ده‌سته‌كا نوو یا یانا گاره هاته هه‌لبژارتن
ئه‌ڤرۆ،
دوهی ب فه‌رمی ده‌سته‌كا نوو یا كارگێریا یانا گاره یا وه‌رزشی بۆ ماوێ چار سالێن بهێت هاتنه ده‌ست نیشانكرن، ئه‌وا ب سه‌رپه‌رشتیا رێڤه‌به‌ریا گشتی یا وه‌رزشی ل هه‌رێما كوردستانێ و ژلایێ لژنه‌كا تایبه‌ت یا رێڤه‌به‌ریا وه‌رزشی ل پارێزگه‌ها دهۆك دهاتنه برێڤه‌برن و ژلایه‌كێ دووڤه هه‌لبژارتنێن یانا زاخۆ هاتنه پاشئێخستن بۆ شه‌مبیا بهێت.
پشتی پرۆسێسا هه‌لبژارتنان هاتیه كرن ئه‌نجامێن وێ بڤی شێوه‌یی بوو، شێروان به‌شار، قه‌ریبا ئازاد، نیهاد ئیبراهیم، یوسف مه‌جید، لازم به‌شار، كاروان عه‌بدوللا، نه‌وزاد محه‌مه‌د هاتنه ده‌ستنیشانكرن بۆ كارگێریا یانا گاره.
لدور ڤێ یه‌كێ شێروان به‌شار سه‌ركه‌فتیێ هه‌لبژارتنان و سه‌رۆكێ به‌رێ یێ یانێ بۆ رۆژناما ئه‌ڤرۆ گوت: سۆپاسیا ده‌سته‌كا گشتی دكه‌م كو بۆ چار سالێن دی باوه‌ری دایه من و پیروزباهیا هه‌ڤالێن خوه دكه‌م، ب هیڤییا وێ یه‌كێ دێ پێكڤه كاره‌كێ كوم كه‌ین ژبۆ خزمه‌تا وه‌رزشا یانا گاره، ل وه‌رزێ بوری سه‌رباری قه‌یرانێن دارایی و گڤاشتنێن به‌رده‌وام ئه‌م شیان كاروانێ سه‌ركه‌فتی یێ یانێ به‌رده‌وامبكه‌ین و نه‌هێلین بهێته راگرتن، بۆ چار سالێن بهێت دێ مه پلانێن باش هه‌بن بۆ پێشئێخستنا تیمێن یانێ و هه‌ڤڕكیێ د هه‌ر قاره‌مانیه‌ك یان خوله‌كا كوردستانێ و ئیراقێ دا بیت، ئه‌وێن هاتینه هه‌لبژارتن خودان سه‌ربۆر و شاره‌زا نه گه‌شبینم دَێ كاره‌كێ سه‌ركه‌فتی كه‌ین.
چاڤه‌رێ بوو ئه‌ڤرۆ یانا زاخۆ هه‌لبژارتنێن خوه ئه‌نجامبده‌ت لێ ژبه‌ر چه‌ند ئه‌گه‌رێن تایبه‌ت هاتنه پاشئێخستن بۆ شه‌مبیا بهێت، بریاره ئه‌ڤرۆ هه‌لبژارتنێن هه‌ردو یانێن ئاكرێ و سه‌نحاریب بهێنه ئه‌نجامدان.
