ده‌زگه‌هێ خێرخوازیێ بارزانی دێ 240 خانیان ل كه‌مپا شاریا ئاڤا كه‌ت
له‌زگین جۆقی:
به‌رپرسێ په‌یوه‌ندی و راگه‌هاندنێ ل ده‌زگه‌هێ خێرخوازیێ بارزانی ل دهۆكی دیار كر، ده‌زگه‌هێ خێرخوازیێ بارزانی دێ 240 خانیان ل كه‌مپا شاریا بۆ وان خێزانێن ئاگربه‌ربوویه خیڤه‌تێن وان ئاڤا كه‌ت و دبێژیت: نوكه ئه‌م یێ كار ل سه‌ر ئاڤاكرنا وان دكه‌ین.
دلاوه‌ر بشار، به‌رپرسێ په‌یوه‌ندی و راگه‌هاندنێ ل ده‌زگه‌هێ خێرخوازیێ بارزانی بۆ رۆژناما ئه‌ڤرۆ خویا كر، ژووره‌كا ئوپه‌راسیۆنا دگه‌ل هه‌موو رێكخراوێن ناڤخوه‌یی و جیهانی هاتیه پێكئینان بۆ وێ چه‌ندێ ئه‌و هاریكاریێن بۆ وان خێزانێن خیڤه‌تێن وان هاتینه سۆتن دهێن، ب دروستاهی بهێنه به‌لاڤكرن و گۆت: “ده‌زگه‌هێ خێرخوازیێ بارزانی سه‌رپه‌شتیا وان خێزانان دكه‌ت و خوارن و پێدڤیێن زارۆكان وه‌كو شیر و پێدڤیێن دی دابین دكه‌ت، دگه‌ل دابینكرنا كه‌ره‌ستێن خوه‌پاراستنێ ژ ڤایرۆسێ كۆرۆنایێ و هه‌ر تشته‌كێ پێدڤی بیت ئه‌م بۆ وان دابین دكه‌ین”.
ئاشكرا ژی كر كو د ناڤ كه‌مپا شاریا دا كۆمبوونه‌ك د ناڤبه‌را جڤاتا روحانیا ئێزدیان و سه‌رۆكێ ده‌زگای خێرخوازیێ بارزانی دا دگه‌ل حكومه‌تا هه‌رێما كوردستانێ هاتیه ئه‌نجامدان، بۆ وێ چه‌ندێ یا ئێزدیان بڤێت بۆ وان بهێته ئه‌نجامدان، وان ژی داخواز كر خیڤه‌تێن وان ببنه بلۆك، ئێكسه‌ر ئه‌ڤ داخوازیه هاته وه‌رگرتن و بڕیار هاته دان ل جهێ خیڤه‌تان بلۆك بهێنه دانان.
