ده‌ست ب به‌رهه‌ڤیێن نووه‌ژنكرنا ده‌رگه‌هێ ئامێدیێ هاته كرن
ئامێدیێ، محمود نهێلی:
ده‌ست ب چێكرن و نكراندنا به‌رێن بازی هاته كرن وه‌كو به‌رهه‌ڤی بۆ ده‌ستپێكرن و نووژه‌نكرنا ده‌رگه‌هێ ئامێدیێ یێ شوونه‌واری.
ئه‌یهان ئامێدی، نوونه‌رێ شوونوارێن ئامێدیێ بۆ رۆژناما ئه‌ڤرۆ دیار كر، وه‌كو به‌رهه‌ڤی بۆ ده‌ستپێكرنا نووژه‌نكرنا ده‌رگه‌هێ ئامێدیێ، نوكه هه‌ژماره‌كا به‌ران هاتینه چێكرن و نكراندن و هێشتا دێ هێنه چێكرن و گوت: “ژ به‌ر كو ل وه‌رزێ زڤستانێ چ كارێن ب ڤی ره‌نگی د شیان دا نینه ل سه‌نته‌رێ قه‌زا ئامێدیێ بهێنه كرن، چونكو گه‌له‌ك ساره و به‌فر ژی دباریت، لێ ل ده‌ستپێكا بهارا سالا بهێت ده‌ست ب نووژه‌نكرنا ده‌رگه‌هێ ئامێدیێ دێ هێته كرن”.
دهێته زانین قۆنسلخانا ئه‌مریكا ل هه‌ولێرێ گوژمێ 500 هزار دۆلار ژ بۆ نووژه‌نكرنا ده‌رگه‌هێ شوونواری یێ به‌هدینان ل ئامێدیێ ته‌رخانكرینه و زانكۆیا كولۆمبیا سه‌رپه‌رشتیا بجهئینانا كارێ وێ دكه‌ت و ژلایێ كرێكارێن شاره‌زایێن ناڤخوه‌ڤه دهێته نووژه‌نكرن.
وارشین سه‌لمان، قایمقامێ قه‌زا ئامێدیی ل دۆر بابه‌تی دیار كر، وان دگه‌ل شانده‌كێ قۆنسلخانا ئه‌مریكی ل هه‌رێما كوردستانێ سه‌ره‌دانا ده‌رگه‌هێ شوونواری یێ به‌هدینان ل باژێرێ ئامێدیێ كریه و گۆت: “شاندێ قۆنسلخانا ئه‌مریكی ل هه‌ولێرێ ده‌ست خوه‌شی ل كرێكارێن لێ كار دكه‌ن كرن، دیسا ب دووماهی هاتنا كارێ نووژه‌نكرنا ڤی ده‌رگه‌هێ شوونه‌واری دێ بیته ئه‌گه‌رێ زێده‌بوونا سه‌ره‌دانا گه‌شتیاران بۆ باژێرێ ئامێدیێ و زێده‌تر سه‌رنجا گه‌شتیاران بۆ ده‌ڤه‌رێ دێ هێته راكێشان”.
