ده‌ستان ژێ بشۆ
محه‌مه‌د چه‌لكى
كارێ ژ هه‌میان به‌ربه‌ڵاڤتر ل ڤى وه‌ڵاتى ره‌خنه و گازنده‌نه، تو ئێكى نابینى ژ ره‌وشا نوكه‌ى رازى، هه‌ر ژ ده‌ستهه‌ڵاتێ بگره هه‌یا بگه‌هیه خوانده‌كارێن دبستانا بنه‌ڕه‌ت، هه‌ر ئێكى مشۆته‌كا تژى گازنده ل ملینه، لێ بۆ ڤه‌دیتنا چاره‌یان گشت دبێ مڕ و كۆسه‌نه. ئه‌ڤێ چه‌ندێ مامێ عه‌لۆ ته‌نگاڤ كریه و هندى بكارت خوه ژ گه‌نگه‌شێن هۆسا یێن بێ وه‌ج دده‌ته پاش. د ڤان هزران دا بوو هه‌كو نێزیكى مزگه‌فتا ناڤه‌ندا باژێرى بوو و ده‌نگێ مه‌لاى ئه‌و ده‌ر تژى ده‌نگ كربوو. خوه‌شیا ده‌نگێ مه‌لاى و كوردیا وى یا گێلما گاڤانى سه‌رنجا مامێ عه‌لۆ بۆ خوه ڕاكێشا و ل جهێ خوه ڕاوه‌ستا و گوهێ خوه دا مه‌لاى ..
وه‌ح … هه‌چكو مه‌لا ژ خه‌لكى پتر یێ گازندا دكه‌ت، مالمیرات دێ بلا جاره‌كێ ئاخڤتنه‌كا خێرێ ژ ده‌ڤێ ته بده‌ركه‌ڤت خوه دنیا خراب نابت. هندى من ل بیره هوین هه‌ر یێ ڤى قه‌وانى ڤه‌دجوین و كولتۆرێ عه‌ره‌بان ل به‌ر خه‌لكى شرین دكه‌ن، مامۆ دێ شیره‌تان ل خه‌لكى بكه‌ن و به‌رێ وان بده‌نه كارێن ژیانێ خوه‌شتر لێدكه‌ن، ئه‌ڤه چ سوحبه‌تێن ده‌م بسه‌رڤه چووینه هوین دكه‌ن! ئه‌ز عه‌جێبمایمه كو زمانێ مه شیاى خوه ل به‌ر هه‌وا ڤان مه‌لان گرتى و … سلاڤا ده‌نگه‌كێ نیاس زنجیرا هزران لێ قه‌تاند و ل سه‌ر ملێ خوه زڤڕى:
• ب لاله‌شا نورانى كه‌م ته زڕاڤێ من په‌قاند، ما مرۆڤ هۆسا سلاڤ دكه‌ن؟
ـ ئێ ب خودێ مامێ عه‌لۆ ئه‌ز باوه‌رناكه‌م هه‌ر ته زڕاڤ هه‌بت!
• مه‌زنان ژ مێژه گۆتى: ” یێ ترسنۆك به، داى تێر عه‌مر بى”.
ـ دابێژم ئه‌ڤه ده‌مه‌كه مامێ عه‌لۆ ژى وه‌كو جاران نه‌مایه و خوه ژ پرسان دده‌ته پاش…
• دیاره ئه‌ز یێ بوویمه به‌نیشتێ ده‌ڤێ هه‌وه و من ب خوه نه‌زانیه!
ـ نه ب وێ ڕامانێ…
• پا ب كیژ ڕامانێ!!
• تۆ مرۆڤه‌ك ڕاستگۆیى و ب ڕاستگۆیا خوه ناڤدار بوویى.
• نه بێژه ب ڕامانا ئه‌زماندرێژى و ده‌ڤگازنده‌یى.
ـ حاشا …
• باوه‌ربكه گه‌له‌ك تشت یێن بۆ من دیار بووین و ئێدى هه‌وجه ناكه‌ت مرۆڤ هه‌ر وى قه‌وانى ڤه‌گێرت، هه‌تا به‌رى نوكه من هزر دكر گازنده یان ڕاستر ره‌خنه ل كریار و دیاردێن كه‌شه‌فرێت دێ رێ خوه‌شكه‌ر بن بۆ چاره‌سه‌ریێ و ب ڤى كارى مرۆڤ خزمه‌تێ دگه‌هینت جڤاكێ، لێ بۆ من دیار بوویه كو جڤاك و ده‌ستهه‌لات ژ من باشتر دزانن و ئه‌و ژ من پتر گازندا ژ ڤێ ره‌وشێ دكه‌ن، ماده‌م ئه‌و ژى یێن ب ڤێ ره‌وشا كه‌مباخ حه‌سیاین ئێدى هه‌وجه‌ى چ ره‌خنه‌گر و گازنده‌چیان هه‌ر نینه! مانێ مه‌ره‌م ژ ره‌خنه و گازندێ هایداركرنا جهێن شۆلپێچێبینه، وه‌كه دن دچته خالا ئه‌زماندرێژى و حه‌سوودیێ.
ـ ئانكو نه ژ به‌ر هێرڤه و وێڤه‌یه!
• نه‌خێر … ده‌ستان ژێ بشۆ
ـ ژ چ بشۆم؟
• ژ گازنده و ره‌خنه‌یان چونكو چ پێڤه ناهێت.
ـ ئه‌ڤه نه مامێ عه‌لۆیه وه‌دبێژت!
• به‌لێ ئه‌زم و دبێژم ده‌ستان ژ ڤان تشان بشۆ و ل هیڤیێ نه‌به ل ده‌مێن پێشیا مه چاره ببن:
“شۆفێرێن كوردستانێ پێگیریێ ب رینمایێن هاتنوچوونێ بكه‌ن.”
“سیاسیێن مه هه‌ڤ بپه‌ژرینن.”
“جڤاكێ سڤیل بكارت هه‌ژموونا خوه ژ ده‌رڤه‌ى حزبان بهێز بێخت”
“ملله‌تێ كورد ئێكه‌تیه‌كا نه‌ته‌وى پێكبینت خوه پشتى سه‌د سالێن دن ژى.”
“یه‌كگرتوویا ئیسلامى ژ ده‌رڤه هزرا ئیخوانێن مسرێ ده‌ستنڤێژا خوه بشۆت..”
“خه‌زنه‌دارێ كوردستانێ بزانت پارێن دهێنه دخزینێڤه ژ كیڤه دهێن و كیڤه دچن!”
“و …. و خه‌لكێ هه‌رێما كوردستانێ باوه‌ریێ ب پلانێن حوكمه‌تا هه‌رێما كوردستانێ بینت ب تایبه‌ت بۆ نه‌هێلانا پاشكه‌فتا مووچه‌ى و 24 سه‌عه‌تیا كه‌هره‌بێ.”
ـ پا ته چ هێلا.
• هه‌ما ژێ بگه‌رهه و ده‌ستان ژ ئاخڤتنێن بێ وه‌ج بشۆ
