ده‌ست ب ته‌مامكرنا پرۆژه‌یێ جوتسایدێ 30 مه‌تری ل كه‌له‌كچێ هاته‌كرن
ئه‌ڤرۆ، ئه‌میر ئه‌ترووشی
سه‌رۆكێ باژێرڤانیا ناحیا كه‌له‌كچێ راگه‌هاند: “پرۆژه‌یێ جوتسایدی 30 مه‌تری ل ناڤ سه‌نته‌رێ ناحیا كه‌له‌كچێ دێ هێته ته‌مامكرن، ژ به‌ر كو ژبه‌ر برینا بودجه‌یا هه‌رێما كوردستانێ ژلایێ عیراقێ و قه‌یرانا دارایی ڤه پرۆژه هاتبوو راوه‌ستاندن و نۆكه دووباره ده‌ست ب چێكرنا سایدێ مایی یێ پرۆژه‌یێ دهێته كرن و دێ هێته تمامكرن”.
ئه‌ندازیار تاجددین ته‌حسین، سه‌رۆكێ باژێرڤانیا كه‌له‌كچێ بۆ رۆژناما ئه‌ڤرۆ دیار كر، هژماره‌كا پرۆژه‌یێن خزمه‌تگوزاری ل كه‌له‌كچێ دگه‌ل تمامكرنا سایدێ مایی یێ پرۆژه‌یێ جوتسایدی 30 مه‌تری ل ناڤ سه‌نته‌رێ ناحیا كه‌له‌كچێ دهێنه بجهئینان ب كوژمێ 720 ملیۆن دیناران و چه‌ندین پرۆژه‌یێن خزمه‌تگوزارێ ل ناڤ سه‌نته‌رێ ناحیا كه‌له‌كچێ دهێنه دروستكرن، هه‌روه‌سا ژی دێ پرۆژه‌یی جوتسایدی 30 مه‌تری ل كه‌له‌كچێ هێته تمامكرن و ئه‌ڤ پرۆژه ژبه‌ر قه‌یرانا دارایی هاتبوو راوه‌ستاندن و نوكه جاره‌كا دی حكومه‌تا هه‌رێما كوردستانێ پشته‌ڤانیێ ل تمامكرنا پرۆژه‌یێ كر و نها دهێته بجهئینان”.
سه‌رۆكێ باژێرڤانیا كه‌له‌كچی ئاشكه‌را كر :”ل سه‌ر پێشینه‌یا هه‌یڤانه یا باژێرڤانیا كه‌له‌كچێ به‌رده‌وام پرۆژه دهێنه بجهئینان، نه‌خاسمه ژی كونكریتكرنا جاده‌یان بۆ خزمه‌تكرنا وه‌لاتیان”.
تاجددین ته‌حسین ئاماژه ب وێ یه‌كێ كر، پرۆژه‌یێ جۆتسایدێ كه‌له‌كچێ گه‌له‌ك یێ گرنگه و دێ بیته ئه‌گه‌رێ كێمكرن قه‌له‌بالغیا ترۆمبێلان و رێكحستنا هاتن و چوونێ و مفایه‌كێ مه‌زن دێ گه‌هینیته خه‌لكێ ده‌ڤه‌رێ و گۆت: درێژیا سایدێ مایی یێ جۆتسایدی 860 مه‌ترن و ل گه‌ل ته‌به‌قه‌كا باینده‌ری ب درێژیا 1600 مه‌تران و هژماره‌كا پرۆژه‌یان دێ ل گه‌ل بجهئینانا جۆتسایدی هێته بكارئینان.
خویاژی كر كو ل گه‌ل جێبه‌جێكرنا پرۆژه‌ی و ب هه‌مان كۆژمێ 720 ملیۆن دیناری، دێ هژماره‌كا پرۆژه‌یان هێنه بجهئینان، وه‌كو چێكرن و قێركرنا رێكا پێشه‌سازیێ ب درێژیا 880 مه‌تران و ل گه‌ل چێكرنا رێكێن ناڤخۆ ل سێ تاخێن كه‌له‌كچێ و گۆت ژی: دوهی رۆژا دووشه‌مبی ده‌ست ب جێبه‌جێكرنا پرۆژه‌ی هاتیه كرن و دێ بۆ ماوێ 270 رۆژان یێ به‌رده‌وام بیت.
ئه‌ندازیار تاجددین ته‌حسین، سه‌رۆكێ باژێرڤانیا كه‌له‌كچێ ئه‌و یه‌ك ژی دیار كر، نها پرۆژه‌یه‌كێ چێكرنا جادێن ناڤخۆ ژی ب درێژیا 110 مه‌تران ل كه‌له‌كچێ ده‌ستپێكریه و كۆژمێ زێده‌تر ژ 12 ملیۆن دیناران ل سه‌ر پێشینه‌یا ناڤخۆ دهێته بجهئینان.
