك سه‌رۆكێ ده‌زگه‌هێ ئاسایشا نه‌ته‌وی یا سووریێ دا ل به‌غدا گه‌له‌ك گرنگ بوو و ئه‌ڤ كۆمبوون نه دووره هه‌ر دو ئالیان نێزیكی هه‌ڤدو بكه‌ت).
ناڤهاتی بۆ ده‌زگه‌هێن راگه‌هاندنا توركیا دیار كر بابه‌تێن سه‌ره‌كی یێن كو د كۆمبوونا د ناڤبه‌را ده‌زگه‌هێن هه‌والگیریێ یێن هه‌ر دو ئالیان دا بهێنه ئاخڤتن، بابه‌تێن ل سه‌ر په‌نابه‌رێن سووریێ، حوكمه‌تا خوه‌سه‌ر یا كوردان ل باكورێ سووریێ، په‌كه‌كێ و یه‌په‌گێ نه و گۆت: (د ڤان رۆژێن دووماهیێ دا په‌یوه‌ندیێن توركیا ل گه‌ل سعوودیێ، مسرێ و ئیماراتێ به‌ر ب باشبوونێ ڤه دچیت و كۆمبوونا د ناڤبه‌را هاكان فیدان و عه‌لی مه‌ملوك به‌رهه‌مێ ڤان په‌یوه‌ندیێن ئه‌رێنی نه و ئه‌ز وه‌سا دبینم پشتی كۆمبوونا به‌غدا بهێته ئه‌نجامدان دێ ره‌نگێ په‌یوه‌ندیێن د ناڤبه‌را توركیا و سووریێ دا كه‌ڤیته چارچۆڤه‌كا ئه‌رێنی و بۆ ڤێ چه‌ندێ كۆمبوونا توركیا و سووریێ پێنگاڤه‌كا دیرۆكیه).
سه‌رۆكێ به‌رێ یێ ژوورا هه‌والگیریا سوپایێ توركیا د دووماهیا ئاخڤتنا خوه دا ژی راگه‌هاند كو نها د رۆژه‌ڤا ئه‌مریكا دا بابه‌تێ ڤه‌كێشانا هێزێن سه‌ربازی ل باكورێ سووریێ هه‌یه و ئه‌ڤ بابه‌ته دێ ره‌نگێ سیاسه‌تێ ژی ل هه‌رێمێ گوهۆریت و ده‌لیڤه‌كا باش بۆ په‌یوه‌ندیێن نوو د ناڤبه‌را توركیا و سووریێ دا دروست كه‌ت.
هه‌ر د ڤێ مژارێ دا په‌یڤدارێ وه‌زاره‌تا به‌رگیریێ یا ئه‌مریكا ژی راگه‌هاند كو د قۆناغا نها دا چو پلانا وان یا ڤه‌كێشان یان ژی كێمكرنا هێزێن سه‌ربازی ل رۆژئاڤا و باكورێ سووریێ دا نینه و كار و چالاكیێن وان ب ره‌نگه‌كێ ئه‌رێنی برێڤه دچن.
