ده‌زگه‌هێ خێرخوازیێ بارزانی هاریكاریا ساخله‌میا دهۆكێ دكه‌ت
دهۆك، له‌زگین جوقی:
رێڤه‌به‌رێ نه‌خۆشخانا ئازادی ل پارێزگه‌ها دهۆكێ دیار كر كو دوهی 29/8/2021ێ ده‌زگه‌هێ خێرخوازیێ بارزانی هاریكاریێن نۆشداری پێشكێشی نه‌خۆشخانا ئازادی كرن.
د. سه‌گڤان حه‌سه‌ن، رێڤه‌به‌رێ نه‌خۆشخانا ئازادی ل پارێزگه‌ها دهۆكێ بۆ رۆژناما ئه‌ڤرۆ خویا كر، ئه‌ڤه نه‌جارا ئێكی یه ده‌زگه‌هێ خێرخوازیێ بارزانی هاریكاری و پشته‌ڤانیا ساخله‌میا دهۆكێ دكه‌ت، به‌لكو چه‌ندین جاران هاریكاری و پشته‌ڤانیا ساخله‌میێ كریه، نه‌خاسمه ژی بۆ روو ب رووبونا ڤایرۆسێ كۆرۆنایێ، نوكه ژی چه‌ندین كه‌ره‌ستێن نۆشداری ژ ئامیرێن تافیلكرن و كه‌مامه و كه‌ره‌ستێن خوه‌پاراستنێ ژ ڤایرۆسێ كۆرۆنایێ پێشكێشی ساخله‌میا دهۆكێ كرن.
د. سه‌گڤان گۆت: “ده‌زگه‌هێ خێرخوازیێ بارزانی به‌رده‌وام ده‌ستپیخه‌ریێ دكه‌ت و هاریكاری و پشته‌ڤانیا ساخله‌میا دهۆكێ دكه‌ت”.
میدیان خدر، كارمه‌ندا ده‌زگه‌هێ خێرخوازیێ بارزانی ل دهۆكێ بۆ ئه‌ڤرۆ گۆت: “مه هاریكاری و پشته‌ڤانیا چار بنگه‌ه و نه‌خۆشخانه‌یێن دهۆكێ كر و خه‌لكێ پارێزگه‌ها دهۆكێ ژ ڤان هاریكاریان دێ مفادار بیت”.
د. هه‌كار مسته‌فا، رێڤه‌به‌رێ نه‌خۆشخانا كۆرۆنایێ ل دهۆكێ بۆ ئه‌ڤرۆ دیار كر، ده‌زگه‌هێ خێرخوازیێ بارزانی كه‌ره‌ستێن خوه‌پاراستنێ ژ ڤایرۆسێ كۆرۆنایێ بۆ نۆشدار و كارمه‌ندێن ساخله‌میێ دابینكرن، ئه‌ڤه ژی پشته‌ڤانیه بۆ ستافێ ساخله‌میێ پتر خزمه‌تا وه‌لاتیان بكه‌ت، ئه‌م هیڤیدارین ئه‌ڤ جۆره هاریكاریه دبه‌ردوام بن.
