ده‌سته‌یا سه‌ربه‌خوه‌یا هه‌لبژارتنان و لێنێرینه‌ك
جڤاتا نیشتمانیا كوردستانی پێنگاڤه‌كا دیرۆكی و گرنگ هاڤێت، به‌ر ب ئه‌لند و ئاسۆیه‌كێ گه‌شێ نیشتمانی بۆ دامه‌زراندن و په‌ژراندنا ده‌سته‌یا سه‌ربه‌خوه‌یا هه‌لبژارتنان و گشتگیریا كوردستانێ.
ئه‌ڤ پێنگاڤه یا دیرۆكی بوو كو ده‌سته‌یا سه‌ربه‌خوه ئێكسه‌ر سه‌رپه‌رشتیا هه‌لبژارتنێن كوردستانێ بكه‌ت ب ئاوایه‌كێ بێلایه‌ن و دیموكرات و ئازاد، به‌لێ دڤێت ئه‌ڤ ده‌سته یا بێ لایه‌ن و نیشتمانی بیت كو هه‌موو گه‌ل و نه‌ته‌وه و پێكهاتێن وێ ل به‌رچاڤ وه‌ربگریت و ل دووڤ یاسایه‌كا رێكوپێك سه‌ره‌ده‌ریێ ل گه‌ل هه‌موو گه‌ل و نه‌ته‌وه و پێكهاتان بكه‌ت، كو ل دووڤ هه‌ر گه‌ل و نه‌ته‌وه و پێكهاتێن سیاسیێن كوردستانی ئه‌ندام و نوونه‌رێن وێ بهێنه هه‌لبژارتن، گرنگ بوو كو نوونه‌رێن رێزانی ل كوردستانێ، پارتی و ئێكه‌تی و گۆران و یه‌كگرتوو و كۆمه‌ل د په‌رله‌مانێ كوردستانێ دا، نوونه‌رێن گه‌ل و نه‌ته‌وه و پێكهاتێن كوردستانێ ل سه‌ر بنگه‌هێ پێكهاتن ده‌ستنیشانكربان، وه‌ك ڤان گه‌ل و پێكهاتێن نیشتمانی، ئاشووری، كلدان، سریان، ئه‌رمه‌ن، توركومان، عه‌ره‌ب، ئه‌ڤه هه‌موو پێكهاتێن نیشتمانی یێن كوردستانێ نه، به‌لێ دروسته ل دووڤ گرانیا هه‌ر لایه‌نه‌كێ رامیاری، ئه‌ندام و نوونه‌ر بهێنه هه‌لبژارتن، ئه‌ڤه مافه‌كێ هه‌ر پارت و رێخستن و رێكخراوه‌كا نیشتمانی یه، به‌لێ پێدڤیبوو چ گه‌ل و نه‌ته‌وه و پێكهات نه‌هێنه ژبیركرن، له‌وما پێدڤیه په‌رله‌مانێ كوردستانێ ب گه‌ل نوونه‌رێن راسته‌قینه یێن ڤان پێكهاتان روونیت و ل دووڤ یاسایێ ماف و سه‌روه‌ریا وان بۆ دابین بكه‌ت و ئه‌وژی خوه ده‌سته‌یا سه‌ربه‌خویا هه‌لبژارتنان و گشتگیریا كوردستانێ دا ببینن كو ئه‌ڤ پێنگاڤه دێ بیته پێنگاڤه‌كا باش و خورت به‌ر ب پاشه‌رۆژه‌كا باش و ئاسووده ل كوردستانێ و تیرۆژێن دیمۆكراسی و ئازادیی و سه‌روه‌یا كوردستانێ دێ به‌ر ب ده‌رڤه‌ی كوردستانێ ژی چیت، له‌ومان ره‌خنه‌گرتن ژ شێوازێ دانانا ئه‌ندامێن ڤێ ده‌سته‌یێ یا د جهێ خوه‌دا ژبه‌ر كو هنده‌ك لایه‌ن یێن ژبیر كرن و دڤێت پێداچوونه‌ك هوور و زانستی و خواندنه‌كا ژیواری بۆ بهێته كرن كو ئه‌و ڤالاتیا د ناڤ ده‌سته‌یا سه‌ربه‌خوه‌یا هه‌لبژارتنان دا هه‌ی، بهێته پركرن، و دڤێت بۆ هه‌ر پرسه‌كێ، كورد پرسگرێك و كێشێن كوردستانێ ل گه‌ل نه‌ته‌وه و پێكهاتێن دی ل دووڤ یاسایێ چاره بكه‌ت كو ب هاڤێتنا ڤێ پێنگاڤێ دێ بیته هانده‌ر بۆ ئاڤاكرنا كوردستانه‌كا پری سه‌روه‌ری و دیمۆكراسی.
له‌ومان دڤێت نوونه‌رێن پێكهاتێن هاتینه ژبیركرن دڤێ ده‌سته‌یێ دا، بهێته چاره‌كرن و باشتره مه‌سعود بارزانی سه‌رۆكێ هه‌رێما كوردستانێ رازیبوونا خوه ل سه‌ر ڤێ ده‌سته‌یێ ب ڤی ئاوایی نه‌ده‌ت، پێدڤیه ل دووڤ رێكارێن یاسایی ئه‌ڤ كێشه بهێته چاره‌كرن، ژبه‌ر كو نوونه‌رێن ڤان پێكهاتێن ژبیركری د ڤێ ده‌سته‌یێ دا، ئه‌ندامن د په‌رله‌مانێ كوردستانێ دا، له‌ما ل دووماهیێ دێ بێژیت دڤێت ئه‌ڤ ده‌سته‌یه یا سه‌ربه‌خوه بیت و بێلایه‌ن و پیشه‌یی بیت و ل ژێر كارتێكرن و باندۆرا چ لایه‌نێن سیاسی ڤه نه‌بیت و ئه‌ڤ ده‌سته‌یه هه‌ڤسه‌نگی و ترازیێ بكه‌ت د ناڤبه‌را هه‌موو پێكهاتیان دا و نوونه‌رێ هه‌موو گه‌ل و نه‌ته‌وه و پێكهاتان بیت، كو ئه‌ڤ چه‌نده بهێته كرن گرنگه بۆ پاراستنا قازانج و به‌رژه‌وه‌ندیا هه‌موو گه‌لان، چونكو دۆزه‌كا چاره‌نڤیسازه بۆ كوردستانێ، دڤێت حوكمه‌تا هه‌رێما كوردستانێ و لایه‌نێن وێ و خه‌لكێ وێ، بزاڤێ بكه‌ن كو كوردستانێ بكه‌نه نموونه بۆ هه‌موویان
