ده‌ست ب پرۆسا پێداچوونا ده‌رمالێن فه‌رمانبه‌ران هاتیه‌كرن
هه‌ولێر، قائید میرۆ:
حوكمه‌تا هه‌رێما كوردستانێ مژوولی رێكخستنا ده‌رمالێن فه‌رمانبه‌رێن هه‌رێما كوردستانێیه و بڕیارده‌رێ لژنا دارایی و ئابووری ژی ل په‌رله‌مانێ كوردستانێ ئاشكرا كر، ده‌رمالێن نه‌قانوونی دێ هێنه بڕین و یێن دیژی دێ هێنه رێكخستن.
محه‌مه‌د ئیلخانی، بڕیارده‌رێ لژنا دارایی و ئابووری ل په‌رله‌مانێ كوردستانێ خویا كر، بڕیاره حوكمه‌ت ده‌ستكاریا ده‌رمالێن فه‌رمانبه‌ران بكه‌ت، لێ نه ب ڤی شێوه‌یێ د ناڤا خه‌لكی دا به‌لاڤبووی كو حوكمه‌ت دێ ده‌رمالێن فه‌رمانبه‌ران بڕیت، به‌لكو ل گوره‌ی قانوونا چاكسازیێ دێ ده‌رماله هێنه رێكخستن، ئه‌ڤه ژی نابیته ئه‌گه‌ر بێژین دێ ده‌رماله هێنه بڕین و گۆت: “هه‌ر ده‌رماله‌كێ ب بڕیارا حوكمه‌تێ هاتبیته گرێدان بۆ فه‌رمانبه‌ری دێ به‌رده‌وام بیت، ب تنێ ئه‌و ده‌رماله دێ هێنه بڕین یێن نه‌قانوونی بن، چونكو هنده‌ك ده‌رماله بۆ كاره‌كێ دیاركری هاتینه مه‌زاختن، هه‌كه فه‌رمانبه‌ره‌ك ئه‌ڤی كاری نه‌كه‌ت ژ وی ده‌رماله‌ی مفادار نابیت”.
محه‌مه‌د ئیلخانی گۆتژی: “مه هنده‌ك فه‌رمانبه‌ر هه‌نه ژ ده‌رمالێ حوكمه‌تێ مفاداربووینه بێی كو چو كاره‌كی بكه‌ن یان مه‌ترسی ل سه‌ر هه‌بیت، به‌روڤاژی هنده‌ك فه‌رمانبه‌ران ماف هه‌یه ژ وه‌رگرتنا ده‌رماله‌ی مفادار بن و هێشتا مفادار نه‌بووینه، ئه‌ڤه هه‌موو دێ هێنه رێكخستن و هه‌ر ئێك دێ گه‌هیته مافێ خوه یێ قانوونی، نوكه كار ل سه‌ر ئه‌ڤێ پرۆسێ دهێته كرن، هه‌رده‌مێ ب دووماهی بهێت دێ هێته ئاشكراكرن”.
